Dicir / Facer

Ye un fechu dignu de reconocese nun aconceyamientu al estilu d’alcohólicos anónimos, pero confiésolo: Dacuando, dame por ver una tertulia d’eses faches qu’echen n’Intereconomía, 13TV, y compañía. Y la verdá ye que da una mestura de risa y ganes de matar, pero tamién sirve pa deprender bien l’argumentariu base del entramáu drechista españolista.

Ún d’esos argumentos surde cuando se fala del tema catalán, del fechu de que’l nuevu alcuerdu de gobiernu ente CiU y ERC disponga de que va a cellebrase un referéndum d’autodetermín, con o ensin el consentimientu del estáu. Equí entama a falar el Hermann Terstch de turnu, a glayar y denunciar que “nun se puede permitir que s’incumpla la llei”, que s’ultraxe la sacrosanta y divina constitución de 1978.

Sicasí, como en too, hai un doble raseru: acabamos de conocer que’l Ministeriu de Fomentu niégase a cumplir cola toponimia llegal asturiana, porque la llingua asturiana nun ye oficial y, n’aquellos territorios onde nun hai otra llingua oficial aparte del castellán, la señalización va escrita nel idioma del imperiu.

Esto, fuera de les tertulies intereconómiques, llámase de tola vida incumplir la llei; pasase pel forru el nome oficial de los llugares, que’l gobiernu asturianu foi aprobando nestos caberos años, con más o menos rapidez, más o menos enfotu, pero ye un realidá que munchos conceyos yá cunten coles sos denomaciones oficiales en versión castellán/asturianu, o simplemente col nome popular, y esa debería ser la forma correuta de referise a esos territorios, tanto equí como na china popular.

Pero esto incomoda al gobiernu central, que como ye vezu, busca abellugu nel argumentu de que “la llingua asturiana nun ye oficial”. Y asina ye, nun ye oficial, precisamente violando l’artículu 3.2 de la santa constitución, que diz: “Las demás lenguas españolas serán también oficiales en las respectivas Comunidades Autónomas de acuerdo con sus Estatutos”.

Pero como nun podía ser d’otra forma, faen xusto lo que critiquen, tan pasándose pel forru les lleis qu’ellos mesmos crearon, pa puxar y caltener polos privilexos de les élites económiques, polítiques y sociales d’un estáu que ye una construcción d’orixe burgués, entamada dende arriba y encadarmada al traviés d’ellementos robaos a les distintes cultures que constituyen el so territoriu, pa la so posterior aculturización.

Nengún ta llibre de les contradicciones ente lo que se diz y lo que se fae, pero nesti casu l’asuntu ye sangrín dafechu: Nun respeten la toponimia llegal, nun cumplen la Llei d’Usu y Promoción de la Llingua Asturiana, incumplen drechos constitucionales como la vivienda, el trabayu, la oficialidá de toles llingües del estáu, y tantos otros aspeutos que, si mos fixamos bien, afeuten negativamente sólo a les clases populares.

Enxamás veremos que violen la constitución en perxuiciu de les élites, en nengún ámbitu, y ello ye simplemente porque tanto la constitución como la propia naturaleza d’España ye’l beneficiu del burgués, y si pa ello hai qu’incumplir lleis, s’incumplen.

Esti nuevu –que non caberu- ataque a la llingua asturiana, o a los nomes populares de les nueses parroquies, villes, ciudaes, conceyos… ye un ataque al propiu pueblu trabayador asturianu, y a les sos instituciones más cercanes. ¿Qué más da qu’escoyamos nes urnes en 2014, o cuando toque, a un gobiernu qu’apueste por oficializar dafechu tolos nomes populares, si va a llegar el gobiernu central a incumplilo?

L’autonomía asturiana ye una farsa, ye inútil, ye insuficiente, pero’l camín ye precisamente la descentralización, la soberanía, porque merecemos respetu, caltenimientu y promoción de la nuesa identidá, cultura, llingua, etc, y porque queremos cuntar con un estáu que de verdá cumpla les lleis, que garantice xusticia social, y dignidá , y ta comprobao col pasu lo siglos, que dientru d’España eso ye misión imposible.

