Equí apurro la torna a la nuesa llingua d'esti céllebre testu d'Albert Einstein -el paisanu esi tan llistu- del añu 1949. Que-vos preste.
¿Debe quien nun ye
espertu en cuestiones económiques y sociales opinar sobre'l socialismu? Por una
serie de razones camiento que sí.
Déxesemos primero
considerar la cuestión dende'l puntu de vista de la conocencia científica.
Puede paecer que nun hai diferencies metodolóxiques esenciales ente
l'astronomía y le economía: los científicos en dambos campos procuren afayar
lleis d’aceptabilidá xeneral pa un grupu circunscritu de fenómenos, pa xuncir estos
fenómenos tan nidio como seya posible. Pero en realidá estes diferencies
metodolóxiques esisten. El descubrimientu de lleis xenerales nel campu de la
economía ye difícil, porque la observación de fenómenos económicos ta afeutada
por munchos factores que son difícilmente evaluables por separtao. Amás, la
esperiencia que s'atropó dende'l principiu del llamáu periodu civilizáu de la
hestoria humana -como ye bien sabío- foi influyida y llendada enforma por
causes que nun son de nenguna manera puramente económiques nel so orixe. Por
casu, la mayoría de los grandes estaos de la hestoria debieron la so esistencia
a la conquista. Los pueblos conquistadores afitáronse, llegal y económicamente,
como la clase privilexada del país conquistáu. Aseguraron pa sigo mesmo’l
monopoliu de la propiedá de la tierra y escoyeron un sacerdociu d'ente les sos
propies files. Los sacerdotes, col control de la educación, fixeron de la
división de la sociedá en clases una institución permanente y crearon un
sistema de valores pol cual la xente taba a partir d'entós, en gran midida de
forma inconsciente, dirixida nel so comportamientu social.
Pero la tradición
hestórica ye, como se diz, d'ayeri; enxamás
superemos realmente lo que Thorstein Veblen llamó "la fase
depredadora" del desarrollu humanu. Los fechos económicos güeyables
pertenecen a esa fase ya inclusive les lleis que podemos derivar d'ellos nun
son aplicables a otres fases. Afitao que’l verdaderu propósitu del socialismu
ye precisamente superar y avanzar más alló de la fase depredadora del desarrollu
humanu, la ciencia económica nel so estáu actual puede apurrir poca lluz sobre
la sociedá socialista del futuru.
De segundes, el
socialismu ta empobináu haza un fin éticu-social. La ciencia, sicasí, nun puede
afitar fines ya, inclusive menos, inculcalos nos seres humanos; la ciencia
puede apurrir los medios colos que llograr ciertos fines. Pero los fines por sigo
mesmos son concebíos por persones con altos ideales éticos y -si estos fines
nun son sonces, sinón vitales y brengosos- son adoptaos y llevaos alantre por
munchos seres humanos quienes, de forma semi-inconsciente, determinen la
evolución sele de la sociedá.
Por estes razones,
nun debemos sobrestimar la ciencia y los métodos científicos cuando se trata de
problemes humanos; y nun tenemos d'asumir que los espertos son los únicos que
tienen derechu a espresase nes cuestiones qu'afeuten a la organización de la
sociedá. Munches voces afirmaron dende va tiempu que la sociedá humana ta
pasando por una crisis, que la so estabilidá foi gravemente estropiada. Ye
carauterístico de tal situación que los individuos siéntense indiferentes o
inclusive contrarios escontra'l grupu, pequeñu o grande, al que pertenecen.
Como ilustración, déxenme recordar equí una esperiencia personal. Alderiqué apocayá
con un home intelixente y bien dimpuestu l'amenaza d'otra guerra, qu'al mio
pensar pondría en peligru seriamente la esistencia de la humanidá, y sorrayé
que namái una organización supranacional ufiertaría proteición frente a esi
peligru. Frente a eso'l mio visitante, bien tranquilu, díxome: "¿por qué s’opón
usté tan fondamente a la desapaición de la raza humana?"
Toi seguru que va
namái un sieglu nadie nun fadría tan llixeramente una declaración d'esta clase.
