Nun hai qu'escaecer a Libia

Va poco más d’un añu taba de plena vixencia y actualidá nos medios la “intervención humanitaria” –ye dicir, la invasión militar- de Libia, que daba los sos caberos aliendos tres la cayida de los bastiones afines a la Yamahiriya, gracies a la indispensable actuación de l’aviación de la OTAN, xunto a fuercies especiales terrestres de países como Catar, que prestaron collaboración colos denomaos “rebeldes” que güei tienen el poder formal nesi estáu.

Sicasí, atopámonos con que nada ameyoró, al contrariu. La represión y les tortures son el pan nuesu de cada día, con constantes denuncies d’organismos como Amnistía Internacional o Médicos Ensin Fronteres. La llibertá, dalgo inda más llonxano de consiguir que baxo l’anterior sistema, con un estáu controláu poles facciones “rebeldes” convertíes en cierta manera nel verdaderu poder a pie de cai, un poder que, como ye previsible, actúa con autoritarismu y crueldá, encubierto too ello pola impunidá llegal.

Hai qu’amestar tamién otru elementu, y ye que nel actual panorama d’un supuestu nuevu sistema/ orde / poder que se supón que ta en construcción, pero que nun pasó entá de los cimientos, la ciudadanía ta nuna situación de desamparu propia d’un estáu fallíu. Perdieron les numberoses ayudes sociales de les qu’esfrutaben, aquella educación de baldre y de calidá desapaeció na práutica, y la inseguridá y l’amenaza de tortures o detenciones arbitraries son la constante qu’apavoria a aquelles tribus o territorios que foron favoratibles a la Yamahiriya.

En resume y definitiva, quien pensara que cola intervención de la OTAN y l’asesinatu rastreru del anterior xefe d’estáu diba a florecer en Libia una democracia al estilu lliberal/ burgués européu coles sos “llibertaes” y “beneficios” -que, por ciertu, en munchos casos yeren inferiores a los que teníen los libios y libies cola Yamahiriya-, tuvo que salir yá del so erru y ver la realidá, qu’esti tingláu sólo beneficia a les multinacionales petroleres que progresivamente foron ocupando los yacimientos petrolíferos qu’enantes  yeren propiedá del estáu, y con cuyos beneficios se costeaben les polítiques sociales.

Yá lo dicía va tiempu, por muncho que mos fadiara la figura de Gaddafi, nel conflictu cola OTAN representaba la soberanía y el bientar algamáu pol país con meyor nivel de vida d’África. ¿Qu’había corrupción, o falta de llibertá d’espresión? Claro, de xuru, en tolos sistemes pasa, y nún nel qu’heba una figura personalista inda más. Hai que combatilo y acabar con ello siempre que se puea, el réxime llibiu impuestu por Gaddafi yera fonderamente imperfeutu, pero nun se puede negar que col cambeu, esistió una regresión dafechu pal pueblu libium, que salió perdiendo.

Pues bien, pesie a too ello, y pesie al silenciu mediáticu d’unos mass-media que s’escaecieron d’esi país una vegada que los sos amos algamaron los oxetivos, la realidá ye qu’en Libia nun hai paz, hai resistencia, y hai terrorismu viniente de parte de los nuevos “amos del estáu”, un estáu que,  como tamos viendo, entra dientru de la definiciónd ‘estáu fallíu, nun ye capaz de proporcionar a la ciudadanía un mínimu de derechos, seguridá, llibertá, etc.

Vamos facer un repasu a un día cualquiera en Libia, nesti casu, un 14/08/2012, nel que podemos atopar los siguientes sucesos:

En Trípoli españa una bomba cerca l’hotel Arbea Fousoil. Son varios los coches bomba españaos pola resistencia nes caberes selmanes.

-Milicianos del CNT aforcaron a un mozu na Universidá Nasser, acusáu d’asesinar a 25 “insurxentes”.

-60 prisioneros de guerra foron asesinaos pol CNT depués d’intentar una fuga masiva de la cárcel.

-Un miembru del CNT foi emboscáu por guerrilleros ya ingresáu grave.

En Sabha, rexistráronse combates ente la resistencia y tropes del CNT, finando col secuestru de tres combatientes gubernamentales.