Simplemente, porque siguirán diciendo una cosa y faciendo otra (o viceversa), según convenga o non a los verdaderos gobernantes d’esta construcción que llamamos España: la élite, y los sos esbirros nes instituciones autonómiques y llocales.

Disculpes por lluchar

Dende va unes cuantes selmanes sabemos que la multinacional d’orixe xaponés Suzuki tien pensao zarrar la so fábrica xixonesa haza’l mes de Marzu. Una vegada sabío que, per desgracia, los y les trabayadores-unes 200-  van quedar ensin emplegu, la llucha ta centrándose en sacar les meyores condiciones posibles de despidu, con una indemnización lo más alta posible, debío a qu’hai munchos trabayadores qu’a consecuencia de los distintos ERE desendolcaos agotaron la prestación por desemplegu.

Pa llevar a bon puertu estes aspiraciones, tan movilizándose al traviés de xornaes de fuelga, concentraciones, cortes de carretera, etc. Pues resulta que, tres una manifestación que finó frente a la casa del direutor de la planta xixonesa, la multinacional desixó a los y les trabayadores que pidieran disculpes, y apararan dafechu ya indefinidamente les protestes, como condición pa siguir aldericando y ufiertar propuestes nueves. Non, nun ye chancia, ye la cruda y prepotente realidá.

En resume: Déxente ensin trabayu, depués de tar años aguantando Espedientes de Regulación d’Empléu, gastando meses de la to prestación por desemplegu, pa qu’a la fin la empresa te diga qu’ehí te quedes, que piesllen. ¿Qué mos queda nun casu asina? Protestar, y lluchar hasta’l final polos oxetivos que se consideren afayaízos, básicamente porque poco hai que perder. Pero entós llega la empresa y te diz que, o apares de lluchar polo tuyo, y pides perdón por facelo, o nun habrá más alderique…

Esti comportamientu prepotente y “perdonavides” de Suzuki atopa desplicación principalmente na impunidá cola que cunten les empreses, y que conocen perbién. A lo llargo d’estos años vimos llegar a Asturies munches empreses, al calor de les sovenciones derivaes de los fondos mineros, p’acabar zarrando y colando a los pocos años.

Nesos casos, l’aición del gobiernu asturianu, foi de complicidá dafechu cola parte empresarial, atayando y reprimiendo les protestes de los trabayadores, abellugando a la empresa demientres llevaba la maquinaria de les naves, y dexando ensin futuru a cientos o miles d’obreros y obreres.

Y falo d’Asturies porque ye l’ámbitu que mos ocupa, pero nun ye un problema esclusivu del pueblu asturianu, ye un problema del sistema capitalista nel qu’anguaño vivimos. Va a danos igual que gobierne’l PSOE, que FAC, qu’IU, que’l PP, o qu’UPyD, porque toos van a actuar nesa mesma llinia.

Sólo podemos camudar esa situación avanzando en dos direiciones que, amás, acaben siendo una sola: soberanía y socialismu. Baxo eses dos premises, en llugar de ver cómo la Guardia Civil desencadena a trabayadores pa que la empresa puea llevase la maquinaria, veremos que les instalaciones son del pueblu asturianu. Ya incluso nun puntu intermediu de transición, si consiguimos construyir un proyeutu que, baxo l’actual marcu sistémicu, seya al mesmu tiempu rupturista y revolucionariu, esti dirá a les empreses privaes: Bien, colái, pero d’equí nun-vos lleváis nin un llápiz.

Camiento que toos y toes los que pertenecemos y somos conscientes de pertenecer a la clas obrera naguamos por esi puntu de dignidá nel que’l to estáu, o les tos instituciones,nun  permitan qu’un grupu empresarial priváu quiera humildar a tou un coleutivu de trabayadores, que lluchen llexítimamente polo que ye d’ellos.

Pero repito: pa llegar a esi puntu de dignidá, a esi momentu nel que les coses camuden, hai que garrar dos puntos básicos de referencia, imprescindibles l’ún pa col otru: soberanía, y socialismu. Demientres, siguirá la burlla empresarial haza la clas obrera, cola complicidá del estáu, y pretenderán que pidamos perdón por lluchar.

