El drechu a la galbana

Va ciertu tiempu lleí un llibru que podría calificase como singular, tanto pol conteníu que propón, como pola manera d’espresalo, asina como pol interesante, acertáu, y adelantáu al so tiempu tresfondu que propón. Falo de “El drechu a la galbana”, una obra de Paul Lafargue espublizada per primera vegada allá por 1883, y qu’al mio paecer nun tien desperdiciu nin dexa indiferente.

Si bien ye cierto que nun se puede tomar al pie de la lletra nin tener en cuenta dellos camientos particulares del autor, que podríemos considerar poco acertaos o que caen en prexuicios o tópicos sobre determinaos pueblos, races, o sobre époques hestóriques determinaes, Lafargue propón básicamente una custión: finar cola filosofía capitalista d’esplotar al trabayador hores y hores, faciendo que práuticamente viva pa trabayar , sustentase en cuantes a comida y suañu, y non muncho más. Evidentemente, dicho con eses pallabres puede paecer desaxerao n’actualidá, pero tampoco ye que vaya per un camín que nun se pueda treslladar a anguaño.

Tamos nunos tiempos nos que munchísimos trabayadores salen del so llar bien ceo, y nun tornen hasta un númberu d’hores de dos díxitos depués, faciendo de por mediu hores estres a la so xornada llaboral, munches vegaes ensin la so correspondiente remuneración, pa posteriormente salir y tener que facer la compra pa xintar, o atender otros menesteres, ello de llunes a vienres, o de llunes a sábadu, etc. A la fin, lo que toos y toes conocemos de lo que ye una xornada llaboral pa un ciudadanu mediu.

Lafargue proponía nel so llibru un desendolcu tecnolóxicu, que permitiera l’avance de les maquinaries nes fábriques, llibrando asina al obreru d’eses xornaes maratorianes, con “una xornada llaboral de tres hores diaries” que-y permita un esparcimientu,  dedicar el so tiempu a pensar, formase, rellacionase… en definitiva, a too aquello que mos alloña de ser una simple unidá productiva que debe algamar la másima rentabilidá col so trabayu pal beneficiu d’un patrón qu’atropa la inmensa mayoría d’esa ganancia. En definitiva, punxo n’escena, de mena más o menos radical, la vindicación de xornaes llaborales más curties, que permitan al obreru esfrutar de tiempu llibre.

L’autor taba falando d’una auténtica utopía pa la so época, amenorgar aquelles xornaes llaborales de 10 o 12 hores de trabayu, y coses de la vida, hai que recordar un datu interesante: esa utopía de la que falaba Lafargue entamó a tar un poco más a la vera gracies a qu’un 11 de Xineru de 1929, na Unión de Repúbliques Socialistes Soviétiques quedaba establecía la xornada llaboral de siete hores. 1929, va 83 años, y güei, nun mundu domináu pol capitalismu, vemos qu’aquella utopía taba más cerca va ocho décades qu’agora.

Camiento que, pesie a que ye un llibru que nun podemos tomar tal cual se diz, tien un mensaxe de rabiosa actualidá, nunos tiempos nos que mos intenten meter na tiesta a toa costa la mentalidá del capitalismu neolliberal de “quien ye probe, ye porque nun trabayó suficientemente duro”, o, dicho d’otra manera, “quien ye ricu ye porque se lo ganó”. Mentira.  Tampoco tenemos que venos en deuda con un patrón pa realizar hores extres non remuneraes pol fechu de que mos contrató. Sí, por obligación en munchos casos hai que facelo, porque sinon vas pa la cai, pero nun debemos velo como lo normal o lo lóxico, ello ye esplotación, y escontra ello hai que lluchar.

