martes, 10 de junio de 2014

L'orde reina en Berlín

 
Torna al asturianu d'esti céllebre testu de Rosa Luxemburgo, na viéspora del so asesinatu por, ente otros, el gobiernu socialdemócrata, en 1919.



L'orde reina en Berlín



"L'orde reina en Varsovia", anunció'l ministru Sebastiani a la Cámara de París en 1831 cuando, dempués de llanzar el so tarrecible asaltu sobre'l barriu de Praga, la soldadesca de Paskievitch entrara na capital polaca pa dar empiezu al so trabayu de verdugos contra los insurxentes.


"¡L'orde reina en Berlín!", proclama triunfante la prensa burguesa, proclamen Ebert y Noske, proclamen los oficiales de les tropes victorioses a les que la gandaya pequeñoburguesa de Berlín acueye nes cais ximelgando los sos pañuelos y llanzando los sos ¡ixuxú! La gloria y l'honor de les armes alemanes salváronse ante la hestoria mundial. Los llamentables vencíos de Flandes y de les Ardenes restablecieron la so sonadía con una rellumante victoria sobre...los 300 "espartaquistes" del Vorwärts. Les xestes de la primer y gloriosa meyora de les tropes alemanes sobre Bélxica, les xestes del xeneral von Emmich, el vencedor de Liexa, palidecen ante les fazañes de Reinhardt y Cía., nes cais de Berlín. Parllamentarios qu'allegaren a axustar la rindición del Vorwärts asesinaos, estrozaos a golpes de culata pola soldadesca gubernamental hasta'l puntu de que los sos cadabres yeren dafechu irreconocibles, prisioneros colgaos de la paré y asesinaos de tala forma que teníen el craniu rotu y la masa cerebral espardida: ¿quién piensa yá a la vista d'estes glorioses fazañes nes vergoñoses ganes ante franceses, ingleses y americanos? "Espartaco" llámase l'enemigu y Berlín el llugar onde los nuesos oficiales entienden qu'han de vencer. Noske, “l'obreru", llámase'l xeneral que sabe entamar victories ellí onde Ludendorff fracasó.


¿Qué tanto pensar equí nel enfile de victoria de la cuadra qu'impunxo ” l'orde" en París, na bacanal de la burguesía sobre los cadabres de el lluchadores de la Comuña? ¡Esa mesma burguesía qu'acaba de capitular vergoñosamente ante los prusianos y d'abandonar la capital del país al enemigu esterior pa poner pies en polvorosa como'l postreru de los cobardes! Pero frente a los proletarios de París, afamiaos y mal armaos, contra les sos muyeres y fíos indefensos, ¡cómo volvía floriar el coraxe viril de los fiyinos de la burguesía, de la “mocedá dorada", de los oficiales! ¡Cómo se desamarró la bravura d'esos fíos de Marte humildaos poco antes ante l'enemigu esterior agora que se trataba de ser bestialmente crueles con indefensos, con prisioneros, con cayíos!


"¡L'orde reina en Varsovia!", "¡L'orde reina en París!", "¡L'orde reina en Berlín!", esto ye lo que proclamen los guardianes del “orde" cada mediu sieglu d'un centru a otru de la llucha histórico-mundial. Y esos eufóricos “vencedores" nun se decaten de qu'un “orde" que dacuando ha de ser calteníu con eses carniceríes sangrientes marcha haza'l so fin. ¿Qué foi esta última "Selmana d’ Espartaco" en Berlín, qué traxo consigo, qué enseñances nos apurre? Entá metanes la llucha, en mediu del clamor de victoria de la contrarrevolución han de faer los proletarios revolucionarios el balance de lo asocedío, han de midir los acontecimientos y les sos resultancies según la gran midida de la hestoria. La revolución nun tien tiempu que perder, la revolución sigue avanzando haza les sos grandes metes entá percima de les tumbes abiertes, percima de les “victories" y de les “derrotes". La primer xera de los combatientes pol socialismu internacional ye siguir con llucidez les sos llínees de fuerza, los sos caminos.


¿Podía esperase una victoria definitiva del proletariáu revolucionariu nel presente enfrentamientu, podía esperase la cayida de los Ebert-Scheidemann y la instauración de la dictadura socialista? En concencia que non si se tomen en considerancia la totalidá de los elementos que deciden sobre la cuestión. La ferida abierta de la causa revolucionaria nel momentu actual, la inmadurez política de la masa de los soldaos, qu'inda se dexen manipoliar polos sos oficiales con fines antipopulares y contrarrevolucionarios, ye yá una prueba de que nel presente choque nun yera posible esperar una victoria duradera de la revolución. Per otra parte, esta inmadurez del elementu militar nun ye sinón un síntoma de la inmadurez xeneral de la revolución alemana.