Lluches pola autoestima

Estes pasaes selmanes Asturies vivió un fenómenu de gran rellevancia mediática, el “#SOSRealOviedo”, o lo que ye lo mesmo, el movimientu d’aficionaos y aficionaes pa salvar del desaniciu al equipu carbayón. Como derivao d’ello vimos un procesu de movilización popular perinteresante y dignu d’estudiu, que finó cola salvación del Real Uviéu tres atropar los y les aficionaes unos 2 millones d’euros que, amás, dexen a l’afición como l’aicionista mayoritariu de la entidá.

Muncha xente amosó’l so refugu nunos casos, o incomprensión n’otros, haza esti movimientu, considerándolu negativu o poco entendible. Como argumentos, oyí coses como que la xente pa coses realmente importante como evitar desahucios u otres custiones nun se moviliza tanto nin tan en masa, y nun ye mentira.Sicasí, yo veo munchos aspeutos positivos nesti episodiu, quiciabes non de consecuencies direutes, pero que pueden sentar bases futures. 

  

En primer llugar, -y creo que lo más importante-, los oxetivos pa los que surdió’l movimientu popular pa la salvación del Real Uviéu cumpliéronse, pola aición y organización de l’afición por sí mesma. Moralexa: la xente tien qu’atalantar que, con unidá popular por un oxetivu en comuña, podemos camudar munches coses, o salvales, nestos momentos nos qu’en dalgunes custiones prima la resistencia.

 

En segundu llugar, camiento que nun país avieyáu, y en munchos casos poco o nada dáu al movimientu, a llevantar el culu de la siella, la esistencia d’un movimientu activu y vindicativu, anque seya nel ámbitu futbolísticu, puede sentar les bases pa la llucha n’otres estayes, o simplemente pa crear una concencia de que les coses algámense lluchando y movilizándose. Nun sobra cualquier tipu de movimientu popular que -dientru d’unos parámetros- se mueva y lluche polo que considere.

El tercer aspeutu a considerar, baxo la mio visión, ye que’l Real Uviéu, dientru del so ámbitu, ye hestoria d’Asturies, y parte insepartable de la identidá del conceyu d’Uviéu y del país, igual qu’otres instituciones deportives y de munches otres estayes. A ello amesto que ye un sentimientu, y ello ye lo que-y da un calter tan xunitariu y fuerte. Amósase que potenciá-y a la xente’l so sentimientu, seya futbolísticu, patrióticu, de pertenencia a la clas obrera, etc. ye una ferramienta de movilización importante.

Partiendo d’esa base, yo personalmente nun entendí les crítiques de munchos/es asturianistes pa con esti movimientu, puesto que si caltenemos cierta coherencia pa col camientu de caltener cualquier aspeutu de la nuesa identidá nacional, atalanto que sofitar la salvación del Real Uviéu yera dalgo lóxico.

Equí apaez l’argumentu de la crítica a les “SAD”, a qu’a la fin ponemos perres polos pufos que dexaron unos xestores pufistes y delincuentes. Ye correutu, toi d’alcuerdu, pero non por ello hai que dexar que desapaezca. Ye como si nel casu d’Asturies en conxuntu, como furrula baxo sistema capitalista, consideramos qu’hai que dexala morrer. Non. Lo qu’hai que facer ye lluchar por un sistema igualitariu y de poder popular, lo mesmo que nel fútbol, y ello ye un llabor a llargu plazu.

En definitiva, pongo de nueu enfotu n’autoestima que xeneró y xenera esti episodiu ente una parte del pueblu asturianu, y ello ye perimportante, y dalgo que nun mos podemos permitir despreciar.

En rellación con esti casu del #SOSRealOviedo, agora vamos tocar el tema de “#SofituRadioSele”. Pa quien nun lo sepa, Radio Sele, la hestórica radio llibre 100% n’asturianu y asitiada nel conceyu d’Uviéu, ta en peligru de desaniciu, poles dificultaes económiques pa pagar l’alquiler del llocal onde s’asitien les sos instalaciones. Ye por ello que ponen a dimposición del pueblu asturianu un númberu de cuenta (ver imaxe al final del post) p’atropar les perres necesaries coles que continuar l’actividá.

