Incentivando l’espoliu

Nos caberos díes conocimos vía mass-media que les obres d’acondicionamientu de la mina d’El Valle, en Belmonte, tan cerca del so fin, amosando qu’en poco más d’un mes tolos mecanismos tarán llistos pa la esplotación a plenu rendimientu del yacimientu, anteriormente esplotáu por Río Narcea Gold Mines. Según afirmen dende los actuales dueños, a plenu rendimientu esta mina puede llegar a sacar 350 gramos d’oru/tonelada, que según dicen ye una cantidá que nun se repite en nengún enclave del mundu. Amás, paez ser qu’esta esplotación, xunto a la de Carlés (Salas), xenera 400 empleos direutos y unos 100 indireutos. Paez too perguapo, pero vamos a sumerxinos un poco na realidá, nel tresfondu d’esti tipu d’actividaes y el so incentivu dende les alministraciones públiques.

La empresa dueña d’esti yacimientu ye “Kinbauri España”, una filial de Kinbauri qu’al so mesmu tiempu ye propiedá de la canadiense Orvana Minerals Corp. La verdá, ye que ye curioso la cantidá d’empreses mineres de calter multinacional cola so bas empresarial en canadá, pero a mi personalmente, les empreses multinacionales de calter mineru danme un respingu pergrande, y ye que sobre les sos espaldes pesen crímenes mediuambientales, esplotación llaboral, y crímenes escontra la humanidá en munchos territorios del planeta, quiciabes siendo lo más conocío lo fecho en llatinoamérica.

Nel casu de Kinbauri, pa conocelos meyor, dicir que tamién cunta con esplotaciones mineres en Galiza, pero la so filial “Kinbauri España”, sicasí, tien la so sede como Sociedá Llimitada nel conceyu de Belmonte, nel yacimientu de Valle-Boinás, que según paez ye la so ayalga a nivel estatal.

En cuantes a nivel xeneral, el so presidente, Bill Williams, y el so Direutor d’Operaciones, Ron Simkus, dirixen l’actividá y estratexa global de la compañía, siendo les tiestes visibles nos sos aconceyamientos col Ministeriu de Fomentu estatal pal desendolcu, a la so petición, d’actividaes mineres. Baxo esti mesmu patrón, desendolquen proyeutos en territorios como Bolivia –mina d’oru Don Mario- o Chile –Mina de cobre d’Apoquindo-. 

Como ye vezu nesti tipu de compañíes, ye complicao sigui-yos dafechu la pista, puesto que cunten con una maraña de filiales, sociedaes, cambeos de nomes, etc. colos que llavase la cara y poder actuar nos distintos yacimientos internacionales colos que cunten. Y ello ye asina, polos sos atropellos, abusos, y chanchullos.

L’hestorial de Kinbauri

Pa nun estendese muncho, y dao que les actuaciones abusives o neglixentes de les multinacionales mineres nos estaos subdesarrollaos tan xeneralizaes, vamos centranos en dalgunos de los episodios de Mina Don Mario en Bolivia. Asina, la matriz Orvana posee dichu yacimientu d’oru y tamién cobre, controvertíu por munchos aspeutos nos caberos años.

Los coleutivos indíxenes lleven años denunciando esi yacimientu poles sos práutiques mediante l’emplegu de sustancia tóxiques y mortíferes pal ser humanu nel so procesu industrial d’estracción, residuos que son almacenaos en diques col consiguiente peligru de rotura que supondría la lliberación d’altes dosis de cianuro, amás de pol dañu mediuambiental producíu poles mines de cielu abiertu.

A too ello, hai qu’amestar que, según el Códigu Mineru, les empreses dueñes de la concesión tienen potestad pa desendolcar construcciones o ampliaciones, tantu dientru de la so propiedá, como fuera, pudiendo construyir víes de comunicación, etc. Ello xenera una situación d’abusu y violación de los drechos de los pueblos indíxenes, obligaos a desplazase y oxetu de coacciones y amenaces, tamién denunciada por coleutivos indíxenes.
 [Informe Indíxena Independiente]

Amás, el gobiernu bolivianu desendolca investigaciones sobre la fiscalización de l’actividá d’esta mina, al sospechar que declara menos producción de la realmente esistente, col consiguiente fraude fiscal al pagar menos tases pola so actividá. El gobiernu d’Evo Morales tien amenazada a esta esplotación cola so nacionalización si se confirmare’l fraude.

Vergoña

Esto pasa en Bolivia, pero ¿qué nun pasará nel restu de países onde tienen presencia? Tres esto, hai que reflexonar: ¿de verdá queremos, y vamos permitir , qu’una compañía con tal hestorial opere como si nada nel nuesu país?

Y non sólo eso, sinon qu’hai qu’amestar otra entruga a les instituciones estatales y autonómiques: enrriba de qu’espolien los nuesos recursos naturales pal beneficiu d’una multinacional criminal dexando equí esfarrape mediuambiental, contaminación del mediu y una llimosna en forma d’emplegos, ¿tamos sovencionándolos y animándolos? Da ascu.

Y ye que’l Ministeriu de Fomentu buscó la presencia de Kinbauri, atropando’l so interés pa qu’invirtiere en distintos yacimientos del estáu español ensin actividá, y los asturianos foron dos de los finalmente alquiríos.

Como les instalaciones taben zarraes por Rio Narcea gold Mines, dende les instituciones asturianes quixeron incentivar l’espoliu, apurriendo en 2010 casi 5 millones d’euros a los nuevos dueños pa la reapertura de les instalaciones. Asina da gustu, enrriba que vas algamar beneficios millonarios, páguente parte de la inversión necesaria pa ello. 

Sicasí, ¿podría haber alternatives, soluciones a esta situación? Non nel momentu actual, con un gobiernu sucursalista qu’acata ensin rechistar midíes antiasturianes, y que pa colmu desendolca les suyes propies nel mesmu sentíu. Nun tenemos gobiernu asturianu, tenemos una sucursal del estatal,y  como tal, vendíos tamos, porque, ¿qué más da que s’estatalice al estilu Hunosa? Seguiríemos vendíos a los intereses del estáu español, como con Hunosa, seríemos un oxetu d’usar y tirar igual que lo somos coles multinacionales auríferes.

Necesitamos soberanía, y con ella, socialismu, p’asina tener un gobiernu con voluntá, capacidá, y ferramientes pa llevar a cabu una nacionalización dafechu de tol seutor mineru que quedaría somorguiáu a los intereses xenerales del país y de la so clase obrera. Por ello tenemos que puxar y lluchar, porque demientres tantu, lo mesmu nos da que los nuesos recursos tean en manes de multinacionales canadienses, qu’en manes del estáu español, esi instrumentu de y pa la burguesía que nos mira como un simple recursu del qu’estraer hasta la cañamina pa posteriormente escaese d’elli. 

Soberanía, y socialismu, nun tenemos otru camín si de verdá queremos un cambéu positivu na xestión de los nuesos recursos naturales propios, nesti casu los mineros, desmercantilizando tolo posible la so estracción, y faciéndola más racional.

A lo menos, qu’estes llinies sirvan pa que la xente conoza quiénes son los que saquen oru en Belmonte, y seyan conscientes de que si faen unes práutiques determinaes en llatinoamérica, equí emplegaranles en cuantes puedan o en cuantes-yos lo permitan.