El campu, que ye d'onde procede un gran porcentaxe de la masa de soldaos, sigue ensin tar apenes tocáu pola revolución. Berlín sigue tando hasta agora prácticamente aisllao del restu del país. Ye cierto qu'en provincies los centros revolucionarios -Renania, la mariña norte, Braunschweig, Sajonia, Württemberg- tán con cuerpu y alma al llau de los proletarios de Berlín. Pero lo que sobremanera falta ye coordinación na marcha haza alantre, l'acción común directa que-y daría una eficacia incomparablemente cimera a la ofensiva y a la rapidez de movilización de la clase obrera berlinesa. Per otra parte, les lluches económiques, la verdadera fuerza volcánico qu'impulsa p’ alantre la llucha de clases revolucionaria, tán inda -lo que nun dexa de tener fondes relaciones coles insuficienci3s polítiques de la revolución apuntaes- nel so estadiu inicial.


De too esto espéyase que nesti momentu yera imposible pensar nuna victoria duradero y definitivo. ¿Foi por ello un “erru" la llucha de la última selmana? Sí, si tratárase puramente d'una "ofensiva " intencional, de lo que se llama un "putsch". Sicasí, ¿cuál foi'l puntu de partida de la última selmana de llucha? Al igual qu'en tolos casos anteriores, al igual qu'el 6 d'avientu y el 24 d'avientu: ¡una brutal prevocación del gobiernu! Igual que'l bañu de sangre a que fueron sometíos manifestantes indefensos de la Chausseestrasse ya igual que la carnicería de los marineros, nesta ocasión l'asaltu a la xefatura de policía de Berlín foi la causa de tolos acontecimientos posteriores. La revolución nun opera como-y vien en gana, nun cola en campu abierto, según un plan intelixentemente concebíu polos “estrategues". Los sos enemigos tamién tienen la iniciativa, sí, y empléguenla por riegla xeneral más que la mesma revolución.


Ante'l fechu de la descarada prevocación per parte de los Ebert-Scheidemann, la clase obrera revolucionaria viose obligada a recurrir a les armes. Pa la revolución yera una cuestión d'honor dar darréu la más enérxica rempuesta al ataque, so pena de que la contrarrevolución crecer col so nuevu pasu alantre y de que les files revolucionaries del proletariáu y el creitu moral de la revolución alemana na Internacional sufrieren grandes perdes.


Otra manera, la inmediata resistencia qu'opunxeron les mases berlineses foi tan bonal y llena d'una enerxía tan evidente que la victoria moral tuvo dende'l primer momentu de parte de la “cai".


Pero hai una llei vital interna de la revolución que diz que nunca nun hai que parase, sumise na inacción, na pasividá dempués de dar un primer pasu alantre. La meyor defensa ye l'ataque. Esta riegla elemental de toa llucha rixe sobre tolos pasos de la revolución. Rescamplaba  -y entendelo asina atestigua'l sanu instintu, la fuerza interior siempres dispuesta del proletariáu berlinés- que nun podía dase por satisfechu con reponer a Eichhorn nel so puestu. Bonalmente llanzóse a la ocupación d'otros centros de poder de la contrarrevolución: la prensa burguesa, les axencies oficioses de prensa, el Vorwärts. Toes estes midíes surdieron ente les mases a partir del convencimiento de que la contrarrevolución, pela so parte, nun se diba conformar cola derrota sufierta, sinón que diba buscar una preba de fuerza xeneral.


Equí tamién atopamosnos ante una de les grandes lleis históriques de la revolución frente a la que s'estrellen toles habilidaes y sabiduríes de los pequeños “revolucionarios" al estilu de los del USP, qu'en cada llucha namái s'enfoten en buscar una cosa, sides pa la retirada. Una vegada que'l problema fundamental d'una revolución foi plantegáu con total claridá -y esi problema ye nesta revolución el derrocamientu del gobiernu Ebert-Scheidemann, en cuantes que primer torga pa la victoria del socialismu- entós esi problema nun dexa d'apaecer una y otra vez en tola so actualidá y cola fatalidá d'una llei natural; tou episodiu aislláu de la llucha fai apaecer el problema con toles sos dimensiones por pocu preparada que tea la revolución pa da-y solución, por pocu maurez que sía inda la situación. "¡Abaxo Ebert-Scheidemann!", ye la conseña qu'apaez inevitablemente a cada crisis revolucionaria  en cuantes qu'única fórmula qu'escosa tolos conflictos parciales y que, pola so lóxicu interna, quiérase o non, emburria tou episodiu de llucha a les so más estremes consecuencies.