Nunos tiempos nos que tamos perdiendo drechos llaborales, tan empiorando les nueses condiciones de trabayu, pasu a pasu mos imponen sistemes como les ETT que mos arramplen con un trozu del nuesu salariu, en tiempos nos que mos quieren facer ver como normal que la mocedá, nel meyor de los casos, tea esplotada con llargues xornaes de trabayu por 400 euros mensuales, yo vindico esi “drechu a la galbana” del que falaba Lafargue. Ensin miéu, ensin complexos, y col camientu de que nun podemos dexanos pisar nin que finen coles conquistes de los nuesos antepasaos.

Pero pa ello, toos y toes tenemos la dificil tarea de formanos, y algamar una concencia de clas que mos permita ver el lláu críticu de tolos aspeutos. Como ye evidente, anguaño tamos lloñe d’ello, pero por suerte cuntamos con un texíu de sindicalismu de clase honestu, combativu, pequenu pero que va creciendo pasu a pasu, y una población cada vegada más farta, anque intoxicada polos mass-media y por plantegamientos “quincemayistes” mui custionables, pero en resume hai tierra na que poder semar si andamos sollertes.

Bono, apetecíame compartir con toos/es vosotros/es estos cenciellos comentarios, y sobre too recomendavos la llectura d’esta obra, qu’al menos a min fízome pensar y reflexonar sobre aspeutos nos que quiciabes nun ponemos muncha atención nel axetréu del día a día.

Cuando'l terrorista ye l'estáu

Dende va unes selmanes ta d’actualidá’l conflictu colombianu, pol entamu d’un procesu d’alderique ente les Fuerces Armaes Revolucionaries de Colombia- Exércitu del Pueblu y el gobiernu colombianu, que podría ser un primer pasu pa, a mediu o llargu plazu, una igua al conflictu armáu vixente nesi país llatinoamericanu dende va munches décades, más de mediu siglu coles actuales organizaciones FARC-EP y ELN.

Como ye vezu nestos casos, los medios de comunicación traten el tema, y a les organizaciones, en función de los intereses a los que sirvan. Asina, los medios llocales, aquellos que cunten con una concencia social y una llinia progresista bolivariana en xeneral, al mio entender amosen la visión más neutral, en cuantes a nun poner los calificativos típicos de los mass-media capitalistes de, por exemplu, l’estáu español, onde ensin muncha dificultá y aína saquen a rellumar axetivos como “terroristes”, “narco-guerrilla”, y otres perlles, siempres –casualidaes de la vida- a la escontra de la parte contestataria del conflictu, nesti casu, les FARC, o incluso l’ELN.

Sicasí, pa los medios, los grupos armaos d’ultraderecha que servíen a los intereses conxuntos del estáu colombianu –interesáu en que daquién punxere resistencia armao a les guerrilles populares- y a los narcotraficantes –que nun cuntaben coles simpatíes de les guerrilles d’izquierda-  yeren los “paramilitares”, non “narco-guerrilles”, nin “terroristes”, nin “criminales”… non, “paramilitares”, tratándolos tolo eufemísticamente que pueden pa “salvar el culu” a un instrumentu que foi útil pal estáu colombianu en munchos sentíos.

Y ye que los “paramilitares” actuaben básicamente como los sicarios de los narcos y del gobiernu, asesinando con impunidá, atacando a guerrilles como FARC y ELN y los sos simpatizantes, y tamién, por qué non, financiando la carrera elleutoral de dirixentes como Álvaro Uribe, tal como vienen confesando llíderes “paramilitares” prindaos nos caberos años.

Colombia ta ente los países denomaos como “narcoestaos”, ye dicir, estaos cuyes instituciones s’atopen influenciaes de mena importante pol narcotráficu, bien al traviés de la corrupción, de la complicidá nes sos actuaciones, del desempeñu de cargos públicos por parte de trabayadores del narcotráficu, o, como nel casu d’Uribe, al traviés de la financiación de la so campaña elleutoral, con perres manchaes pol sangre’l pueblu, ya’l sufrimientu d’otres tantes.