Camiento imprescindible responder tamién con un movimientu de persones que nun permitan el desaniciu d’un mediu de comunicación llibre y popular, y esi movimientu tien que tar compuestu básicamente pol asturianismu. Nun podemos permitir baxo nengún conceutu siguir perdiendo espacios, y menos cuando se trata d’un mediu d’espresión. Hai que tar al altor de les circunstancies, poner caún lo que puea, y sobre too, que la cosa nun quede ehí, implicase, y potenciar una ferramienta que me paez mui desaprovechada pola pasividá d’un espaciu que nun pasa pol so meyor momentu.

Ye, igual que nel casu anterior, una custión d’autoestima: podemos ver cómo muerre Radio Sele, llamentanos, buscar culpables, echar pestes de lo mal que ta esti movimientu…, o garrar l’aniciativa, y facer lo que tenemos que facer. Incluso nesti mal momentu tenemos capacidá suficiente pa ello.

D’otru lláu, si ponemos en rellación el casu del equipu de fútbol uvieín y de la radio llibre, nun vi a los y les persones que criticaben el movimientu de mena frontal, dicir nada alrodiu del emplegu del asturianu na campaña de salvación del Real Uviéu, poniendo a dimposición de la xente la posibilidá de mercar aiciones nuna versión n’asturianu de la web. O tamién, a l’aniciativa de l’afición azul, que pondrá urnes nel Carlos Tartiere nes que recaudar perres pa Radio Sele. Son exemplos tanxibles y direutos de lo positivo d’estos movimientos populares.

Cualquier pequeña victoria moral ye valiosa y necesaria nestos momentos, polo que yo anímovos a poner el vuesu granín d’arena na salvación de la radio llibre n’asturianu. Porque contribuye a caltener la nuesa identidá, y a dar voz a les lluches del pueblu trabayador d’esti país. Casi na…

Moxigatería capitalista (III)

Ye momentu de retomar les entregues de moxigatería coles que, de xemes en cuando, ciertos seutores de la sociedá mos surprienden y deleiten. Nesti casu vamos a falar d’una islla asitiada en tierres americanes, comandada por un dictador permalu que conderga a la so población a ser la única nel mundu ensin desnutrición infantil. Sí, vamos falar de dalgo rellacionao con Cuba.

Y ye que cuando apaecen eses cuatro pallabres escrites o diches por ciertos ellementos, hai carnaza, manipulación, y munches dosis de moxigatería capitalista p’analizar. Y nesti casu concretu, el del “casu Carromero”, inda más, porque afeuta a un ciudadanu del capitalista y perdemocráticu estáu español, y pa más datos entá, ye un cachorru del Partíu Popular, esos que nun tienen nengún tipu de remordimientu nin temblor a la hora de sofitar güelpes d’estáu escontra aquellos gobiernos democráticos que nun-yos presten.

Pues resulta que’l cachorru Carromero, que yá tenía’l carnet de conducir retiráu nel estáu español, foi de viaxe a Cuba, p’asesorar y financiar a la “disidencia”, pero los probes acompañantes dexaron que pilotara. Consecuencia: dos muertos, y Carromero, como ye lóxico, normal y necesario, foi prindáu por conducción temeraria, y posteriormente xulgáu y condergáu a cuatro años de cárcel.

Qué meyor ocasión pa les files peperes, y pa la infantería pro-capitalista en xeneral, d’esbabayar escontra Cuba, dicir que nun hai democracia, que ye una dictadura permala, y demás hestories que mos quieren llantar na tiesta dende va tantos años. Pero la cosa camuda muncho cuando les vergoñes afeuten al embeligru propiu, y ehí, cómo non, calla tol mundu comoa fogáu o xustifícalo, porque amiguín, afeuta al capitalismu, y a la “democracia” española.

¿Ponemos unos exemplucos?

Euskaldunon Egunkaria yera dende 1990 l’únicu diariu escritu dafechu n’Euskera. Sicasí, nel añu 2003 la cabecera foi pesllada por orde xudicial, siendo deteníes cinco persones ente les que s’atopaben miembros del Conseyu d’Alministración o’l propiu direutor de la redaición qu’ellaboraba la cabecera. 