D'esta contradicción ente'l calter estremu de les xeres a realizar y l'inmadurez de les condiciones previes pa la so solución na fase inicial del desenvolvimientu revolucionariu resulta que cada llucha sáldase formalmente con una derrota. ¡Pero la revolución ye la única forma de "guerra" -tamién ye ésta una llei bien peculiar d'ella- na que la victoria final namái puede ser preparada al traviés d'una serie de "derrotes"!


¿Qué nos enseña tola hestoria de les revoluciones modernes y del socialismu? El primer fogaral de la llucha de clases n'Europa, el llevantamientu de les texedores de seda de Lyon en 1831, acabó con una severa derrota. El movimientu cartista n'Inglaterra tamién acabó con una derrota. La insurrección del proletariáu de París, nos díes de xunu de 1848, remató con una derrota asoladora. La Comuña de París zarró con una tarrecible derrota. Tol camín que conduz al socialismu -si considérense les lluches revolucionaries- ta semáu de grandes derrotes.


Y, sicasí, ¡esi mesmu camín conduz, pasu a pasu, ineluctablemente, a la victoria final! ¡Ónde taríamos nós güei ensin eses “derrotes", de les que saquemos conocencia, fuerza, idealismu! Güei, que lleguemos extraordinariamente cerca de la batalla final de la llucha de clases del proletariáu, sofitamosnos directamente neses derrotes y nun podemos arrenunciar nin a una sola d'elles, toes formen parte de la nuesa fuerza y la nuesa claridá tocantes a les metes a algamar.


Les lluches revolucionaries son xustu lo opuesto a les lluches parlamentaries. N'Alemaña tuvimos, a lo llargo de cuatro decenios, sonores "victories" parlamentaries, díbemos precisamente de victoria en victoria. Y la resultancia de too ello foi, cuando llegó'l día de la gran prueba histórica, cuando llegó'l 4 d'agostu de 1914, una aniquiladora derrota política y moral, un naufraxu inauditu, una bancarrota ensin precedentes. Les revoluciones, otra manera, nun nos apurrieron hasta agora sinón graves derrotes, pero eses derrotes inevitables fueron atropando una tres otra la necesaria garantía de que vamos algamar la victoria final nel futuru.


¡Pero con una condición! Ye necesario albidrar en qué condiciones se producieron en cada casu les derrotes. La derrota, ¿sobrevieno porque la enerxía combativa de les mases estrellóse contra les barreres d'unes condiciones históriques neñones o s'hai por cuenta de la tibieza, a la indecisión, a la debilidá interna qu'acabó paralizando l'acción revolucionaria?


Exemplos clásicos de dambes posibilidaes son, respectivamente, la revolución de febreru en Francia y la revolución de marzu alemana. La heroica acción del proletariáu de París en 1848 foi fonte viva d'enerxía de clase pa tol proletariáu internacional. pela cueta les miseries de la revolución de marzu n'Alemaña entorpecieren la marcha de tol modernu desarrollu alemán igual qu'una bola de fierro arreyada a los pies. Exercieron la so influencia a lo llargo de tola particular hestoria de la Socialdemocracia oficial alemana llegando inclusive a repercutir nos más recién acontecimientos de la revolución alemana, inclusive na dramática crisis qu'acabamos de vivir.


¿Qué podemos dicir de la derrota sufierta nesta llamada Selmana d’ Espartaco a la lluz de les cuestiones históriques aludíes más arriba? ¿Foi una derrota causada pol ímpetu de la enerxía revolucionaria topetando contra la inmadurez de la situación o foi por cuenta de les debilidaes ya indecisiones de la nuesa acción?


¡Los dos coses al empar! El calter doble d'esta crisis, la contradicción ente la intervención ofensiva, enllena de fuerza, decidida, de les masa berlinés y la indecisión, les vacilaciones, la cobardura de la dirección foi unu de los datos peculiares del más recién episodiu.


La direición fracasó. Pero la direición puede y tien de ser creada de nuevu poles mases y a partir de les mases. Les mases son lo decisivo, elles son la roca sobre la que se basa la victoria final de la revolución. Les mases tuvieron al altor, elles fixeron d'esta “derrota" una pieza más d'esa serie de derrotes históriques que constitúin l'arguyu y la fuerza del socialismu internacional. Y por eso, del tueru d'esta “derrota" va floriar la victoria futura.