En Misrata, diez combatientes de la Yamahiriya foron condergaos a muerte.

Enfrentamientos entre tropes gubernamentales y guerrilles Touareg, autoorganizaes y armaes n’autodefensa, polos continuos ataques a la xente prieto nel nuevu estáu libiu. Acusen a la xente prieto de ser partidarios de Gaddafi, con quien tantu los Touareg, como otros grupos, atoparon trabayu, sofitu y drechos nel estáu libiu, asina como posteriormente formaron parte de les fuercies defensores de la Yamahiriya.

Vista esta pequena amuesa, ¿de verdá podemos falar de fin del conflictu libiu? ¿Por qué esi asquerosu silenciu mediáticu? Visto lo visto, daquién puede creyese lo que mos tan cuntando sobre Siria, que ta siguiendo unos pasos calcaos a los desendolcaos nel casu Libiu?

A tolo dicho, amestar que’l Conseyu Nacional de Transición Libiu refuga l’autonomía pidida por dellos territorios tres decidilo nes sos asamblees tribales, baxo la escusa de que con ello diba a frayase l’estáu libiu. Son la versión libia del “una, grande, y libre”, son puxarra aplaudida y sofitada poles “democracies occidentales” xunto a autocracies como la catarí.

Vista l’actuación de los gobiernos, los pueblos lo mínimo que podemos facer ye nun escaecer esta gran mentira, y atalantar qu’esta situación de matonismu, conflictu, tortures, represión… tien un enfotu principal: el beneficiu económicu de magnates y les sos petroleres transnacionales.

Capitalismu, al fin y al cabu, sangre y fueu pal beneficiu de cuatro.

Dos cares de la soberanía formal

"La independencia formal sobre bases capitalistes ye un fraude". Lenin.

A raíz del mediáticu “Casu Assange”, tamos viendo nel tarrén de la soberanía dos cares d’una mesma moneda, dos cares d’aquello que podemos llamar soberanía formal, ye dicir, qu’un estáu, d’alcuerdu cola llei, el drechu internacional etc., cunte con una soberanía reconocida tantu a nivel interior como esterior, sofitada nunes instituciones de gobiernu propies y demás estructura clásica de cualquier estáu “al usu”.

Asina, d’un lláu, tenemos al Reinu Xuníu, actuando una vegada más según los dictaos d’intereses superiores y ayenos a la so soberanía, nesti casu los de los Estaos Xuníos como representación d’esa élite gubernamental, mercantil, y social, que conformen la clase dominante del capitalismu a nivel internacional, y acatando la voluntá d’esos axentes pa qu’Assange seya estraditáu a los EE.XX onde, como ye evidente, diba ser condergáu, nuna farsa de procesu xudicial.

Poro, vemos claramente cómo Reinu Xuníu, al igual que Suecia, ta siendo nesti casu un simple títere que fae lo que-y manda  la élite capitalista, lo mesmo que ficieron va años nel casu Pinochet, anque nuna actitú contraria dafechu, negando la estradición. Ya igual que Pinochet, lo mesmo pasó con oligarques opositores al réxime de Putin y cía, a los qu’acoyeron con sumu gustu nel so territoriu dándo-yos asilu.

D’otru lláu, tenemos a Ecuador, que nun exerciciu de soberanía aplaudíu y sofitáu poles demás naciones llatinoamericanes, especialmente les rellaciones col ALBA –Cuba, Bolivia, Venezuela, Nicaragua, etc.- , decidió dar asilu políticu y acoyida na so embaxada a Julian Assange, desafiando les voluntaes y dictaos de los Estaos Xuníos y arriesgándose a represalies d’estos matones capitalistes que nun respeten democracies nin voluntaes populares.

Asina, tenemos a esbirros, d’un lláu, y d’otru a estaos qu’actúen con soberanía, ensin temer les posibles represalies yanquis, pero cabe entrugase hasta ónde llega esa soberanía de los países baxo l’actual sistema.

