Moxigatería capitalista (III)

Ye momentu de retomar les entregues de moxigatería coles que, de xemes en cuando, ciertos seutores de la sociedá mos surprienden y deleiten. Nesti casu vamos a falar d’una islla asitiada en tierres americanes, comandada por un dictador permalu que conderga a la so población a ser la única nel mundu ensin desnutrición infantil. Sí, vamos falar de dalgo rellacionao con Cuba.

Y ye que cuando apaecen eses cuatro pallabres escrites o diches por ciertos ellementos, hai carnaza, manipulación, y munches dosis de moxigatería capitalista p’analizar. Y nesti casu concretu, el del “casu Carromero”, inda más, porque afeuta a un ciudadanu del capitalista y perdemocráticu estáu español, y pa más datos entá, ye un cachorru del Partíu Popular, esos que nun tienen nengún tipu de remordimientu nin temblor a la hora de sofitar güelpes d’estáu escontra aquellos gobiernos democráticos que nun-yos presten.

Pues resulta que’l cachorru Carromero, que yá tenía’l carnet de conducir retiráu nel estáu español, foi de viaxe a Cuba, p’asesorar y financiar a la “disidencia”, pero los probes acompañantes dexaron que pilotara. Consecuencia: dos muertos, y Carromero, como ye lóxico, normal y necesario, foi prindáu por conducción temeraria, y posteriormente xulgáu y condergáu a cuatro años de cárcel.

Qué meyor ocasión pa les files peperes, y pa la infantería pro-capitalista en xeneral, d’esbabayar escontra Cuba, dicir que nun hai democracia, que ye una dictadura permala, y demás hestories que mos quieren llantar na tiesta dende va tantos años. Pero la cosa camuda muncho cuando les vergoñes afeuten al embeligru propiu, y ehí, cómo non, calla tol mundu comoa fogáu o xustifícalo, porque amiguín, afeuta al capitalismu, y a la “democracia” española.

¿Ponemos unos exemplucos?

Euskaldunon Egunkaria yera dende 1990 l’únicu diariu escritu dafechu n’Euskera. Sicasí, nel añu 2003 la cabecera foi pesllada por orde xudicial, siendo deteníes cinco persones ente les que s’atopaben miembros del Conseyu d’Alministración o’l propiu direutor de la redaición qu’ellaboraba la cabecera. 

La escusa puesta pal pieslle d’un diariu de gran importancia pa la cultura vasca, foi la supuesta “collaboración con ETA”, acusación que la propia Audiencia Nacional desestimó haza l’añu 2010 absolviendo a les persones acusaes. Pero yá yera tarde, pasaron siete años, Egunkaria morrió inxusta e inxustificadamente, y los sos dirixentes pasaron pela cárcel ensin cometer nengún tipu de delitu.

El democráticu estáu español mató un elementu de la llibertá d’espresión n’Euskal Herría, y una ferramienta d’espardimientu de la cultura propia. Gran actuación, que si tuviera llugar en cualquiera de los países proscritos pol capitalismu, supondría un gran escándalu, díes y díes de portaes y titulares de telediariu con ello. Pero non, los mass-media, como ye normal nun estáu burgués, atendió los intereses de los sos amos.

Norabona estáu español, DEP democracia.

Derivao d’esi sucesu tenemos la reciente sentencia de los tribunales europeos pa con Martxelo Otamendi, el direutor d’Egunkaria. Asina, el Tribunal Européu de Drechos Humanos, asitiáu n’Estrasburgo, condergó al estáu español por violación de los drechos humanos: tortures, incomunicación, tratu degradante… Polo que condergó al estáu español a pagar 24.000 euros qu’evidentemente nun suponen una reparación alcordies colo asocedío, pero qué más da, son tortures a un vascu direutor d’un diariu n’Euskera, nun ye’l direutor de La Razón, nin d’El País, nin d’El Mundo, nun tien importancia.

Tas lluciéndote, democráticu estáu español...

D’otru lláu, una organización mui tomada en cuenta poles “democracies capitalistes” cuando fala d’estaos ayenos, Amnistía Internacional, garra menos interés pa la mass-media española cuando fala de que “La tortura ye un problema n’España”, un problema contrastáu por tribunales europeos, poles Naciones Xuníes, y por organizaciones como AI, cuyos informes sobre’l tema tan bien accesibles na so web pa toa persona que-y pete ver tolos fechos que nellos se denuncien.