"¡L'orde reina en Berlín!", ¡esbirros estúpidos! El vuesu orde ta edificáu sobre arena. La revolución, mañana yá va irguise de nuevu con ruíu y va proclamar, pa terror vuesu, ente soníu de trompetes:

    ¡Fui, soi y sedré!

martes, 6 de mayo de 2014

La Cuestión Nacional y la Llucha de Lliberación Prieta



Darréu preséntase un estractu d'una charra pronunciada por Lamont Lilly el 29 de marzu 2014, mientres una conferencia en Durham, Carolina del Norte, sol llema “Tiempos difíciles son tiempos pa lluchar” n’alcordanza de la muerte de Lenin fai 90 años.




La Cuestión Nacional y la Llucha de Lliberación Prieta

Según Vladimir Lenin fizo n'ochobre de 1917, agora ye'l momentu en que les/los combatientes pola llibertá, una vegada más, vuelvan reconsiderar la importancia de la Cuestión Nacional. Como pensadores y revolucionaries/os de güei, ye hora de que mos enfrentemos a la realidá de les nueses cambiantes condiciones. Ye hora de reevaluar la forma en que l'imperialismu y la dominación capitalista siguen faciendo la so manera de primir a diversos grupos, rexones y nacionalidaes.

Resulta que yo pertenezo a una nacionalidá bien especial y bien primida equí n'Estaos Xuníos – la afroamericana-. Los mios antepasaos fueron traíos contra la so voluntá a trabayar gratuitamente al Norte, Sur y Centroamérica. Fueron traíos encadenaos a trabayar la tierra. Esperimentaron les condiciones más brutales y sádiques que se vieron en tiempos modernos, dando pie a les condiciones sociales que güei se ven nel Hemisferiu Occidental de racismu institucionalizáu.

N'Estaos Xuníos, les/os afroamericanos inda son calteníos como rehenes en zones de probeza. Les nueses families y comunidaes tán siendo desmantelaes pol complexu industrial de prisiones. Nueses/os neños tán siendo prindaos tolos díes pol viaductu de la escuela a la prisión. Miembros pervalibles de la nuesa comunidá tán siendo asesinaos con impunidá polos departamentos llocales de policía y los vixilantes. Tocantes al nuesu derechu al trabayu, les/os afroamericanos somos les/os últimos contrataos y les/os primeros despidíos, mientres siguimos suxetos a la discriminación racial nel sitiu de trabayu. En referencia a la Cuestión Nacional y la llucha pola lliberación prieta, les/os afroamericanos siguen atayaos y furiosos con sobrada razón. Como revolucionaries/os, tenemos que ser honestos con estes condiciones. Tenemos que deprender d'elles tantu como sía posible.

Reexaminando lo vieyo y lo nuevo 

Lo que la Cuestión Nacional oblíganos a faer como revolucionaries/os, ye siguir na busca de meyores práctiques y soluciones, non solo a los derechos de les/os trabayadores y a la esplotación del trabayu, sinón soluciones pa los distintos grupos que son primíos en diverses maneres pola supremacía blanca y pa les nacionalidaes que de cutiu son ignoraes y hasta escaecíes pol chovinismu blancu.

Como unu de los mayores catalizadores del pensamientu revolucionariu, Vladimir Lenin taba bien consciente d'esta opresión particular. Nun folletu del añu 1917 tituláu “Estadístiques y Socioloxía”, Lenin escribe: “N'Estaos Xuníos, los negros tendríen de ser clasificaos como una nación primida pola igualdá que se llogró mientres la guerra civil de 1861-1865 y que foi garantizada pola Constitución de la República …. nes árees principales de concentración prieta (el sur)”.

Esto foi nel 1917. L’área conocida como’l Cinturón Prietu del Sur, yera onde la mayoría de la población afroamericana moraba enantes de los dos foles migratories masives haza'l norte urbanu. Hasta nesi entós, Lenin atalantólo correchamente. La so percepción al empiezu del sieglu XX rápido reconoció que'l capitalismu, l'imperialismu y el colonialismu afectaren a les/os descendientes africanos d'una manera bien especial, sobremanera nel sur d'Estaos Xuníos.

Lenin referierse al sur d'Estaos Xuníos como “la zona más enllancada onde les mases tán sometíes a la mayor degradación y opresión… una especie de prisión na qu'estos negros desafiaos tán llendaos, aisllaos y privaos d'aire fresco”.

La reflexón de Lenin sobre la Cuestión Nacional, y más concretamente sobre la Cuestión Negra, taba a años lluz per delantre de los sos contemporaneos revolucionarios, polo que ye esactamente la razón por que les/os actuales combatientes pola llibertá tienen de volver a evaluar de nuevu esta crítica cuestión.