Na mio opinión, dicha soberanía puede ser exercida principalmente en tarrenes diplomáticos, onde si hai un gobiernu d’un corte soberanista, puede actuar de mena independiente de los dictaos de les potencies capitalistes. Quiciabes tamién n’otres estayes, pero onde ye nidio que nun se puede ser soberanu baxo’l capitalismu, ye no económico, y por ello siempres empleguen la táutica de la sanción y l’embargu, porque saben de la so efeutividá ya incidencia.

Y si no económico un país nun ye soberanu, ello acaba afeutando a les demás estayes d’esi territoriu. Poro, aquellos que busquen construyir una soberanía del so país –nun confundamos soberanía con autosuficiencia o autarquía, simplemente capacidá de decisión dafechu sobre qué política o decisiones adoptar- tiren por opciones d’izquierdes, averaes al socialismu, al anticapitalismu, y ehí ta la preba de los países llatinoamericanos, onde cuantes más d’izquierda, más socialista, más anticapitalista ye’l so gobiernu, más soberanía hai.

Quien busca algamar soberanía alimentaria, enerxética, nes redes de distribución, etc., crea cooperatives, conseyos socialistes, nacionaliza empreses, etc. Ye dicir, pa tener non sólo soberanía formal, sinon tamién soberanía real, ye imprescindible caminar haza’l socialismu, cuanto más cerca del socialismu temos, mayor soberanía tendremos. Cuantu más cerca del capitalismu y les sos potencies dominantes, más títeres sedremos.

Ye por ello que pa ver nun futuru una Asturies soberana, hai que construyir de mena imprescindible el socialismu, nun mos queda otra. Lo demás sedrán brindis patrióticos de cara a la galería que, nel exerciciu real de l’actividá política y económica del país, nun esistiríen.

Soberanía, y socialismu, parte del mesmu too, vamos a por ello.

Sobre'l "Fracking" y la posible utilización n'Asturies

Déxo-vos darréu un perinteresante documental alrodiu del "fracking", la téunica cola qu'una sociedá propiedá de Gas Natural-Fenosa y Hunosa quieren buscar bolses de gas nel conceyu de Villaviciosa. Como podéis ver nes imáxenes del documental, non sólo ye una llaceria pol conteníu altamente peligrosu y nocivu de la so actividá, sinon tamién pol murniu paisaxe mediuambiental que dexa.

De la mesma manera que va unos díes yera necesario conocer les tropelíes de Kinbauri, los que saquen l'oru n'Asturies, agora ye momentu de que tola ciudadanía asturiana conoza lo que ye esa téunica, qu'una vegada más, sirvirá namái pal beneficiu económicu d'empreses privaes que sólo van dexar n'Asturies esfarrape mediuambiental y un espoliu incentiváu poles instituciones públiques.

 Pa conocer un poco más del casu de Villaviciosa, déxo-vos tamién un enllaz cola alegación al proyeutu presentada pola Coordinadora Ecoloxista d'Asturies.

Alegación de la Coordinadora Ecoloxista

La sombra del fracking from DocMiradas on Vimeo.

Al César, lo que ye del César

Voi retomar esi tema tan recurrente n’actualidá andaluza y estatal, que ye l’aición del SAT y Sánchez Gordillo como tiesta más reconocible, p’afondar un poco más en quién ye esa izquierda combativa andaluza, que dende los mass-media nos simplifiquen como “IU y sindicalistes”. Y bono, en cierta midida, asina ye, sindicalistes del SAT, y Sánchez Gordillo, que ye diputáu andaluz con IU, pero que representa a un seutor diferenciáu, munches vegaes radicalmente llonxanu a lo que ye IU nel so conxuntu, y coles sos propies formes de llucha y participación que los diferencien nun seutor que participa d’IU, en parte, pero que nun ye IU, nin ye xusto qu’esa coalición se quede ensin más col réditu políticu d’esa aición, de les pasaes, y de les futures.

A nivel sindical, esa izquierda combativa que prautica l’aición direuta dende va décades, mediante la ocupación de tierres, entidaes bancaries, aiciones un supermercaos,etc., s’agrupa nel Sindicatu Andaluz de Trabayadores, parte del movimientu sindicalista alternativu y que podríemos homologar en dellos aspeutos colo que n’Asturies ye la Corriente Sindical d’Izquierdes. Non en vano, dambes formaciones se tienen como referente sindical nos sos respeutivos ámbitos d’actuación territorial.

