Estos caberos díes
tamos sintiendo qu’un estudiu encargáu pol Ministeriu de Fomentu encamienta a
suprimir la llinia de ferrocarril Xixón-Lleón, por nun ser rentable económicamente.
Esto dexaría a dellos pueblos ensin serviciu, y tamién supondría un pilancu
importante pa poblaciones como Campumanes o La Pola, que perderíen un serviciu
bien útil y emplegáu. Nesti casu camentamos que, de suprimise’l serviciu, “los
malos” sedríen los del Ministeriu de Fomentu, el gobiernu central al traviés d’un
brazu ministerial y empreses –entá- públiques como Renfe o Adif.
Sicasí, nesti casu
como en tantos otros, tenemos un gobiernu asturianu que se llava les manes. “Fadremos
lo que podamos, pero ye competencia del estáu”. “Tamos a la escontra, pero nun
depende de nós”, y tante otres frases asemeyaes, pudimos sentiles milenta veces
a distintos representantes del gobiernu asturianu refiriéndose a abondos temes,
dalgunos más bien simbólicos o poco rellevantes, pero otros qu’atenten
direutamente escontra’l derechu al trabayu, a unos servicios públicos de
calidá, o a la dignidá identitaria.
Ye cierto que por
exemplu, nesti casu concretu del ferrocarril Xixón-Lleón, ye competencia
estatal, y si se suprime va a ser responsabilidá cimera del gobiernu central, d’eso
nun hai dubia, pero non por ello hai qu’esculpar o escaecer el papel que xuega
en too esto’l gobiernu asturianu. Y nun lo hai qu’escaecer, lo primero, porque los
grandes partíos dominantes n’Asturies dende la transición –UCD, PSOE, PP-
siempres tuvieron desinteresaos, o direutamente roceanos, haza un desarrollu de
l’autonomía asturiana, y d’aquel pecáu, vien esta penitencia.
Asturies cuntaba
con tolos parámetros p’algamar un estatus como’l de les autonomíes de “primer
nivel”, colo que too ello podría llegar a suponer a nivel económicu, d’algame
de competencies, y de poder de negociación pa col gobiernu central. En cambiu,
lo que tenemos ye una autonomía probetaya dafechu, ensin capacidá dala de
maniobra que mos dexa ataos de pies y manes demientres acaben colos nuesos
seutores productivos, cola nuesa cultura, y colos nuesos servicios públicos.
Cuando estos
señores falen de que “nun podemos facer nada”, tán llavándose les manes, pero tienen
que tar llavándoles con cuchu en vez d’augua, porque’l fedor ye más qu’evidente.
Si “nun podemos facer nada”, ye porque ustedes enxamás quixeron facelo. Ye
porque ustedes nun punxeron nengún interés en qu’esti país tuviera capacidá pa
desendolcar el so propiu proyeutu dientro de les posibilidaes -pa unes coses
mayores y pa otres menores- que da’l sistema autonómicu.
Si ustedes, señores
del PSOE y compañía, nun pueden facer nada, hai que castigalos entá con más
dureza, porque son los principales culpables de que seya asina. Demientres qu’en
Catalunya la Generalitat cunta coles competencies de los servicios de cercaníes
de Renfe, equí mos esfarrapen FEVE, y preparen el tarrén pa un seutor priváu
nel que los Cosmen froten les manes, demientres mengüen los servicios y la
calidá de los mesmos.
¿Cuál ye la
diferencia? L’enfotu. Equí enxamás lu hebo. Equí los gobernantes contentáronse
con texer la so rede de clientelismu cola que perpetuar el so poder, y con prauticar
un sucursalismu ranciu respeuto a les sos cúpules dirixentes dende Madrid. Ye
la diferencia principal, voluntá de desendolcar el proyeutu autonómicu más
fondamente, frente a nenguna voluntá, como nel casu asturianu.
Una vez más
rescampla la falta d’un proyeutu asturianu que puxara por esti pueblu, alloñáu
de sucursalismos ya intereses centralistes que, al final, son la espresión de
la voluntá uniformizadora que siempres tuvo esti estáu, emburriada dende les
élites económiques y polítiques.
A los poderes
estatales nun-yos interesa una Asturies con competencies y capacidá de
desenvolvese por sigo mesma, polo que si nun mos organizamos nós, pueblu
asturianu, pa facer política dende’l pueblu y pal pueblu, dende Asturies y p’Asturies,
nun asperemos que naide nos regale la nuesa dignidá.
Porque too esto
güel muncho a cucho, de tanto llavase les manes impunemente.
No hay comentarios:
Publicar un comentario