Mientres les/os afrodescendientes siguen siendo linchaos por xente como Michael Dunn y George Zimmerman, les/os revolucionarios tienen de siguir calteniéndose firmes sobre esta cuestión. Como foi señalao por Lenin bien articuladamente na so Tesis de 1920 sol títulu “Proyeutu de Tesis sobre la Cuestión Nacional y Colonial,” “Los partíos comunistes tienen d'esponer sistemáticamente esa constante violación a la igualdá de les naciones y a los derechos garantizaos a les minoríes nacionales, que va ser vistu en tolos países capitalistes, a pesar de les sos constituciones democrátiques … primeru xuniendo al proletariáu y depués a tola masa de la población trabayadora na llucha contra la burguesía , y segundu, que tolos partíos comunistes tienen d'emprestar ayuda directa a les naciones dependientes y desfavorecíes”.

Esteifoi un recordatoriu personal a toes/os los revolucionarios pa construyir y conectar viviegamente les nueses lluches. Como revolucionaries/os de güei, nun tenemos más remediu que ser firmes combatientes contra la detención y rexistru” (Stop-and-Frisk). Nun tenemos más remediu que ser firmes defensores en contra de la canalización d'estudiantes haza les prisiones (School-to-Prison Pipeline) y contra’l complexu industrial de prisiones. Estes son polítiques distintives y práctiques institucionalizaes que desproporcionadamente busquen primir a les/os afroamericanos.

“Driving While Black” (“remanando mientres se ye negra/u”, manera racista de detener a una persona pol so color) y el perfil racial son parte de la fibra del imperialismu. Como revolucionaries/os empónense polos principios leninistes, nun podemos despintar esta realidá y esperar que tou salga bien. Como revolucionaries/os socialistes, tenemos que reconocer el potencial qu’hai equí. Tenemos qu'abrazar la posibilidá de construyir un movimientu más fuerte sofitando la Cuestión Nacional, independientemente de la forma qu'adopte.

Al traviés de los güeyos del capitalismu, les/os trabayadores afroamericanos sufrieron enforma. Al ser les/os últimos contrataos y les/os primeros despidíos, les/os trabayadores prietos caltuviéronse col mínimu de paga; yá sía nel norte urbanu o nel sur rural, les/os trabayadores negros siguen siendo esplotaos nel mayor grau. El movimientu sindical non solo tien de ver esto; tien de falar fuertemente contra esa política racista y costantemente sofitar la resistencia.

Estes son les mesmes táctiques que la clase dominante utiliza intencionalmente p'aprovechase de les/os probes y el proletariáu, pa conquistar y estremar el nuesu movimientu de mases. Foi Vladimir Lenin sicasí, quien instruyó a les/os marxistes revolucionarios a ser críticos nel nuesu analís del racismu estructural ya institucionalizáu —de la sotileza del privilexu blancu y cómo ésti afecta a la clase obrera a nivel mundial. Como revolucionaries/os, tenemos el deber de sofitar la Cuestión Prieta, pa sofitar la lliberación total d’opresión y buscar el so amiestu.

Al igual que Lenin tuvo la perspectiva d'armar la revolución enantes de la so muerte fai 90 años, debemos güei siguir la obra de construyir un frente unificáu. La Cuestión Prieta nun ye solo una cuestión d'entender el nacionalismu de les/os oprimíos, nun importa la forma. Ye, sicasí, llanzanos haza la igualdá político y económico, haza la xusticia social y l'autonomía cultural, haza'l derechu a decidir el nuesu propiu destín. La llucha pola lliberación y l'autodeterminación nun ye solo una causa política, sinon una causa moral. Esti ye'l modelu que Lenin dexó al socialismu revolucionariu. La llibertá pa toes/os ta lloñe de ser un fechu, collacios. ¡Vamos trabayar!


martes, 15 de abril de 2014

Internacionalismu y política nacional



Testu escritu dende la cárcel por Antonio Gramsci, nel qu’afita la unidá dialéctica esistente ente lo nacional y lo internacional. Una bona amuesa escontra l’universalismu abstractu.


Internacionalismu y política nacional

Escritu (baxo la forma d'entrugues y rempuestes) por Giuseppe Bessarione [1] en setiembre de 1927 sobre dalgunos puntos esenciales de ciencia y arte político. El puntu que me paez necesario desarrollar ye'l siguiente: cómo según la filosofía de la praxis (na so manifestación política), tanto na formulación del so fundador como especialmente nes precisiones apurríes pol so teóricu más recién, la situación internacional tien de ser considerada nel so aspeutu nacional. En realidá, la rellación “nacional" ye la resultancia d'una combinación “orixinal" única (nun ciertu sentíu) que tien que ser atalantada y pensada nesta orixinalidá y especifidá si se quier apoderala y dirixila. 