La escusa puesta pal pieslle d’un diariu de gran importancia pa la cultura vasca, foi la supuesta “collaboración con ETA”, acusación que la propia Audiencia Nacional desestimó haza l’añu 2010 absolviendo a les persones acusaes. Pero yá yera tarde, pasaron siete años, Egunkaria morrió inxusta e inxustificadamente, y los sos dirixentes pasaron pela cárcel ensin cometer nengún tipu de delitu.

El democráticu estáu español mató un elementu de la llibertá d’espresión n’Euskal Herría, y una ferramienta d’espardimientu de la cultura propia. Gran actuación, que si tuviera llugar en cualquiera de los países proscritos pol capitalismu, supondría un gran escándalu, díes y díes de portaes y titulares de telediariu con ello. Pero non, los mass-media, como ye normal nun estáu burgués, atendió los intereses de los sos amos.

Norabona estáu español, DEP democracia.

Derivao d’esi sucesu tenemos la reciente sentencia de los tribunales europeos pa con Martxelo Otamendi, el direutor d’Egunkaria. Asina, el Tribunal Européu de Drechos Humanos, asitiáu n’Estrasburgo, condergó al estáu español por violación de los drechos humanos: tortures, incomunicación, tratu degradante… Polo que condergó al estáu español a pagar 24.000 euros qu’evidentemente nun suponen una reparación alcordies colo asocedío, pero qué más da, son tortures a un vascu direutor d’un diariu n’Euskera, nun ye’l direutor de La Razón, nin d’El País, nin d’El Mundo, nun tien importancia.

Tas lluciéndote, democráticu estáu español...

D’otru lláu, una organización mui tomada en cuenta poles “democracies capitalistes” cuando fala d’estaos ayenos, Amnistía Internacional, garra menos interés pa la mass-media española cuando fala de que “La tortura ye un problema n’España”, un problema contrastáu por tribunales europeos, poles Naciones Xuníes, y por organizaciones como AI, cuyos informes sobre’l tema tan bien accesibles na so web pa toa persona que-y pete ver tolos fechos que nellos se denuncien.

Bien, capitalismu, bien,

¿Más casos? Íñigo Cabacas, rapaz asesináu pola policía a causa d’una ferida na tiesta provocada por un pelotazu policial, según determinó l’autopsia. La policía española asesinando xente, si eso pasara en Cuba la que s’armaría sedría de curiáu…

Igual que sedría de curiáu que s’illegalizaren partíos como equí pasó col PCE ( r ) o cola Izquierda Abertzale ente otros, práutiques tamién denunciaes por distintos muérganos a nivel européu dada la so custionabilidá en términos de garantíes democrátiques y de llibertá d’espresión pol conteníu de la “Llei de partíos”.

Y pa qué vamos a dicir nada si miramos p’Asturies, esti país nel norte de la península ibérica onde un drechu tan básicu como ye’l poder falar con garantíes, ensin represión nin marxinación la to llingua materna, o poder manifestar espresiones de la to cultura que s’atopen en peligru de desaniciu polos pilancos de les estayes públiques pa la so promoción. 

¿Ye eso democracia, o ye una basoria?

Y yá si mos metemos en temes d’actualidá de les caberes xornaes, resulta que per Xixón hai un rebañu d’escoria nazi que se dedica a agredir a xente y creyese los amos del llugar. A ellos, nin una conderga, nin una multa, simples pantomimes en forma d’identificaciones y actuaciones policiales casualmente tardíes cuando hai problemes.

Pero eso sí, a los y les obreres que lluchen na cai pol so puestu de trabayu y por un futuru dignu n’Asturies y p’Asturies príndenles por cientos, con multes, peticiones de cárcel, y un llargu etcétera nel qu’incluso podemos incluyir agresiones policiales, eso por descontao.

En definitiva, con España, el capitalismu, los sos medios y los sos axentes tamos viendo aquello de que “va a falar de mierda’l más cagáu”, van a echase les manos a la tiesta los y les moxigates por custiones ayenes cuando ta’l llar propiu ensin barrer.

Quien diz el llar diz el parllamentu, los tribunales, los cuarteles… 

Eso sí, en consecuencia, dende equí digo POR UN CARROMERO LLIBRE. (Ye dicir, en territoriu cubanu)