Dos cares de la soberanía formal

"La independencia formal sobre bases capitalistes ye un fraude". Lenin.

A raíz del mediáticu “Casu Assange”, tamos viendo nel tarrén de la soberanía dos cares d’una mesma moneda, dos cares d’aquello que podemos llamar soberanía formal, ye dicir, qu’un estáu, d’alcuerdu cola llei, el drechu internacional etc., cunte con una soberanía reconocida tantu a nivel interior como esterior, sofitada nunes instituciones de gobiernu propies y demás estructura clásica de cualquier estáu “al usu”.

Asina, d’un lláu, tenemos al Reinu Xuníu, actuando una vegada más según los dictaos d’intereses superiores y ayenos a la so soberanía, nesti casu los de los Estaos Xuníos como representación d’esa élite gubernamental, mercantil, y social, que conformen la clase dominante del capitalismu a nivel internacional, y acatando la voluntá d’esos axentes pa qu’Assange seya estraditáu a los EE.XX onde, como ye evidente, diba ser condergáu, nuna farsa de procesu xudicial.

Poro, vemos claramente cómo Reinu Xuníu, al igual que Suecia, ta siendo nesti casu un simple títere que fae lo que-y manda  la élite capitalista, lo mesmo que ficieron va años nel casu Pinochet, anque nuna actitú contraria dafechu, negando la estradición. Ya igual que Pinochet, lo mesmo pasó con oligarques opositores al réxime de Putin y cía, a los qu’acoyeron con sumu gustu nel so territoriu dándo-yos asilu.

D’otru lláu, tenemos a Ecuador, que nun exerciciu de soberanía aplaudíu y sofitáu poles demás naciones llatinoamericanes, especialmente les rellaciones col ALBA –Cuba, Bolivia, Venezuela, Nicaragua, etc.- , decidió dar asilu políticu y acoyida na so embaxada a Julian Assange, desafiando les voluntaes y dictaos de los Estaos Xuníos y arriesgándose a represalies d’estos matones capitalistes que nun respeten democracies nin voluntaes populares.

Asina, tenemos a esbirros, d’un lláu, y d’otru a estaos qu’actúen con soberanía, ensin temer les posibles represalies yanquis, pero cabe entrugase hasta ónde llega esa soberanía de los países baxo l’actual sistema.

Na mio opinión, dicha soberanía puede ser exercida principalmente en tarrenes diplomáticos, onde si hai un gobiernu d’un corte soberanista, puede actuar de mena independiente de los dictaos de les potencies capitalistes. Quiciabes tamién n’otres estayes, pero onde ye nidio que nun se puede ser soberanu baxo’l capitalismu, ye no económico, y por ello siempres empleguen la táutica de la sanción y l’embargu, porque saben de la so efeutividá ya incidencia.

Y si no económico un país nun ye soberanu, ello acaba afeutando a les demás estayes d’esi territoriu. Poro, aquellos que busquen construyir una soberanía del so país –nun confundamos soberanía con autosuficiencia o autarquía, simplemente capacidá de decisión dafechu sobre qué política o decisiones adoptar- tiren por opciones d’izquierdes, averaes al socialismu, al anticapitalismu, y ehí ta la preba de los países llatinoamericanos, onde cuantes más d’izquierda, más socialista, más anticapitalista ye’l so gobiernu, más soberanía hai.

Quien busca algamar soberanía alimentaria, enerxética, nes redes de distribución, etc., crea cooperatives, conseyos socialistes, nacionaliza empreses, etc. Ye dicir, pa tener non sólo soberanía formal, sinon tamién soberanía real, ye imprescindible caminar haza’l socialismu, cuanto más cerca del socialismu temos, mayor soberanía tendremos. Cuantu más cerca del capitalismu y les sos potencies dominantes, más títeres sedremos.

Ye por ello que pa ver nun futuru una Asturies soberana, hai que construyir de mena imprescindible el socialismu, nun mos queda otra. Lo demás sedrán brindis patrióticos de cara a la galería que, nel exerciciu real de l’actividá política y económica del país, nun esistiríen.

Soberanía, y socialismu, parte del mesmu too, vamos a por ello.