Ye cierto que'l desarrollu cúmplese na direición del internacionalismu, pero'l puntu d’entamu ye "nacional" y ye d'equí d’onde ye preciso empicipiar. Pero la perspectiva ye internacional y nun puede menos que ser asina. Ye preciso polo tanto estudiar esautamente la combinación de fuercies nacionales que la clas internacional tendrá que dirixir y desarrollar según les perspeutives y direutives internacionales. La clas dirixente merez esi nome namái en cuantes interpreta esautamente esta combinación, de la qu'ella mesma ye un componente, lo que-y permite, en cuanto tal, dar al movimientu una cierta orientación escontra determinaes perspeutives. Y ye equí onde s’abelluguen, según la mio opinión, les diverxencies fundamentales ente León Davidovich [2] y Bessarione como intérprete del movimientu mayoritariu [3]. Les acusaciones de nacionalismu son ineptes si se refieren  al núcleu del problema.

Si s’estudia l'esfuerzu realizáu dende 1902 hasta 1917 polos mayoritarios [4], vese que la so orixinalidá consiste en depurar l'internacionalismu de tou elementu vagu y puramente ideolóxicu (en sentíu peyorativu) pa da-y un conteníu de política realista. El conceutu d'hexemonía ye aquel onde s’axunten les esixencies de calter nacional, y atalántase por qué determinaos enclinos nun falen de dichu conceutu o malapenes lu raspien. Una clase de calter internacional, na midida na que guía a capes sociales puramente nacionales (intelectuales) y davezu más que nacionales, particularistes y municipalistes (los llabradores), debe en ciertu sentíu "nacionalizase"; pero esti sentíu nun ye mui estrechu, yá que primero que se formen les condiciones pa una economía según un plan mundial, ye necesario pasar per delles fases onde les combinaciones rexonales (de grupos de naciones) pueden ser variaes. 

Per otra parte, ye preciso nun escaecer que'l desarrollu hestóricu sigue les lleis de la necesidá hasta que la iniciativa nun pasara netamente peles fuerces que tienden a la construcción, siguiendo un plan de división del trabayu basáu na paz y la solidaridá. Que los conceutos non-nacionales (esto ye, non referibles a nengún país en particular) son erróneos, demuéstrase amenorgándolos al absurdu.

Ellos llevaron a la pasividá y a la inercia en dos fases bien distintes: 

1) na primer fase, nengún creía que tuviera qu'empezar, esto ye, consideraba qu'empezando atoparíase aislláu; y na espera de que toos se movieren a comuña, nadie nun lo facía nin entamaba'l movimientu.

 2) la segunda fase ye quiciabes pior, yá que s'espera una forma de "napoleonismu" anacrónicu y antinatural (puesto que non toles fases hestóriques se repiten na mesma forma). Les debilidaes teóriques d'esta forma moderna del vieyu mecanicismu tán mazcaraes pola teoría xeneral de la revolución permanente que nun ye más qu'una previsión xenérica presentada como dogma y que se destrúi a sigo mesma al nun manifestase nos fechos.

1 Giuseppe Bessarione: Iosip Vissarionovitch, ye dicir, Stalin
2 León Davidovitch: ye dicir, Trotsky.
3 El bolchevismu.
4 Los bolcheviques

martes, 8 de abril de 2014

L'arguyu nacional de los rusos

 Torna d'un testu de Lenin, espublizáu'l 12 d'avientu de 1914.


L'arguyu nacional de los rusos


¡Cuántu falen, alderiquen y glayen anguaño alrodiu la nación y la patria! Los ministros lliberales y radicales d'Inglaterra, un cientu de publicistes “avanzaos” de Francia (que tán dafechu d’alcuerdu colos publicistes de la reaición), un ensame d’escritores oficiales, demócrates constitucionalistes y progresistes (incluyíos dalgunos populistes y “marxistes”) de Rusia, toos emponderen de milenta maneres “la llibertá y la independencia de la patria”, el grandor del principiu d'independencia nacional. 

Ye imposible estremar ónde fina’l combayar del verdugu Nicolás Románov y de los  torturadores de negros y d’habitantes de la India,  y ónde principia'l pequeñu burgués  que sigue “la corriente” por fatura o falta de caráuter.  Pero nin siquier importa estremalo.  Atopámosnos ante una corriente ideolóxica bien amplia y bien fonda cuyos raigaños tan xuncíos colos intereses de los señores terratenientes y capitalistes de les naciones dominantes. Decenes y cientos de millones son gastaos cada añu na propaganda de les idees que convienen  a eses clases: el molín ye grande y recibe  agua de toes partes, empicipiando pol convencíu chovinista Ménshikov y finando polos  chovinistes que lo son por oportunismu o por falta de caráuter  (Plejánov y Máslov, Rubanóvich y Smirnov, Kropotkin  y Búrtsev).  