Equí en dambos bandos, como en cualquier conflictu armáu, habría erros y excesos en dambos frentes, eso ye una realidá, y en consecuencia con ello, los medios de comunicación, si de verdá fueren imparciales, nun trataríen nin axetivaríen despeutivamente a un bandu, tratando sicasí con respetu y complicidá al otru.

Por muncho que cueste dicilo o creyelo, l’estáu colombianu asesinó y asesina, l’estáu colombianu tuvo y ta corrompíu en mayor o menor midida pol narcotráficu, l’estáu colombianu tuvo y tien una soberanía perllimitada, tando baxo la influencia y directrices direutes de los Estaos Xuníos y compañía, polo que nun se debería baxo nengún conceptu demonizar sólo a un bandu que, d’otru lláu, paezme que fizo décades atrás dalgo lóxico y comprensibe: intentó protestar pacíficamente, camudar les coses al traviés del sindicalismu o la política, y resulta que me asesinen. Poro, voi intentar camudar eso mediante la llucha armada.

Podemos tar a favor o non, d’alcuerdu o non en qu’esi foi’l camín correutu, pero ye una posibilidá perfeutamente comprensible que, si nun ves posibilidá pela vía pacífica, intentes la vía armada, y eso ye lo que pasó nel casu colombia, pero ai, amigu, resulta que les guerrilles surdíes seguíen la escuela marxista, con unos enfotos bastante infuenciaos pola revolución cubana y que, nel casu del ELN, algamó tamién rellevancia al traviés del teoloxía de la lliberación, gracies al trabayu del asesináu Comandante Camilo Torres Restrepo.

Ello, nun territoriu onde n’aquellos años los EE.XX taben avezaos a facer y desfacer ensin castigu y siempres mirando pal bien de les sos empreses multinacionales, nun yera bona cosa, y había que combatilo, pela vía armada, y sacando a pasear a la so maquinaria mediática d’esparder mierda qu’inda dura hasta güei. Pa los mass-media y les instituciones gubernamentales del parllamentarismu burgués, el delitu nun ye garrar les armes, sinon que ye l’adoptar una ideoloxía emancipadora de la clas obrera, anticapitalista, antiimperialista, y con una visión amplia y xunificadora de llatinoamérica.

P’amuesa, un botón

Pa exemplarizar lo dicho anteriormente, voi citar un poco’l casu de la “Unión Patriótica”, que foi una fuercia política colombiana creada a mediaos de los años ochenta por movimientos d’esquierda, el Partíu  Comunista de Colombia y frentes de llucha desmovilizaos de les FARC y ELN, pero con unes directrices siempres dixebraes a los estaos mayores de les guerrilles. Foi una organización que puxó pola paz, siempres pacíficamente, siempres usando la política, siempres intentando camudar les coses, algamar la xusticia social pel camín políticu y pacíficu.

El resultáu: Dos candidatos presidenciales, varios abogaos, ocho congresistes, trece diputaos, setenta conceyales, once alcaldes y ente 3.000 y 5.000 militantes, según estimaciones, foron asesinaos durante la so esistencia. Nesti episodiu, güeyamos de nueu que, otra casualidá de la vida, la UP foi oxetivu común de l’estáu y de los narcotraficantes, responsables dambos d’esta bayura d’asesinatos.

Visto lo visto, lo único que pasó ye que durante los años posteriores se reforzare la vía armada, en viendo que, pela vía pacífica, sólo t’asperaba la represión y l’asesinatu.

En definitiva, lo que quiero dicir, ye que nesti procesu, como en tantos otros en munchos llugares del mundu y momentos hestóricos, l’estáu nun ye’l bonu, l’estáu ye terrorista, l’estáu ye opresor, abusa, asesina, roba, y desprestixa y calumnia a aquellos movimientos que-yos contesten.