Sicasí, el SAT tien muncha fuercia y repercusión nel territoriu andaluz, al cuntar como la so base de creación, amás de con varies fuercies sindicales llocales, col Sindicatu d’Obreros del Campu (SOC) –surdíu al so mesmu tiempu d’un partíu maoísta- , qu’axuntaba y axunta nel so sen a una gran mayoría del movimientu xornaleru andaluz, algamando en suma más militancia xornalera qu’UGT y CC.OO xuntes, por exemplu. Asina, son munchos miles los militantes del SAT –en crecimientu nos distintos seutores llaborales-, que pa más señes adopta como exes ideolóxicos el nacionalismu andaluz, la vindicación del drechu d’autodetermín, l’asamblearismu, republicanismu, etc. Ye dicir, ye un sindicatu a asitiar dientru l’ámbitu del movimientu soberanista d’izquierdes andaluz, onde ensin dubia, colos sos más de 25.000 afiliaos y afiliaes y la so constante actividá, ye’l referente indiscutible.

Pero d’otru lláu, y más a nivel políticu, atopamos el Coleutivu d’Unidá de los Trabayadores- Bloque Andaluz d’Izquierdes (CUT-BAI), el brazu políticu d’esi seutor soberanista andaluz, anticapitalista, d’izquierdes, etc. del que forma parte dende la so creación va cerca de 30 años, y con una trayeutoria a nivel andaluz bastante venceyada pa con Izquierda Unida, pero siempres cola so cuota de soberanía y aición independiente que fai d’ellos un seutor bien diferenciáu y non integráu dafechu n’IU. D’esta manera, CUT-BAI cunta con un diputáu na Xunta Andaluza, Sánchez Gordillo, y con decenes de conceyales, asina como unes 11 alcaldíes repartíes peles provincies de Sevilla, Jaén, y Cádiz. Sicasí, non toos esos cargos son algamaos en conxuntu con IU, y ye qu’en dellos municipios la militancia de CUT-BAI se presenta baxo llistes independientes, o coles sigles BAI, algamando dalgún representante con esti procedimientu.

D’otra manera, la piedra angular y la base de lo que ye CUT-BAI, ta espeyao na llocalidá de Marinaleda, esi referente d’asamblearismu, democracia participativa, bientar, accesu asequible a vivienda, servicios públicos afayaízos, etc., y onde ye CUT-BAI el partíu políticu que, ensin IU, opera nel llugar, algamando más del 70% de los votos, y siendo en gran parte el modelu de l’Andalucía que busca como fin esti partíu: lluchadora, revolucionaria, soberanista, asamblearista, etc.

Poro, tanto SAT como CUT-BAI, formen parte del movimientu soberanista andaluz d’izquierdes, del que son el principal referente dientru d’una llarga llista d’otres fuercies polítiques minoritaries, nes que nun s’inclúi, por supuestu, el PA, qu’al mio paecer cunta con un calter muncho más moderáu en tolos sentíos. Ye por ello que, camiento, ye de xusticia descubrise ante esti seutor social y políticu, qu’anque participe n’IU, nun ye parte d’esi seutor collaboracionista col PSOE qu’impera nesi país, sinon que forma un seutor sola so independencia y combatividá que debería servir como exemplu y referente a tola izquierda alternativa andaluza, y por supuestu como base pal espoxigue del soberanismu andaluz d’izquierda anticapitalista nesi país, l’únicu que na mio opinión tien posibilidaes de prender na sociedá andaluza, depués d’años de declive d’un Partíu Andalucista que, anque amosa signos de recuperación, pienso que nunca amosó ser una ferramiente verdaderamente útil pa la defensa de los intereses de la clase trabayadora andaluza.

Al césar, lo que ye del césar, al SAT, lo que ye del SAT, a CUT-BAI, lo que ye de CUT-BAI, y a IU, dici-yos que tomen exemplu de lo que ye l’ideal d’izquierda, y sobre too, de lo que ye la dignidá, el nun vendese a les bones formes que desixe al sistema, y, sobre too, a nun ser cómpliz nin parte de la élite formada y caltenida pol PSOE a base de clientelismu, amiguismu y corrupción.