Probemos tamién nós, los socialdemócrates rusos, a definir la nuesa posición ante esta corriente ideolóxica. Taría mal que nós, representantes  d'una nación dominante del estremu Este d'Europa y d’una bona parte d'Asia, escaeciéramos la bayurosa importancia del problema nacional -sobremanera nun país al que con razón se denoma “cárcel de pueblos”-  nun períodu en que, precisamente nel  estremu este d'Europa y n'Asia, el capitalismu ta espertando a la vida y  a la conciencia toa una serie de naciones  “nueves”, grandes y pequeñes; nun  momentu en que la monarquía zarista irguió na guerra a millones de rusos y foriatos pa “iguar” una filera de problemes nacionales  conforme a los intereses del Conseyu de la Nobleza Unificao y de los Guchkov, los Krestóvnikov, los  Dolgorúkov, los Kútler y los Ródichev. 

 ¿Ye ayenu a nós, proletarios conscientes  rusos, el sentimientu d'arguyu nacional? ¡Pues claro que non!  Amamos la nuesa llingua y la nuesa patria, ponemos tol nuesu enfotu en que les sos mases trabayadores (esto ye, les nueve décimes partes de la so población) algamen una vida consciente de demócrates  y socialistes. Nada nos duel tantu como ver y sentir les violencies, la opresión y l'escarniu al que los verdugos zaristes, los aristócrates y los capitalistes somorguien a la nuesa prestosa patria. Sentinos arguyosos de qu'eses violencies promovieren resistencia nel nuesu mediu, ente los rusos, de que d'esi mediu saliera un Radíschev, salieren  los avientistes y los revolucionarios del estáu llanu de los años 70, de que la clase obrera rusa formara en 1905 un poderosu partíu revolucionariu de mases,  de qu'el mujik rusu entamara a convertise, coles mesmes, nun  demócrata y emburriare al pope y al terrateniente.

Remembramos que'l demócrata rusu Chernyshevski, al perafitar la so vida a la causa de la revolución,  dixo va mediu sieglu: “Mísera nación d'esclavos, toos  esclavos de riba a baxo” A los  rusos, esclavos manifiestos o tapaos (esclavos al respeutive de la monarquía zarista), nun-yos presta remembrar estes pallabres. Al nuesu xuiciu, sicasí,  son pallabres de verdaderu amor a la patria, de señardá pola falta d'espíritu revolucionariu na masa de la población rusa. 

Entós nun lu había.  Anguaño, anque non muncho, yá hai. Invádenos el sentimientu d'arguyu nacional porque la nación rusa creó tamién  una clase revolucionaria, amosó  tamién que ye capaz de dar a la humanidá exemplos de llucha pola llibertá y pol socialismu, y non yá tarrecibles pogromos, fileres de patíbulos, cuartones, fames tarrecibles y un terrible servilismu ante los popes, los zares, los terratenientes y los capitalistes.  

Invádenos el sentimientu d'arguyu nacional, y precisamente  por eso odiamos enforma’l nuesu pasáu d'esclavos (citando los terratenientes aristócrates llevaben a la guerra a los mujiks pa esgañar la llibertá d'Hungría, Polonia, Persia y China)  y el nuesu presente d'esclavos, cuando los  mesmos terratenientes, aidaos polos capitalistes, llévennos  a la guerra pa esgañar a Polonia y Ucrania, p'afogar el movimientu democráticu en Persia y China, p'afitar a la banda de los  Románov, Bóbrinski y Purishkévich, que constitúin  una mancadura pa la nuesa dignidá nacional de rusos.  Nadie nun tien la culpa de ñacer esclavu; pero l'esclavu que refuga aspirar a la so propia llibertá y, enrriba, xustifica y enguapez la so esclavitú (llamando, por casu, a la estrangulación de Polonia, Ucrania, etc., “defensa de la patria” de los rusos), asemeyáu esclavu ye un miserable llacayu qu'espierta un  sentimientu llexítimu d'indignación, de despreciu y  de refugu.  