Ye la declaración d'un home que s'esforció en balde en llograr un equilibriu
interior y que tien más o menos perdida la esperanza de consiguilo. Ye la
espresión de la soledá doliosa y del aisllamientu que muncha xente ta sufriendo
anguaño. ¿Cuál ye la causa? ¿Hai una salida?
Ye fácil plantegar
estes entrugues, pero difícil contestales con seguridá. Tengo d’intentalo, sicasí, lo meyor que pueda, anque
soi bien consciente del fechu de que los nuesos sentimientos y esfuerzos son
contradictorios y foscos y que nun pueden espresase en fórmules fáciles y
simples.
L'home ye, al
empar, un ser solitariu y un ser social. Como ser solitariu, procura protexer
la so propia esistencia y la de los que tean más averaos a él, pa satisfaer los
sos deseos personales, y pa desenvolver les sos capacidaes naturales. Como ser
social, intenta ganar la reconocencia y el ciñu de los sos compañeros humanos,
pa compartir los sos placeres, pa confortalos nos sos dolores, y p'ameyorar les
sos condiciones de vida. Namái la esistencia d'estos distintos, y davezu
contradictorios oxetivos pol calter especial del home, y la so combinación
específica determina'l grau col cual un individuu puede algamar un equilibriu
internu y puede contribuyir al bientar de la sociedá. Ye bien posible que la
fuerza rellativo d'estes dos pulsiones tea, no fundamental, afitada
hereditariamente.
Pero la personalidá que finalmente remanez ta determinada en
gran parte pol ambiente nel cual un home s’atopa mientres el so desarrollu,
pola estructura de la sociedá na que medra, pola tradición d'esa sociedá, y pola
so valoración de los tipos particulares de comportamientu. El conceutu astractu
"sociedá" significa pal ser humanu individual la suma total de les
sos rellaciones direutes ya indireutes colos sos contemporáneos y con toles
persones de xeneraciones anteriores. L'individuu puede pensar, sentise,
esforciase, y trabayar por sigo mesmu; pero él depende tantu de la sociedá -na
so esistencia física, intelectual, y emocional- que ye imposible concebilo, o
entendelo, fora del marcu de la sociedá. Ye “la sociedá" la qu'apurre al
home alimentu, llar, ferramientes de trabayu, llinguaxe, formes de pensamientu,
y la mayoría del conteníu del so pensamientu; la so vida ye posible pol trabayu
y les realizaciones de los munchos millones nel pasáu y nel presente que se despinten
detrás de la pallabrina "sociedá".
Rescampla, poro,
que la dependencia del individuu de la sociedá ye un fechu que nun puede ser
suprimíu, esautamente como nel casu de les formigues y de les abeyes. Sicasí,
ente que la vida de les formigues y de les abeyes ta afitada con rixidez nel
más pequeñu detalle, los instintos hereditarios, el patrón social y les correllaciones
de los seres humanos son bien susceptibles de cambéu. La memoria, la capacidá
de faer combinaciones, el regalu de la comunicación oral fixo posible progresos
ente los seres humanos que son dictaos por necesidaes biolóxiques. Tales
progresos manifiéstense en tradiciones, instituciones, y organizaciones; na
lliteratura; nes realizaciones científiques ya inxenieriles; nes obres d'arte.
Esto desplica que, per un sitiu, l'home puede influyir na so vida y que puede
xugar un papel nesti procesu'l pensamientu consciente y los deseos.
L'home algama na
nacencia, de forma hereditaria, una constitución biolóxica que tenemos de
considerar fixa ya inalterable, incluyendo los impulsos naturales que son carauterísticos
de la especie humana. Amás, mientres la so vida, atropa una constitución
cultural qu'adopta de la sociedá cola comunicación y al traviés de munches
otres clases d'influencia. Ye esta constitución cultural la que, col pasu del
tiempu, puede camudar y la que determina nun grau bien importante la rellación
ente l'individuu y la sociedá como l'antropoloxía moderno enseñónos, cola
investigación comparativa de les llamaes cultures primitives, que'l
comportamientu social de seres humanos puede estremase fonderamente,
dependiendo de patrones culturales que prevalecen y de los tipos d'organización
que predominen na sociedá. Ye nesto no que los que se tán esforciando
n'ameyorar la suerte del home pueden basar les sos esperances: los seres
humanos nun tán condergaos, pola so constitución biolóxica, a aniquilase o a
tar a la mercé d'un destín cruel, apurríu por ellos mesmos.