Pa finar, dicir que n'Andalucía, la clas trabayadora, tien que ver esi seutor nacionalista d'izquierdes con ilusión, y cola concencia de que ye la verdadera alternativa pa camudar les coses, con xente honrao y perconvencío de que la llucha ye'l camín, fechu qu'amosen coles sos continues aiciones. Qu'ello sirva pa que los asturianos y asturianes nos demos cuenta que les coses nel nuesu país sólo tienen igua si nos enfotamos na consolidación d'un soberanismu asturianu d`izquierdes fuerte a nivel social, y si puede ser a nivel elleutoral tamién, pues inda meyor, pero sobre too a nivel social, con combatividña y aición continuo. 

Incentivando l’espoliu

Nos caberos díes conocimos vía mass-media que les obres d’acondicionamientu de la mina d’El Valle, en Belmonte, tan cerca del so fin, amosando qu’en poco más d’un mes tolos mecanismos tarán llistos pa la esplotación a plenu rendimientu del yacimientu, anteriormente esplotáu por Río Narcea Gold Mines. Según afirmen dende los actuales dueños, a plenu rendimientu esta mina puede llegar a sacar 350 gramos d’oru/tonelada, que según dicen ye una cantidá que nun se repite en nengún enclave del mundu. Amás, paez ser qu’esta esplotación, xunto a la de Carlés (Salas), xenera 400 empleos direutos y unos 100 indireutos. Paez too perguapo, pero vamos a sumerxinos un poco na realidá, nel tresfondu d’esti tipu d’actividaes y el so incentivu dende les alministraciones públiques.

La empresa dueña d’esti yacimientu ye “Kinbauri España”, una filial de Kinbauri qu’al so mesmu tiempu ye propiedá de la canadiense Orvana Minerals Corp. La verdá, ye que ye curioso la cantidá d’empreses mineres de calter multinacional cola so bas empresarial en canadá, pero a mi personalmente, les empreses multinacionales de calter mineru danme un respingu pergrande, y ye que sobre les sos espaldes pesen crímenes mediuambientales, esplotación llaboral, y crímenes escontra la humanidá en munchos territorios del planeta, quiciabes siendo lo más conocío lo fecho en llatinoamérica.

Nel casu de Kinbauri, pa conocelos meyor, dicir que tamién cunta con esplotaciones mineres en Galiza, pero la so filial “Kinbauri España”, sicasí, tien la so sede como Sociedá Llimitada nel conceyu de Belmonte, nel yacimientu de Valle-Boinás, que según paez ye la so ayalga a nivel estatal.

En cuantes a nivel xeneral, el so presidente, Bill Williams, y el so Direutor d’Operaciones, Ron Simkus, dirixen l’actividá y estratexa global de la compañía, siendo les tiestes visibles nos sos aconceyamientos col Ministeriu de Fomentu estatal pal desendolcu, a la so petición, d’actividaes mineres. Baxo esti mesmu patrón, desendolquen proyeutos en territorios como Bolivia –mina d’oru Don Mario- o Chile –Mina de cobre d’Apoquindo-. 

Como ye vezu nesti tipu de compañíes, ye complicao sigui-yos dafechu la pista, puesto que cunten con una maraña de filiales, sociedaes, cambeos de nomes, etc. colos que llavase la cara y poder actuar nos distintos yacimientos internacionales colos que cunten. Y ello ye asina, polos sos atropellos, abusos, y chanchullos.

L’hestorial de Kinbauri

Pa nun estendese muncho, y dao que les actuaciones abusives o neglixentes de les multinacionales mineres nos estaos subdesarrollaos tan xeneralizaes, vamos centranos en dalgunos de los episodios de Mina Don Mario en Bolivia. Asina, la matriz Orvana posee dichu yacimientu d’oru y tamién cobre, controvertíu por munchos aspeutos nos caberos años.