“El pueblu qu’ oprime a otros pueblos nun puede ser llibre”, dicíen los más grandes representantes  de la democracia consecuente del sieglu XIX, Marx y Engels, qu’aportaron  a  maestros del proletariáu revolucionariu. Y nós, obreros  rusos, trescalaos del sentimientu d'arguyu nacional, queremos de toes toes una Rusia llibre ya  independiente, autónoma, democrática, republicana, arguyosa, que base les  sos relaciones colos vecinos  nel  principiu humanu de la igualdá, y non nel  principiu feudal de los privilexos, humildante pa una gran  nación. Precisamente porque querémosla asina, dicimos: na Europa del sieglu XX (anque sía nel estremu Este d'Europa) nun puede defendese “la patria” otra manera que lluchando por tolos medios revolucionarios contra la monarquía, los  terratenientes y los capitalistes de la mesma  patria, esto ye,  contra los  piores enemigos de la nuesa patria;  los rusos nun pueden “defender la patria” otra manera  que deseyando, en cualquier guerra, la derrota del  zarismu, como mal menor pa les nueve décimes  partes de la población de Rusia, pues el zarismu non yá prime nel terrén económicu y políticu a estes  nueve décimes partes de la población, sinón que les  desmoraliza, humilda, deshonra y prostitúi, avezándoles  a oprimir a otros pueblos, acostumándolos  a tapecer el so dañu con frases hipócrites de seudopatriotismu.  

Va oxetásenos, quiciabes, qu’ aparte del zarismu y sol  so amparu, surdió y fortalecióse yá otra fuerza histórica, el capitalismu rusu, que realiza un  llabor progresivu, centralizando no económico y xuniendo nun too peramplies rexones. Pero esta oxeción nun xustifica, sinon qu'acusa con mayor enerxía entá a los nuesos socialistes chovinistes, a los  que tendría de llamase socialistes del zar y de Purishkóvich  (como Marx llamó a los lassalleanos  socialistes del rei de Prusia).

 Supongamos, inclusive, que la hestoria decide la cuestión  a favor del capitalismu rusu de nación grande y opresora en  contra de cientu y una pequenes naciones. Esto nun ye imposible, pues tola hestoria del capital ye una hestoria de violencia y saquéu, de sangre y muerte.  Nós de nenguna manera somos partidarios  incondicionales de naciones indefectiblemente  pequeñes;  n'igualdá d'otres condiciones, tamos  absolutamente en pro de la centralización y en contra del  ideal pequeñuburgués de les rellaciones federatives. Pero inclusive n'asemeyáu casu, primero, nun ye cosa nuesa,  nun ye cosa de demócrates (ensin  falar yá de socialistes) ayudar a los Románov- Bóbrinski-Purishkévich a esgañar a Ucrania, etc .  Bismarck realizó a la so manera, a lo junker, un llabor históricu progresista, pero ¡menudu “marxista” sedría'l  que, por esta razón, pensara xustificar el sofitu socialista a Bismarck! Amás, Bismarck ayudaba al desarrollu económicu unificando a los alemanes esvalixaos, que yeren primíos por otros pueblos. Sicasí, la prosperidá económica y el rápidu desarrollu de Rusia esixen  que se llibre al país de la violencia qu'exercen los rusos sobre otros pueblos.  Y esta diferencia escaécenla los nuesos almiradores de los  casi Bismarck rusos xenuinos. 

Segundu, si la hestoria decide la cuestión a favor  del capitalismu rusu de gran nación dominante, d'ello deduzse que va ser  tantu mayor el papel socialista del proletariáu rusu como impulsor  principal de la revolución comunista, aniciada pol capitalismu. Pero la revolución del proletariáu rique una llarga educación de los obreros nel  espíritu de la más  completa igualdá y fraternidá  nacionales. Por tanto, dende'l puntu de vista de los intereses precisamente del proletariáu rusu ye imprescindible una enllargada educación  de les  mases nel sentíu de defender de la manera más  enérxica, consecuente, enfotada y revolucionaria la completa igualdá de derechos  y el derechu a l'autodeterminación  de toles naciones oprimíes  polos rusos. 

L'interés del arguyu nacional (non entendíu servilmente) de los rusos coincide col interés socialista de los proletarios rusos (y de tolos  demás proletarios). El nuesu modelu va siguir  siendo Marx, quien, dempués de vivir dellos decenios n'Inglaterra, fíxose mediu inglés y esixía la llibertá y  la independencia nacionales d'Irlanda en beneficiu  del movimientu socialista de los obreros ingleses.  Sicasí, los nuesos chovinistes socialistes patrios, como Plejánov, etc., etc., nel postreru ya hipotéticu  casu que consideremos, van resultar  traidores non yá a la so patria, a la Rusia llibre y democrática, sinón  tamién a la fraternidá proletaria de tolos  pueblos de Rusia, esto ye, a la causa del socialismu.