Bien, capitalismu, bien,

¿Más casos? Íñigo Cabacas, rapaz asesináu pola policía a causa d’una ferida na tiesta provocada por un pelotazu policial, según determinó l’autopsia. La policía española asesinando xente, si eso pasara en Cuba la que s’armaría sedría de curiáu…

Igual que sedría de curiáu que s’illegalizaren partíos como equí pasó col PCE ( r ) o cola Izquierda Abertzale ente otros, práutiques tamién denunciaes por distintos muérganos a nivel européu dada la so custionabilidá en términos de garantíes democrátiques y de llibertá d’espresión pol conteníu de la “Llei de partíos”.

Y pa qué vamos a dicir nada si miramos p’Asturies, esti país nel norte de la península ibérica onde un drechu tan básicu como ye’l poder falar con garantíes, ensin represión nin marxinación la to llingua materna, o poder manifestar espresiones de la to cultura que s’atopen en peligru de desaniciu polos pilancos de les estayes públiques pa la so promoción. 

¿Ye eso democracia, o ye una basoria?

Y yá si mos metemos en temes d’actualidá de les caberes xornaes, resulta que per Xixón hai un rebañu d’escoria nazi que se dedica a agredir a xente y creyese los amos del llugar. A ellos, nin una conderga, nin una multa, simples pantomimes en forma d’identificaciones y actuaciones policiales casualmente tardíes cuando hai problemes.

Pero eso sí, a los y les obreres que lluchen na cai pol so puestu de trabayu y por un futuru dignu n’Asturies y p’Asturies príndenles por cientos, con multes, peticiones de cárcel, y un llargu etcétera nel qu’incluso podemos incluyir agresiones policiales, eso por descontao.

En definitiva, con España, el capitalismu, los sos medios y los sos axentes tamos viendo aquello de que “va a falar de mierda’l más cagáu”, van a echase les manos a la tiesta los y les moxigates por custiones ayenes cuando ta’l llar propiu ensin barrer.

Quien diz el llar diz el parllamentu, los tribunales, los cuarteles… 

Eso sí, en consecuencia, dende equí digo POR UN CARROMERO LLIBRE. (Ye dicir, en territoriu cubanu)

¿Caminando al desaniciu?

Ayeri conocíemos los caberos datos del INE sobre la evolución poblacional d'Asturies, y l'asuntu non sólo nun meyora, sinon que ye inda más esmolecedor que n'anteriores estudios. Esta vegada, ente Xineru y Setiembre perdimos 4.534 habitantes, al tiempu que dende Xineru del añu 2011 yá son más de 17.000 los mozos y moces que tuvieron que colar d'Asturies, emigración forzada, esa gran llaceria qu'asola'l nuesu país dende va munchos años.

La realidá ye la que ye, económicamente'l declive dende la reconversión industrial ye evidente, y lo poco recuperao ente finales de los 90 y entamos del nuevu sieglu perdímoslo con creces cola entrada d'esta nueva etapa de "crisis" del capitalismu. Somos un pueblu yá avieyáu, qu'inda se ta avieyando más, y que nun tien perspeutives de camudar esa situación.

Asturies ye un país que nun se puede permitir tener a tantos fíos y fíes fuera de la so tierra de manera forzada, y ye que si entrugues a los y les emigrantes si colaron por gustu, la gran mayoría dirate que lo fizo por necesidña, por falta de perspeutives llaborales, por falta d'emplegos dignos, a la gueta d'un futuru.

Nun ye agradable dicilo, pero la dinámica d'esti pueblu conduz al desaniciu demográficu, que xuníu al cultural, identitariu, etc., nun conformen un panorama mui optimista que digamos. Sicasí, la obligación de la mocedá que resiste nel país ye lluchar, dinamizar una sociedá que necesita esconsonar y camudar dafechu.

Poro, estos díes de movilizaciones estudiantiles, pesie a que nun mos presten muncho los convocantes, tienen que ser un puntu de partida pa que la mocedá asturiana garre a la fin la responsabilidá de dá-y la vuelta al país, de qu'algamemos una esperanza nun futuru meyor pa esti pueblu.