Los coleutivos indíxenes lleven años denunciando esi yacimientu poles sos práutiques mediante l’emplegu de sustancia tóxiques y mortíferes pal ser humanu nel so procesu industrial d’estracción, residuos que son almacenaos en diques col consiguiente peligru de rotura que supondría la lliberación d’altes dosis de cianuro, amás de pol dañu mediuambiental producíu poles mines de cielu abiertu.

A too ello, hai qu’amestar que, según el Códigu Mineru, les empreses dueñes de la concesión tienen potestad pa desendolcar construcciones o ampliaciones, tantu dientru de la so propiedá, como fuera, pudiendo construyir víes de comunicación, etc. Ello xenera una situación d’abusu y violación de los drechos de los pueblos indíxenes, obligaos a desplazase y oxetu de coacciones y amenaces, tamién denunciada por coleutivos indíxenes.
 [Informe Indíxena Independiente]

Amás, el gobiernu bolivianu desendolca investigaciones sobre la fiscalización de l’actividá d’esta mina, al sospechar que declara menos producción de la realmente esistente, col consiguiente fraude fiscal al pagar menos tases pola so actividá. El gobiernu d’Evo Morales tien amenazada a esta esplotación cola so nacionalización si se confirmare’l fraude.

Vergoña

Esto pasa en Bolivia, pero ¿qué nun pasará nel restu de países onde tienen presencia? Tres esto, hai que reflexonar: ¿de verdá queremos, y vamos permitir , qu’una compañía con tal hestorial opere como si nada nel nuesu país?

Y non sólo eso, sinon qu’hai qu’amestar otra entruga a les instituciones estatales y autonómiques: enrriba de qu’espolien los nuesos recursos naturales pal beneficiu d’una multinacional criminal dexando equí esfarrape mediuambiental, contaminación del mediu y una llimosna en forma d’emplegos, ¿tamos sovencionándolos y animándolos? Da ascu.

Y ye que’l Ministeriu de Fomentu buscó la presencia de Kinbauri, atropando’l so interés pa qu’invirtiere en distintos yacimientos del estáu español ensin actividá, y los asturianos foron dos de los finalmente alquiríos.

Como les instalaciones taben zarraes por Rio Narcea gold Mines, dende les instituciones asturianes quixeron incentivar l’espoliu, apurriendo en 2010 casi 5 millones d’euros a los nuevos dueños pa la reapertura de les instalaciones. Asina da gustu, enrriba que vas algamar beneficios millonarios, páguente parte de la inversión necesaria pa ello. 

Sicasí, ¿podría haber alternatives, soluciones a esta situación? Non nel momentu actual, con un gobiernu sucursalista qu’acata ensin rechistar midíes antiasturianes, y que pa colmu desendolca les suyes propies nel mesmu sentíu. Nun tenemos gobiernu asturianu, tenemos una sucursal del estatal,y  como tal, vendíos tamos, porque, ¿qué más da que s’estatalice al estilu Hunosa? Seguiríemos vendíos a los intereses del estáu español, como con Hunosa, seríemos un oxetu d’usar y tirar igual que lo somos coles multinacionales auríferes.

Necesitamos soberanía, y con ella, socialismu, p’asina tener un gobiernu con voluntá, capacidá, y ferramientes pa llevar a cabu una nacionalización dafechu de tol seutor mineru que quedaría somorguiáu a los intereses xenerales del país y de la so clase obrera. Por ello tenemos que puxar y lluchar, porque demientres tantu, lo mesmu nos da que los nuesos recursos tean en manes de multinacionales canadienses, qu’en manes del estáu español, esi instrumentu de y pa la burguesía que nos mira como un simple recursu del qu’estraer hasta la cañamina pa posteriormente escaese d’elli. 

Soberanía, y socialismu, nun tenemos otru camín si de verdá queremos un cambéu positivu na xestión de los nuesos recursos naturales propios, nesti casu los mineros, desmercantilizando tolo posible la so estracción, y faciéndola más racional.

A lo menos, qu’estes llinies sirvan pa que la xente conoza quiénes son los que saquen oru en Belmonte, y seyan conscientes de que si faen unes práutiques determinaes en llatinoamérica, equí emplegaranles en cuantes puedan o en cuantes-yos lo permitan.