Poro, hai qu’intentar nun entrar nel xuegu del poder, nin emplegar el so llinguaxe. Equí o dambos son los malos, y negún lo ye, y lo demás yá ye un analís parcial y arbitrariu d’una realidá qu’amosa les penuries d’un conflictu armáu que, a fin de cuentes, busca un cambiu de sistema, la igualdá, unes condiciones de vida dignes pal conxuntu del pueblu, educación, sanidá, comida, respetu al indíxena, etc per un bandu, y caltener la situación d’anguaño, de poder absolutu de la burguesía nun lláu y los EE.XX, del otru.

Yo tengo bien claro pa quién van les mios simpatíes en casu de que me faigan escoyer.

Moxigatería capitalista (II)

  

Estos díes d’atrás vimos nos medios la polémica creada alrodiu de la conceyala del PSOE en Los Yébenes, Olvido Hormigos, de la que s’asoleyó n’internet un videu “eróticu”, por supuestu, ensin el so consentimientu, fechu que sirvió, en primer llugar, pa que la conceyala ficiera tentativa de dimitir, y en segundu llugar pa que la masa moxigata saque a rellumar la so indignación, esa mesma que pa coses más graves nun saquen en nengún momentu.

Yá falaba unos posts atrás, en rellación cola aición del SAT en supermercaos andaluces, de la “Moxigatería capitalista”, el fechu d’escandalizase por custiones simbóliques nesi casu, o poco importantes nesti, y sin embargo caltener una infinita hipocresía escaeciendo y callando coses muncho piores, inxusticies, contradicciones, y otres tantes.

Nesti casu, tamos no mesmo, la conceyala foi una víctima más, nun escolingó esi videu por gustu, y anque fora asina, tampoco taba faciendo nada que nun faiga la inmensa mayoría de los y les mortales, nin nada que fuera en perxuiciu de los ciudadanos nel so llabor políticu. Ye importante qué trabayu desendolca nel so puestu de conceyala, cómo lu exerce, si ye honesta, si tien bones aniciatives, si escucha les peticiones populares respeuto a los temes de so responsabilidá, etc. Sicasí, yá pudo ser hasta’l momentu una gran política, o una malísima política, nun lo sé, pero lo que ta claro ye que la masa moxigata nun-y perdonará esi accidente, ya intentó, intenta y seguramente intentará señalala col déu, facela cayer de les sos responsabilidaes, y rasgase les vestidures, santurrones ellos y elles, polos sos actos.

Esa mesma xente, en xeneral con educación o creencies de calter católico, con eses reminiscencies de la hipocresía y l’aparentar de la sociedá franquista, ye la qu’agora, frutu de la so inorancia, o bien de les sos enquivocaes idegues, aplauden a rabiar a Esperanza Aguirre o a Artur Más porque, benditos sean ellos, van a dá-y puxu a sendos macrocomplexos turísticos, con casinos, hoteles, etc.

Y ye que claro, bien un mafiosu de Les Vegues (estáu de Nevada, non confundir con Corvera), que va a financiar un 25% d’un complexu del que se llevará la inmensa mayoría del beneficiu, diz que creará nun sé cuántos cientos de miles de puestos de trabayu –ensin especificar cómo, por cuanto tiempu, en qué condiciones, pa quién…-, y automáticamente queda convertíu nel mesías, y Esperanza Aguirre na so profeta.

Pero ¡ai, amiguín! Xente de moral católico, xente conservador, moxigatos toos y toes en definitiva, aplauden un modelu que va a traer coses como más prostitución. Ehí sí que nun los veremos protestar, nin rasgase les vestidures porque la so presidenta non sólo consiente, sinon que fomenta y sofita la prostitución. ¿Ye pior que s’espublice un videu si la protagonista ye una persona íntegra y honesta, o lo ye qu’otra presidenta, aristócrata pa más señes, propicie’l puxu de la profesión de meretriz?

Yo téngolo claro, ye infinitamente pior lo segundo, pero como Espe va mui arregladina ella, colos sos vestidinos, la so sorrisa siempres forciada y la so constante soberbia y despreciu pa col ciudadanu mediu –cola esceición de la campaña elleutoral-, nun sedrá oxetu de les crítiques nin llinchamientos de la lexón de moxigatos y moxigates, creaos y fomentaos por esta sociedá hipócrita basada n’apariencies que mos impón el capitalismu y la so forma de ser, esistir, facenos consumir.