Si entrugamos cómo
la estructura de la sociedá y de l'actitú cultural del home tienen de ser
camudaes pa faer la vida humana tan prestosa como seya posible, tenemos de ser
costantemente conscientes del fechu de qu'hai ciertes condiciones que nun
podemos modificar. Como dixi enantes, la ñatura biolóxico del home ye, pa tolos
efeutos práuticos, inmodificable. Amás, los progresos tecnolóxicu y demográficu
de los últimos sieglos crearon condiciones que tán equí pa quedase. En
poblaciones rellativamente trupes asitiaes con bienes que son imprescindibles
pa la so esistencia siguida, una división del trabayu estremá y un aparatu
altamente granible son absolutamente necesarios. Los tiempos -que, güeyando
p’atrás, paecen tan idílicos- nos qu'individuos o grupos rellativamente
pequenos podíen ser totalmente autosuficientes marcharon pa siempres. Ye namái dalgo
desaxerao dicir que la humanidá anguaño constitúi inclusive una comunidá planetaria
de producción y consumu.
Agora algamé'l
puntu onde puedo indicar de volao lo que pa mi constitúi la esencia de la crisis
del nuesu tiempu. Refiérome a la rellación del individuu cola sociedá.
L'individuu ye más consciente que nunca de la so dependencia de la sociedá.
Pero él nun ve la dependencia como un fechu positivu, como un llazu orgánicu,
como una fuerza protectora, sinon como daqué qu'amenacia los sos derechos
naturales, o inclusive la so esistencia económica. Per otra parte, la so
posición na sociedá ye tal que les sos pulsiones egoístes tán acentuándose pali
que pali, ente que les sos pulsiones sociales, que son por naturaleza más
débiles, deteriórense progresivamente. Tolos seres humanos, sía'l que quier la
so posición na sociedá, tán sufriendo esti procesu de deterioru. Los presos a
sabiendes del so propiu egoísmu, siéntense inseguros, solos, y privaos del
esfrute inocente, simple, y cenciellu de la vida. L'home namái puede atopar
sentíu a la so vida, curtia y venturera como ye, dedicándose a la sociedá.
L'anarquía económica
de la sociedá capitalista tal como esiste güei ye, al mio pensar, la verdadera
fonte del mal. Vemos ante nós a una comunidá enorme de productores que se tán
esforciando ensin posa quitándose de los frutos del so trabayu colectivu -non
pola fuerza, sinón polo xeneral en conformidá fiel con riegles llegalmente
establecíes. A esti respectu, ye importante señalar que los medios de
producción -esto ye, la capacidá granible entera que ye necesaria pa producir
bienes de consumu tantu como capital adicional- pue llegalmente ser, y na so
mayor parte ye, propiedá privao de particulares.
A la gueta de la
simplicidá, nel discutiniu que sigue voi llamar "trabayadores" a
tolos que nun compartan la propiedá de los medios de producción -anque esto nun
correspuenda al usu avezáu del términu-. Los propietarios de los medios de
producción tán en posición de mercar la fuercia de trabayu del trabayador.
Usando los medios de producción, el trabayador produz nuevos bienes que se tornen
en propiedá del capitalista. El puntu esencial nesti procesu ye la rellación
ente lo que produz el trabayador y lo que-y ye pago, dambos midíos en valor
real. En cuantes que’l contratu de trabayu ye "llibre", lo que'l
trabayador recibe ta determinao non pol valor real de los bienes que produz,
sinón poles sos necesidaes mínimes y pola demanda de los capitalistes de fuercia
de trabayu en relación col númberu de trabayadores compitiendo por trabayar. Ye
importante atalantar qu'inclusive en teoría'l salariu del trabayador nun ta
determináu pol valor del so productu.