Moxigatería capitalista

Estos caberos díes ta siendo noticia l’episodiu de llucha protagonizáu pol Sindicatu Andaluz de Trabayadores, mediante la so espropiación d’alimentos básicos nun Mercadona pa donalos a xente necesitao, asina como nun Carrefour, onde finalmente se llegó a un alcuerdu pa qu’estos donaren alimentos. La mio opinión ye rápida y cenciella: aplaudo l’aición, que sirve, en primer llugar, pa recordar lo que ye la izquierda revolucionaria: aición directa, “subversiva”, y dando onde más duel, nos principales puntos del capitalismu, y de pasu sirve tamién pa que caigan mázcares, y se vea quién ta realmente por un cambéu de modelu, quién entiende’l fondu de l’aición, qu’a  la fin ye simbólica, y d’alerta sobre la dramática situación de munches persones y families que pasen fame nel sistema capitalista, más dende l’entamu de lo que se denoma “crisis”.

D’otru lláu, veo que sal a la lluz aquello de la moxigatería, ye dicir, de xente que, mui dignos ellos –o dende otru puntu de vista, mui alienaos, mui manipulaos-, echen les manes a la tiesta pola aición, llamando a Sánchez Gordillo, por ser ún de los cabezaleros y el más mediáticu de los participantes, de lladrón p’arriba, por una aición de gran valir simbólico y d’escasa importancia económica. Eso sí, paez que pa munchos ye muncho más escandaloso esto que la corrupción, l’amiguismu, y el clientelismu xeneralizao en munches alministraciones, o los desfalcos y abusos económicos de la corona, o de la clas empresarial, la burguesía en definitiva, que roba, defrauda, esplota, contamina, delinque en definitiva con total impunidá, y ensin que los dignos de turnu digan nada al respeuto: moxigatería pura y dura, hipocresía, cinismu, y muncha, muncha alienación.

Poniendo un símil claru, nos Estaos Xuníos ye un escándalu nacional que dalguien amose una teta na televisión, hai multes exemplarizantes, cientos d’activistes de les sectes cristianes enfotaes nel acosu y derribu de quien lleve a cabu esi actu. Sicasí, al mesmu tiempu, nel mesmu territoriu, y con un silenciu hipócrita, EE.XX ye’l mayor productor mundial de pornografía de tou tipu: moxigatería moral, del país capitalista por escelencia, un sistema nel que l’apariencia ye perimportante, el ser una bona oveya del rebañu ye clave na vida pública.

Asina, la moxigatería capitalista torna a la lluz estos díes, escaeciendo qu’esta aición de muncha repercusión mediática pero poques consecuencies reales pa los establecimientos supuestamente afectaos ta fecha a empreses que basen el so poder na explotación llaboral, l’acosu, l’abusu de poder de negociación pa colos proveedores, nel saquéu de recursos naturales de territorios en conflictu y ocupaos como’l Sáhara, nel perxuiciu de les industries llocales en pos d’algamar el menor coste de producción posible. Son, a la fin, el símbolu, l’espeyu de lo que busca y representa toa empresa d’esti capitalismu neolliberal imperante.

¿Robu lo fecho pol SAT? Non, robu ye la plusvalía que’l patrón algama gracies al trabayu del obreru, el del supermercáu y el productor, en condiciones abusives y de chantaxe, porque “como dan trabayu”, yá ye too xustificable y hai qu’agradece-yos eternamente la so infinita benevolencia d’acoyenos nes sos grandes families empresariales. Nin de coña, hai que dicilo bien claro: tan robándonos, los sos cientos de millones d’euros de beneficiu anuales tan basaos na explotación llaboral, alimentaria, industrial, na especulación, etc.  pal únicu y exclusivu beneficiu d’insignes ya ilustres families burgueses d’estaos foriatos o, nesti casu, de la fastera valenciana del estáu español, que crecíos nel so poder intocable tovía s’atreven a dar lleiciones y proponer condiciones y actitudes indignantes pa la clase trabayadora. Róbennos, fáenlo a cara descubierta, y tovía hai munchos y munches, demasiaos y demasies, moxigatos y moxigates que defienden y xustifiquen les aiciones d’estos conglomeraos empresariales.

