Moxigatería capitalista

Estos caberos díes ta siendo noticia l’episodiu de llucha protagonizáu pol Sindicatu Andaluz de Trabayadores, mediante la so espropiación d’alimentos básicos nun Mercadona pa donalos a xente necesitao, asina como nun Carrefour, onde finalmente se llegó a un alcuerdu pa qu’estos donaren alimentos. La mio opinión ye rápida y cenciella: aplaudo l’aición, que sirve, en primer llugar, pa recordar lo que ye la izquierda revolucionaria: aición directa, “subversiva”, y dando onde más duel, nos principales puntos del capitalismu, y de pasu sirve tamién pa que caigan mázcares, y se vea quién ta realmente por un cambéu de modelu, quién entiende’l fondu de l’aición, qu’a  la fin ye simbólica, y d’alerta sobre la dramática situación de munches persones y families que pasen fame nel sistema capitalista, más dende l’entamu de lo que se denoma “crisis”.

D’otru lláu, veo que sal a la lluz aquello de la moxigatería, ye dicir, de xente que, mui dignos ellos –o dende otru puntu de vista, mui alienaos, mui manipulaos-, echen les manes a la tiesta pola aición, llamando a Sánchez Gordillo, por ser ún de los cabezaleros y el más mediáticu de los participantes, de lladrón p’arriba, por una aición de gran valir simbólico y d’escasa importancia económica. Eso sí, paez que pa munchos ye muncho más escandaloso esto que la corrupción, l’amiguismu, y el clientelismu xeneralizao en munches alministraciones, o los desfalcos y abusos económicos de la corona, o de la clas empresarial, la burguesía en definitiva, que roba, defrauda, esplota, contamina, delinque en definitiva con total impunidá, y ensin que los dignos de turnu digan nada al respeuto: moxigatería pura y dura, hipocresía, cinismu, y muncha, muncha alienación.

Poniendo un símil claru, nos Estaos Xuníos ye un escándalu nacional que dalguien amose una teta na televisión, hai multes exemplarizantes, cientos d’activistes de les sectes cristianes enfotaes nel acosu y derribu de quien lleve a cabu esi actu. Sicasí, al mesmu tiempu, nel mesmu territoriu, y con un silenciu hipócrita, EE.XX ye’l mayor productor mundial de pornografía de tou tipu: moxigatería moral, del país capitalista por escelencia, un sistema nel que l’apariencia ye perimportante, el ser una bona oveya del rebañu ye clave na vida pública.

Asina, la moxigatería capitalista torna a la lluz estos díes, escaeciendo qu’esta aición de muncha repercusión mediática pero poques consecuencies reales pa los establecimientos supuestamente afectaos ta fecha a empreses que basen el so poder na explotación llaboral, l’acosu, l’abusu de poder de negociación pa colos proveedores, nel saquéu de recursos naturales de territorios en conflictu y ocupaos como’l Sáhara, nel perxuiciu de les industries llocales en pos d’algamar el menor coste de producción posible. Son, a la fin, el símbolu, l’espeyu de lo que busca y representa toa empresa d’esti capitalismu neolliberal imperante.

¿Robu lo fecho pol SAT? Non, robu ye la plusvalía que’l patrón algama gracies al trabayu del obreru, el del supermercáu y el productor, en condiciones abusives y de chantaxe, porque “como dan trabayu”, yá ye too xustificable y hai qu’agradece-yos eternamente la so infinita benevolencia d’acoyenos nes sos grandes families empresariales. Nin de coña, hai que dicilo bien claro: tan robándonos, los sos cientos de millones d’euros de beneficiu anuales tan basaos na explotación llaboral, alimentaria, industrial, na especulación, etc.  pal únicu y exclusivu beneficiu d’insignes ya ilustres families burgueses d’estaos foriatos o, nesti casu, de la fastera valenciana del estáu español, que crecíos nel so poder intocable tovía s’atreven a dar lleiciones y proponer condiciones y actitudes indignantes pa la clase trabayadora. Róbennos, fáenlo a cara descubierta, y tovía hai munchos y munches, demasiaos y demasies, moxigatos y moxigates que defienden y xustifiquen les aiciones d’estos conglomeraos empresariales.

Y demientres tantu, equí siguimos, moxigatos munchos, demientres n’otros llugares se ponen en práutica nuevos modelos de supermercaos, de distirbución d’alimentos, más xustos, y protagonizaos pola clase trabayadora. 

¿Ponemos un exemplu?

Yera una vez que se yera un país llatinoamericanu presidíu por un ogru mui malu qu’expropiaba a dalgunos burgueses y qu’atendía al nome d’Hugo Chávez. Un bon día’l malváu gobiernu presidíu pol malévolu ogru decidió nacionalizar una rede de supermercaos asumiendo’l 80% de les acciones de la mesma, y creando a partir d’ello lo que güei ye conocío como “Abastos bicentenarios”, que dende l’añu 2010 ye una de les principales redes d’abastecimientu d’alimentos en Venezuela.

El so furrulamientu tien varios atractivos, y ye que son establecimientos que d’entrada tan asitiaos en llugares onde residen les clases populares, con unos precios más asequibles que los supermercaos privaos nos productos básicos que permiten el so accesu a tola población. Pero ehí nun finen les sos bones carauterístiques, y ye que caún d’estos centros son xestionaos por un “Conseyu d’obreros socialistes”,  socializando’l beneficiu algamáu ente tolos trabayadores que, d’esta mena, tan muncho más motivaos ya implicaos pa cola so estaya de trabayu.

Y pongo l’exemplu d’Abastos Bicentenarios al ser lo más asemeyao a lo qu’equí podría ser un supermercáu o una plaza d’abastos, pero hai otres aniciatives como PDVAL, otra rede d’establecimientos impulsaos pola petrolera estatal PDVSA que sovenciona’l preciu de los alimentos pa qu’éstos seyan más baratos y accesibles en porcentaxes mui considerables respeuto a los establecimientos privaos, asina como otres polítiques llevaes alantre baxo les misiones alimentaries gracies a les cuales Venezuela ta a la tiesta mundial n’amenorgamientu de la probitú y de la desnutrición.

Pero nun finen ehí les virtudes d’estos sistemes, porque nun son simples puntos de venta o distribución, ensin más, sinon que tienen la misión de dar prioridá a los productos del propiu país, ellaboraos en bona parte por industries de calter público baxo’l mesmu sistema de “Conseyos obreros socialistes”. Asina, algama gran puxu la industria agroalimentaria o la rellacionada con productos de llimpieza, por poner dos exemplos, nel país venezolanu,  gracies a los Sistemes de Suministru Socialistes (Sisso) avanzando asina nel desendolcu industrial y la gueta de la soberanía alimentaria.

Ye un pequeñu pero valoratible exemplu, de lo llacerioso del nuesu sistema de distribución alimentariu, y de que teamos rasgándonos les vestidures por espropiar un puñáu de carros de la compra, cuando deberíemos tar falando de la NACIONALIZACIÓN dafechu de les redes de distribución alimentaria al mesmu tiempu que cooperativizamos ya impulsamos la industria ganadera, agrícola, forestal, etc. propio baxo criterios de caltenibilidá, ecoloxía y gueta del bien común del pueblu nel so conxuntu.

Pero sigamos prauticando la moxigatería, demientres les élites mos fustiguen a diariu ensin que la clas obrera na so mayoría dea signos d’esconsonar…