Y esi entamu pa un futuru meyor pa esti pueblu, ye facer l'analís de cómo tamos, de por qué y de quién ye la culpa. Una clas política corrupta, un sistema clientelar y sucursalista, un sistema capitalista agresor, y la falta de soberanía pa dá-y a esti pueblu les polítiques que necesita.

Un pueblu avieyáu, pero siempres lluchador hasta la muerte. Vamos a resistinos a morrer, esa ye una estadística que l'INE nun estudió.

Marcianos na Xunta Xeneral

Esti vienres lleía ablucáu en distintos medios de comunicación asturianos una noticia que me paeció una mestura de chancia de mal gustu, incredulidá y, en definitiva, que tan llocos estos (representantes políticos) asturianos: resulta que na Xunta Xeneral, el parllamentu asturianu, esi supuestu espaciu pa la representación del pueblu, aprovechó’l debate d’orientación política p’aprobar una propuesta d’UPyD en refugu a la cellebración de referéndums d’autodetermín, en rellación col actual panorama en Catalunya.

Pensé dalgo: esta xente vive n’otru planeta. Resulta que tamos nun país onde si dalgo mos sobra son problemes, asuntos que necesiten d’una igua viniente de la nuesa clas política, pero non, pa UPyD, esi partíu contrariu a les autonomíes pero que nun dubia en presentase a les elleiciones y garrar les sovenciones derivaes d’ello, l’esmolecimientu ye que la Xunta Xeneral se declare contra los referéndums d’autodetermín, y FSA-PSOE, PP y FAC, na so llinia de ser más papistes que’l papa, sofitaron la xugada maxenta.

Nun sacamos nenguna cosa clara respeuto a los problemes de los y les asturianes, nengún alcuerdu, nenguna intención de facer daqué, movese pa poder solucionalos o que los sos efeutos na sociedá asturiana seyan menores. Simplemente, pónense más cachondos amosando na sede parllamentaria el so gran patriotismu español, que tan al serviciu de la “nación roxigualda” pa lo qu’esta mande, y lo mesmo da quién tea nel gobiernu; Madrid manda.

Demientres cuatro de les cinco fuercies con representación nel parllamentu se declaren contraries a que’l pueblu d’un determináu territoriu decida llibre y democráticamente cuál quier que seya’l so futuru como país, n’Asturies vemos unos cuantos esmolecedores y murnios conflictos pa los que nun se da una rempuesta tan unánime, rápida y enérxica:

-Liberbank, -esi frankenstein bancariu creáu pa que l’estáu español se quitare d’en mediu’l problema que-yos supunxo la Caxa de Castiella La Mancha a costa d’esfarrapar l’asturiana, cántabra y estremeña-, amás de lo yá comentao sobre’l furacu económicu col que cunta la entidá y la práutica desapaición de la so obra social, agora anuncia una mengua de la so plantilla, amás de reducciones salariales. 

Nesti país, nel que tenemos 100.000 paraos y paraes, y munchos miles de lleendes urbanes espardíes pel mundu, permitímonos el lluxu de renunciar a la nuesa caxa d’aforros, y con ello perder emplegos, calidá de los mesmos, una obra social que daba vida a la cultura, el deporte, etc. y en definitiva, un instrumentu que bien dirixíu y xestionáu sedría d’un valir incalculable pa l’Asturies del presente y del futuru. Pero pa UPyD, FAC, PP y FSA-PSOE, ye más importante que nun heba referéndum d’autodetermín.

-El gobiernu estatal, depués de meses de presiones d’industries como ArcelorMittal, AZSA o Alcoa, aprobó una orde ministerial cola que garantiza una tarifa llétrica especial pa los grandes consumidores d’enerxía. Nello presionó tamién el gobiernu asturianu, sí, pero emburriáu por eses multinacionales que nun busquen otra cosa que más beneficios. Pel so lláu, el gobiernu asturianu, como contrapartida a esa presión, debería pidir como mínimo a diches factoríes dalgún tipu de compromisu/alcuerdu de que se caltendrán TOOS los puestos de trabayu anguaño esistentes. 

