martes, 22 de octubre de 2013

Un “déjà vu” fechu n’Asturies




Nesta nueva edición d’Iniciativa pol Asturianu nes Ondes falen cola má d’un rapaz al que-y ponen milenta torgues pa estudiar llingua asturiana nel colexu Auseva, d’Uviéu. Encamiéntovos a sentilo, y a qu’escuchéis lo que diz la má alrodiu les reaiciones del so fíu pa cola situación que vive.

Sentíilo, y que daquién depués, si tien valor, diga que n’Asturies hai llibertá llingüística, que nun se torga la enseñanza de la llingua asturiana nes escueles, que nun se castellaniza a los neños y neñes, que nun hai aculturización nin opresión llingüística nenguna. Ye vergoñoso y permurnio, pero per desgracia ye’l cantar de tolos años. Dende Iniciativa, la Xunta Pola Defensa de la Llingua, Xuristes pol Asturianu y tantos otros coleutivos lleven años denunciando la bayura de casos nos que se-yos niega a los y les escolines l’estudiu de la llingua, pola aición direuta de los centros educativos y de la Conseyería, y equí nun pasa nada.

Lo pior de too ye que nun tamos falando d’escolarización n’asturianu, de que la nuesa llingua seya vehicular na enseñanza nin nengún maximalismu d’esi calter: ye dalgo tan básico como dar una puxarra d’asignatura en cuantes al númberu d’hores selmanales, y qu’amás ye optativa, compitiendo con llingües foriates y asignatures d’otres temátiques, seguramente más atractives a los güeyos de munchos pás y más que vean la llingua asturiana dende la perspeutiva de desprestixu ya inutilidá que promueve’l poder políticu y económicu.

En fin, ye mui murnio, y ún nun puede evitar indignase muncho con esti tipu de coses. Porque lleva pasando demasiaos años, y porque ye urxente que, d’una vez, tanto les estayes identitaries y culturales, como’l restu, algamen el respetu y la dignidá. Pero eso namái vamos a conquistalo cuando seyamos respetaos y dignos como pueblu.

sábado, 12 de octubre de 2013

El votu o la bala



 Intervención de Malcolm X el 3 d’Abril de 1964, nun conceyu local del Congresu pola Igualdá Racial (“CORE” nes sigles orixinales) en Cleveland (Ohio).  
 
"El votu o la bala"

Señor moderador, hermanu Lomax, hermanos y hermanes, collacios y enemigos -porque cenciellamente nun puedo creer qu'equí toos sían amigos y nun quiero omitir a naide-. Esta nueche la tema ye, al mio entender, “La revuelta negra” y “¿ Qué posición tomamos d'equí  p'arriba?” o “¿ Qué faer?” A la mio humilde manera d'entendelo les alternatives son o'l votu o la bala. 

Enantes de tratar de desplicar lo que quier dicir eso del votu o la bala, quixera esclariar daqué alrodiu de mio mesmu. Inda soi musulmán, la mio relixón sigue siendo l'Islam. Esa ye la mio creencia personal. Igual qu’Adam Claytom Powell ye un pastor cristianu; y que'l doctor Martin Luther King ye un pastor cristianu n’Atlanta, Xeorxa; bonu, pos yo tamién soi pregueru, non pregueru cristianu, sinon pastor musulmán, y creo n’aición de tolos frentes y por tolos medios que seyan necesarios.

Pero anque sigo siendo musulmán nun vine equí esta nueche pa falar sobre la mio relixón. Nun vine p'aldericar nin apostar sobre nenguna de les coses sobre les que diferimos, porque yá ye hora de superar les nueses diferencies y danos cuenta de que ye meyor pa nós ver primero  que tenemos el mesmu problema, un problema común que te fai vivir nun infiernu lo mesmo si yes bautista, que si yes metodista, o musulmán, o nacionalista.

Agora bien, que falemos asina nun quier dicir que temos a la escontra del blancu, pero sí quier dicir que tamos a la escontra de la esplotación, que tamos a la escontra  de la degradación, que tamos a la escontra de la opresión. Y si’l blancu nun quier que seyamos antiblancos, que dexe d’opriminos y d'esplotanos y degradanos.

Nun soi políticu, nin siquier soi estudiosu de la política; en realidá nun soi estudiosu de nada. Nun soi demócrata, nun soi republicanu, y nin siquier me considero norteamericanu. Si tú y yo fuéramos norteamericanos nun habría problema.  Esos europeos qu'acaben de baxase del barcu yá son norteamericanos;  los polacos yá son norteamericanos;  los refuxaos italianos yá son norteamericanos. Tol que venga d'Europa, tol que tenga güeyos azules, yá ye norteamericanu. Y con tol tiempu que llevamos equí, tú y yo inda nun somos norteamericanos.

Non, yo nun soi norteamericanu, soi ún de los 22 millones de prietos víctimes del norteamericanismu. Ún de los 22 millones de negros que son víctimes de la democracia, que nun ye más qu'hipocresía amazcarada. Yo falo como víctima d'esti sistema norteamericanu, y güeyo a los Estaos Xuníos colos güeyos de la víctima. Nun veo nengún suañu norteamericanu; veo una velea norteamericana.

Foi'l votu del prietu'l qu'instaló a la nueva alministración en Washington. El to votu neciu, el to votu inorante, el to votu esbardiáu foi'l qu'instaló en Washington una alministración qu’emburrió toa clase de lleis inimaxinables, dexándote'l postreru, y qu’enrriba de too torga l'aprobación de la llei de derechos civiles. Y los tos líderes y los de mio tienen el valor d'andar aplaudiendo perhí y falando de cuánto tamos progresando, y falando de qué bon presidente tenemos.

De manera que yá ye hora d'esconsonar en 1964. Y cuando los veas salir con esa clase de conspiraciones, fai-yos saber que tienes los güeyos abiertos. Y fai-yos saber qu'hai otra cosa que tamién ta abierta... Y si non... tendríes de tornar al plantíu algodoneru, tendríes de volver a escondete nel caleyón. Ellos reciben tolos votos de los prietos y, depués de recibilos, el prietu nun recibe nada a cambiu. Lo único que fixeron al llegar a Washington foi da-yos bonos emplegos a unos cuantos prietos importantes. Esos prietos importantes nun precisen bonos emplegos, yá teníen trabayu. Eso ye un camuflaxe, ye un trucu, ye una traición, un teatru.

El Tíu Sam tien les manes empapaes de sangre, empapaes nel sangre de los prietos d'esti país. Ye l'hipócrita númberu ún d'esti mundu.

Entós digo qu’al predicar el nacionalismu prietu nun proponemos faer que'l prietu revalorice al blancu, sinon que'l prietu se revalorice a sigo mesmu. Nun faigas camudar d'idegues al blancu; nun ye posible faer que camude d'idees, y tou esi asuntu d’acudir a la concencia moral d'Estaos Xuníos... La conciencia d'Estaos Xuníos ta en quiebra. Fai enforma, enforma tiempu que perdió toa concencia. El Tíu Sam nun tien concencia. Ellos nun saben lo que ye moral. Nun trataron d'esaniciar el mal porque seya un mal nin porque seya illegal nin tampoco porque seya inmoral; esaniciáronlo namái cuando amenazaba la so esistencia. De manera que tas perdiendo'l tiempu si acudes a la concencia d'un home que ta en bancarrota moral como'l Tíu Sam.