Y demientres tantu, equí siguimos, moxigatos munchos, demientres n’otros llugares se ponen en práutica nuevos modelos de supermercaos, de distirbución d’alimentos, más xustos, y protagonizaos pola clase trabayadora. 

¿Ponemos un exemplu?

Yera una vez que se yera un país llatinoamericanu presidíu por un ogru mui malu qu’expropiaba a dalgunos burgueses y qu’atendía al nome d’Hugo Chávez. Un bon día’l malváu gobiernu presidíu pol malévolu ogru decidió nacionalizar una rede de supermercaos asumiendo’l 80% de les acciones de la mesma, y creando a partir d’ello lo que güei ye conocío como “Abastos bicentenarios”, que dende l’añu 2010 ye una de les principales redes d’abastecimientu d’alimentos en Venezuela.

El so furrulamientu tien varios atractivos, y ye que son establecimientos que d’entrada tan asitiaos en llugares onde residen les clases populares, con unos precios más asequibles que los supermercaos privaos nos productos básicos que permiten el so accesu a tola población. Pero ehí nun finen les sos bones carauterístiques, y ye que caún d’estos centros son xestionaos por un “Conseyu d’obreros socialistes”,  socializando’l beneficiu algamáu ente tolos trabayadores que, d’esta mena, tan muncho más motivaos ya implicaos pa cola so estaya de trabayu.

Y pongo l’exemplu d’Abastos Bicentenarios al ser lo más asemeyao a lo qu’equí podría ser un supermercáu o una plaza d’abastos, pero hai otres aniciatives como PDVAL, otra rede d’establecimientos impulsaos pola petrolera estatal PDVSA que sovenciona’l preciu de los alimentos pa qu’éstos seyan más baratos y accesibles en porcentaxes mui considerables respeuto a los establecimientos privaos, asina como otres polítiques llevaes alantre baxo les misiones alimentaries gracies a les cuales Venezuela ta a la tiesta mundial n’amenorgamientu de la probitú y de la desnutrición.

Pero nun finen ehí les virtudes d’estos sistemes, porque nun son simples puntos de venta o distribución, ensin más, sinon que tienen la misión de dar prioridá a los productos del propiu país, ellaboraos en bona parte por industries de calter público baxo’l mesmu sistema de “Conseyos obreros socialistes”. Asina, algama gran puxu la industria agroalimentaria o la rellacionada con productos de llimpieza, por poner dos exemplos, nel país venezolanu,  gracies a los Sistemes de Suministru Socialistes (Sisso) avanzando asina nel desendolcu industrial y la gueta de la soberanía alimentaria.

Ye un pequeñu pero valoratible exemplu, de lo llacerioso del nuesu sistema de distribución alimentariu, y de que teamos rasgándonos les vestidures por espropiar un puñáu de carros de la compra, cuando deberíemos tar falando de la NACIONALIZACIÓN dafechu de les redes de distribución alimentaria al mesmu tiempu que cooperativizamos ya impulsamos la industria ganadera, agrícola, forestal, etc. propio baxo criterios de caltenibilidá, ecoloxía y gueta del bien común del pueblu nel so conxuntu.

Pero sigamos prauticando la moxigatería, demientres les élites mos fustiguen a diariu ensin que la clas obrera na so mayoría dea signos d’esconsonar…

Y equí tamos, Alloriando de nuevu

Bienllegaos a toos y toes a esti nuevu blogue en llingua asturiana, "Alloriando", heriede espiritual (qué bien suena...) del blogue ¡Esti Home Allorió!, que dalgunos recordaréis -¡pa bien o pa mal!-  pero coles sos diferencies: voi mirar poco o nada pal aspeutu organizativu del movimientu nacionaliegu al que pertenezco, cosa que sí facía enantes, y sí muncho pa l'actualidá y lo non tan actual d'Asturies, del mundu, y too aquello que vaya surdiendo a lo llargo'l tiempu, ensin siguir una llinia concreta y buscando siempres un puntu de vista distintu, ya irónicu cuando se puede, asina que si-vos peta, lleémonos equí, en Twitter, en Facebook...

¡Salú!