Ye un nuevu casu de moxigatería capitalista, mui sangrín, porque Espe o Artur nun los veríemos hasta agora en pelotes, pero pesie a ello, si hai dalgo colo que nun cunten ye con decencia, honestidá, y otres tantes coses que deberíen ser imprescindibles pal desendolcu de l’actividá política.

En resume, una sociedá d'apariencies, onde triunfa quien aparenta bien, al tiempu que coles sos aiciones mos ataca como clas obrera, nos quita drechos, nos afuega económica, social, culturalmente, etc. Quien se sal de l'apariencia estándar, ta condergáu al linchamientu públicu, ensin importar na más.

Otru día, más entregues moxigates.

Ye 8 de Setiembre

Pasó otru añu más, llegó otru 8 de Setiembre, l’ocho de Setiembre del añu 2012. Nesti país de nueso, poco o nada ameyoró nestos 365 díes, al igual que va dos años, y tres, y cuatro… Asturies sigue nuna situación poco deseable, en práuticamente cualquier ámbitu que nos queramos fixar. Nun ye too malo, nun ye too llaceria, pero la gravedá d’esta prevalez penrriba de lo bono, ye dalgo que, anque non inevitable, ye conveniente destacalo, porque aquellos puntos nos que tamos mal, son precisamente aquellos que deciden la continuidá como pueblu d’Asturies, colos sos símbolos, la so llingua, les sos tradiciones, les sos actividaes económiques, la so cultura, el so sistema, les sos rellaciones estatales y supraestatales, y un sinfín d’hestories más.

Sicasí, el mio enfotu de güei nun ye enrrollame con toes eses coses que yá denunciamos milenta vegaes, y que toos y toos sabéis. L’enfotu ye que, nesti 8 de Setiembre, el pueblu, los que facemos y damos vida a eso que se llama Asturies, demos un sentíu verdaderamente útil y provechosu a esti día que dende les instituciones, dende’l gobiernu quieren que lu exerzamos de manera esclusivamente lúdica, festiva, de folixa y na más. Pero dende’l pueblu, amás d’eso, hai que dái un sentíu vindicativu.

Tenemos qu’alcordanos de toes eses persones que toos y toes conocemos, que tuvieron que colar d’Asturies pola falta d’oportunidaes. De toes eses persones que dende un destierru non reconocíu siguen alcordándose a diariu de la so tierra y de la so xente, y que tan naguando por poder dalgún día tornar a esti país. Yo aspero que toos y toes puedan facelo, que nun pase como l’anterior xeneración d’emigraos y emigraes que dende llugares como américa o centro-europa morrieron coles ganes de volver a ver la so tierra.

Hai qu’alcordase tamién d’eses miles de persones que nel pasáu dieron el so tiempu, el so esfuerzu, el so pensamientu, y en munchos casos les sos vides, lluchando por una Asturies meyor, seyan de la ideoloxía que seyan y nel tiempu que seya, a toos ellos tamién el merecíu homenaxe, especialmente a les que llucharon por una Asturies socialista y, poro, soberana.

Y por supuestu, a toes aquelles persones que güei siguen la llucha, que son la cabera trinchera, la cabera defensa d’esti país. A vegaes débil, a vegaes desorganizada, a vegaes ensin aprovechar dafechu’l so potencial y posibilidaes, pero ensin dubia dala sobre que s’actúa siempres coles meyores intenciones, pol bien d’Asturies.

En definitiva, ye hora d’alcordase de toes eses persones que nun salen na foto, y que tienen o tuvieron a Asturies y la so xente nel so camientu. Esi ye’l verdaderu sentíu d’esti 8 de Setiembre, esconsonar concencies, y honrar a aquellos y aquelles que dalgún día ficieron lo mesmo.