Pero non. Les multinacionales presionaron, chantaxearon con amenaces de despidos, pieslle d’instalaciones, o incluso cola desllocalización dafechu, consiguieron el so oxetivu d’una tarifa llétrica más barata, y too ello de baldre. Mañana, si-yos da pola gana, nun tienen nengún compromisu nin siquier simbólicu de caltener a tola plantilla, porque nadie-yos los desixó. Lo mesmo pasa col fornu altu d’ArcelorMittal en Xixón, aparáu como mínimo hasta Xineru, y que veremos si torna a furrular… Eso sí, en casu d’un futuru conflictu llaboral nestes compañíes, nun dubiemos que le fuercies de represión van dir a defender los intereses d’estos capitalistes a los que-yos consienten y consintieron too. Pero pa UPyD, FAC, PP y FSA-PSOE, ye más importante que nun heba referéndum d’autodetermín.

-Resulta que lo que diben a ser dos supuestos exes d’actividá económica p’Asturies, el Niemeyer y el Calatrava, tan en mal momentu económicu. O más que los complexos en sí, les entidaes que los xestionen. Una Fundación Niemeyer que debe cerca de 3 millones d’euros, y una Jovellanos XXI que debe otru puñáu pergrande de millones, y que yá ta en Concursu d’Acreedores. 

Nel casu de Jovellanos XXI, amás, ta arrastrando al desaniciu a otres empreses como Ipezsa, que polos impagos van a pique. D’otra manera, les families Cosmen y Lago, propietaries de Jovellanos XXI, y burgueses per escelencia del nuesu país, nun se ven salpicaos de nenguna manera, nun se-yos piden responsabilidaes dende l’Ayuntamientu o’l gobiernu asturianu, nin van a responder col patrimoniu d’otres de les sos numberoses y lucratives compañíes. Nun importa que’l modelu enfocáu al seutor terciariu, con amiguismos, corrupción y mala xestión, que representen el Calatrava o el Niemeyer fora un auténticu fracasu. Pa UPyD, FAC, PP y FSA-PSOE, ye más importante que nun heba referéndum d’autodetermín.

Y a too esto hai qu’amestar el conflictu na sanidá asturiana, los retayos n’educación, empreses y organismos públicos, supresión d’otros, l’avezada –y non por ello menos llaceriosa- discriminación nes escueles a quienes quieren deprender asturianu y nun pueden, menos ayudes pa la promoción de la llingua asturiana, l’amenaza del Fracking nel nuesu país, la non igua d’un conflictu mineru que paez destináu a la muerte del sector, etc etc etc

En definitiva, qu’hai milenta temes de los que tratar y polos que poner l’enfotu y esmolecimientu na cámara de representantes del pueblu asturianu. Pero non, ellos a lo suyo, como si de marcianos se tratare. Unos presentando proposiciones de refugu al autodetermín, otros viaxando a Madrid pa ver desfilar a una cabra y una bayura de gochos…

Menuda cruz mos cayó…

Arrodiellaos, y perdiendo

Nun ye cosa nueva qu’Asturies sufre d’un texíu gubernamental ya institucional fonderamente clientelar, ye dicir, mui somorguiáu a intereses ayenos a los d’Asturies y la so xente, yá seya a nivel de partíu políticu, a nivel sindical, a nivel de gobiernu, etc., pero ye que nos caberos díes güeyé un par de fechos que me paecieron persignificativos de cómo furrula güei Asturies, d’a quién beneficia esi furrulamientu, y sobre too, de lo perxudicial que ye pa esti país tar arrodiellaos, y hai que dicilo asina, porque ye la realidá. Nun sé si tamos arrodiellaos pa ser fusilaos al amanecer o con posibilidaes d’irguinos, verémoslo, pero vamos al granu con esos fechos de los que falaba:

Fechu 1: Cero soberanía, cero respetu

Esti fin de selmana, el gobiernu estatal del apreciáu (ja!), queríu (jaa!) y prestixosu (jaaa!) Mariano Rajoy fizo pública la fecha del so aconceyamientu col presidente asturianu, el activu (ja!), falador (jaa!) y llíder (jaaa!) Javier Fernández, pal prósimu xueves. Hasta ehí too puede paecer medianamente normal, pero resulta qu’hai una “pequena” cosiquina que reseñar: resulta que’l gobiernu estatal punxo esa fecha ensin siquiera consultala col gobiernu asturianu. Ablucante.