El capital privao
tiende a concentrase en poques manes, en parte por cuenta de la competencia
ente los capitalistes, y en parte porque'l desarrollu tecnolóxicu y l'aumentu
de la división del trabayu animen la formación d'unidaes de producción más grandes
por cuenta de les más pequeñes. La resultancia d'esti procesu ye una oligarquía
del capital privao cuyu bayurosu poder nun puede controlase con eficacia
incluso nuna sociedá organizada políticamente de forma democrática. Esto ye
asina porque los miembros de los cuerpos llexislativos son escoyíos polos
partíos políticos, financiaos en gran parte o influyíos d'otra manera polos
capitalistes privaos quienes, pa tolos propósitos práuticos, dixebren al eleutoráu
de la llexislatura. La consecuencia ye que los representantes del pueblu de
fechu nun protexen abondo los intereses de los grupos ensin privilexar de la
población. Per otra parte, so les condiciones esistentes, los capitalistes
privaos inevitablemente controlen, directamente o indirectamente, les fontes
principales d'información (prensa, radio, educación). Ye asina desaxeradamente
difícil, y de fechu na mayoría de los casos imposible dafechu, pal ciudadanu
individual llograr conclusiones oxetives y faer un usu intelixente de los sos
derechos políticos.
La situación que domina
nuna economía basada na propiedá privao del capital ta asina carauterizada no
principal: primero, los medios de la producción (capital) son calteníos de
forma privada y los propietarios disponen d'ellos como lo consideren oportuno;
de segundes, el contratu de trabayu ye llibre. De xacíu, nun esiste una sociedá
capitalista pura nesti sentíu. En particular, tien de notase que los
trabayadores, al traviés de lluches polítiques llargues y amargues, tuvieron
ésitu n'asegurar una forma daqué ameyorada de "contratu de trabayu
llibre" pa ciertes categoríes de trabayadores. Pero tomada nel so
conxuntu, la economía actual nun s'estrema enforma de “capitalismu puru".
La producción ta empobinada al beneficiu, non al usu. Nun ta garantizao que
tolos que tienen capacidá y quieran trabayar puedan atopar empléu; esiste casi
siempres un “exércitu de paraos". El trabayador ta costantemente apavoriáu
con perder el so trabayu. Desque paraos y trabayadores mal pagos nun apurren un
mercáu rentable, la producción de los bienes de consumu ta acutada, y la
consecuencia ye una gran privación. El progresu tecnolóxicu produz davezu más
desempléu en cuenta de facilitar la carga del trabayu pa toos. La motivación
del beneficiu, conxuntamente cola competencia ente capitalistes, ye responsable
d'una inestabilidá na acumuladura y nel usu del capital que conduz a
depresiones cada vegada más severes. La competencia illimitada conduz a un
bagazu enorme de trabayu, y a esi retayu de la conciencia social de los individuos
que menté enantes.
Considero esta mutilación
de los individuos el pior mal del capitalismu. El nuesu sistema educativu
enteru sufre d'esti mal. Llántase una actitú competitiva esaxerada al
estudiante, que ye entrenáu p'adorar l'ésitu codiciosu como preparación pa la
so carrera futura.
Toi convencíu de
qu'hai namái un camín pa esaniciar estos graves males, l'establecimientu d'una
economía socialista, acompañáu por un sistema educativu empobináu haza metes
sociales. Nuna economía asina, los medios de producción son de la sociedá y
utilizaos de forma planificao. Una economía planificada qu'axuste la producción
a les necesidaes de la comunidá, distribuyiría'l trabayu a realizar ente tolos
capacitaos pa trabayar y garantizaría un sustentu a cada home, muyer, y neñu.
La educación del individuu, amás de promover les sos propies capacidaes naturales,
procuraría desarrollar nél un sentíu de la responsabilidá pa los sos
compañeros-homes en llugar de la glorificación del poder y del ésitu que se da
na nuesa sociedá anguaño.
Sicasí, ye
necesario recordar qu'una economía planificada nun ye entá socialismu. Una
economía planificada pue tar acompañada de la completa esclavitú del individuu.
La realización del socialismu rique solucionar dellos problemes sociopolíticos
desaxeradamente difíciles: ¿cómo ye posible, con una gran centralización del
poder políticu y económicu, evitar que la burocracia aporte a toupoderosa y
sobeyosa? ¿Cómo pueden tar protexíos los derechos del individuu y cómo asegurar
un contrapesu democráticu al poder de la burocracia?