Sicasí, el gobiernu asturianu, siguiendo l’estilu del so cabezaleru, soltó un suspiru, reburdió un poco “amosando maltar” –hai qu’aparentar-, pero a fin de cuentes, el xueves tará bien puntual y sorriente p’aconceyar con Marianín. Qué queréis que-vos diga, pero nun surpriende, nun ye más que un bon exemplu de lo que ye’l gobiernu asturianu, pero non esti, sinon toos los que foron pasando a lo llargo de los años pel nuesu país.

Nun ye una custión namái de Javier Fernández, ye una custión del sucursalismu xeneralizáu de los partíos políticos asturianos con representación institucional, que tan en xeneral baxo los dictaos de les cúpules estatales, pa les qu’Asturies ye un cachu tarrén que ta ehí, y que como nun molesta muncho, nin pon grandes torgues a proyeutos perxuiciosos pal país pero bonos pa otros territorios, queda nel escaezu, o si s’alcuerden de nós ye pa usanos como cmodín y llantanos aquello que nun toleraríen n’otros llaos.

Sinceramente, paezme qu’anque nun foi dalgo con gran repercusión, ye una humildación, otra más de tantes, y deriva de la falta de soberanía xeneral del nuesu país, a nivel de partíos, de sindicatos, d'instituciones… Quédanos muncho qu’aguantar.

Fechu 2: Esfarrapar una caxa solvente pa salvar otres

 Nestos caberos díes tamién conocimos que, según una auditoría, Liberbank –entidá qu’engloba’l negociu de lo qu’enantes yeren Caxastur, Caxa Estremadura, y Caxa Cantabria, sumao a Caxa Castiella La Mancha, dientru del Bancu Liberta, qu’al so tiempu ye propiedá de Caxastur (vaya líu)- tien un furacu económicu de –agarráivos- cerca de 1.200 millones d’euros.

Como toos y toes sabemos, Caxastur, yera una entidá mui meyorable en cuantes a los sos fines, el destín de los sos beneficios, la so manera d’organizase, etc., pero de la mesma manera tamién ye verdá que yera una de les caxes que s’atopaben en meyores condiciones, qu’en solitariu nun sufriría apuros económicos y, meyor o pior, podría siguir alantre cola so actividá.

Sicasí, por decisión política viniente de fuera d’Asturies, llantáronmos a les caxes estremeñes y cántabres –que nun son el problema- y, sobre too, la CCM, esa entidá afuracada per tolos llaos por una pésima xestión que la dexó a piques de la quiebra. Pero ehí taba la clase política y les instituciones asturianes pa salir al rescate, y mercar esi pufu.

Consecuencia: Caxastur tuvo que pesllar oficines pa “reordenase”, práuticamente suprimió la so obra social en cuantes a aportaciones a asociaciones, cultura, etc., dexando un ermu inda mayor en cuantes a actividaes artístiques o asociatives, y sobre too,  asoleyando esi furacón que nin con tolo que tenemos guardao debaxo’l colchón sedríemos a pagar.

Segunda consecuencia más grave pa tolos y toles asturianes: el créditu  ta más caru que n’otra coyuntura, na que’l  tema de les caxes se ficiere atendiendo a criterios rellacionaos col bien d’Asturies, y non pa salvar el culu al poderosu de turnu en Castiella o a nivel estatal.

De pasu, recordemos tamién, qu’otra cosa que contribuyó a encarecer el créditu p’Asturies foi l’amenaza estatal d’interveninos. Resulta qu’hasta agora, Asturies inda nun pidió perra dala del “fondu de rescate autonómicu”. De nueu, el gobiernu español, h.odiéndonos a base de bien.

Paezme que con esti par de casos queda perbién ilustrada cuál ye la principal llaceria d’Asturies: clientelismu, falta de soberanía, falta de voluntá pa facer el bien , atención a intereses ayenos… En fin, nada nuevo, pero por ello nun hai que dexar de denuncialo y afitar qu’hai alternativa, y ta bien clara: soberanismu.