Salvar l’árbol, el mediu ambiente y la vida mesma

Discursu pronunciáu en París, na primer Conferencia pola Proteición del Árbol y la viesca, el 5 de febreru de 1986. Foi espublizao en francés nel númberu del 14 de febreru de 1986 de la revista Carrefour africain, espublizada n' Ouagadougou.

Salvar l’árbol, el mediu ambiente y la vida mesma

La mio patria, Burkina Faso, ye indiscutiblemente ún d’esos países raros d’esti planeta que tien drechu a llamase y vese a sigo mesmu como la concentración de tolos males naturales que la humanidá carez entá a fines del sieglu XX.

Y, poro, esta realidá interiorizose dolorosamente mientres 23 años polos 8 millones de burkinabes, que vieron morrer a les sos más, pás, fíos y fíes, a quien la fame, les enfermedaes y la inorancia achuquinaron por cientos. Con llárimes nos güeyos vieron ensugase llamargues y ríos. Dende 1973, vieron deteriorase'l mediu ambiente, morrer los árboles, y al desiertu invader a pasos de xigante. Calcúlase que nel Sahel el desiertu avanza a unos 7 kilómetru per añu.

Solo estes realidaes dexen entender y aceutar la rebelión llexítima que ñació, que maureció al traviés d'un llargu períodu y que finalmente españó de manera organizada la nueche del 4 d'agostu de 1983 en Burkina Faso, so la forma d'una revolución democrático y popular.

Equí nun soi más qu'un humilde voceru d'un pueblu que, en viendo morrer pasivamente’l so ambiente natural, refuga morrer. A partir del 4 d'agostu de 1983, l'agua, los árboles y la vida –por non dicir la mesma supervivencia– fueron elementos fundamentales y sagraos en toles aiciones del Conseyu Nacional de la Revolución que dirixe a Burkina Faso.

Por esta razón tengo de rindir tamién tributu al pueblu francés, al so gobiernu y en particular al so presidente, el señor François Mitterrand, por esta iniciativa que torna’l xeniu políticu y la llucidez d'un pueblu abiertu siempres al mundu y sensible siempres a les sos miseries. Burkina Faso, asitiada nel corazón del Sahel, va saber apreciar siempres nel so xustu valor iniciatives que coincidan perfectamente coles esmoliciones vitales del so pueblu. Siempres que sía necesariu, va saber dicir “presente”, daqué que nun vamos faer cuando se trate de paseos inútiles.

Yá van ser tres años que’l mio pueblu, el pueblu burkinabe, llibra un combate contra la desertificación. Yera'l so deber, poro, tar presente nesta tribuna pa falar de les sos esperiencies y, al empar, beneficiase de la esperiencia d'otros pueblos del mundu. Yá van ser tres años qu'en Burkina Faso tolos acontecimientos dichosos –matrimonios, bautismos, condecoraciones, visites de personalidaes y demás– se cellebren con una ceremonia de plantíu d'árboles.

Pal añu nuevu en 1986, toles escolares, tolos escolares y alumnos de secundaria de la nuesa capital, Uaadugu, construyeron coles sos propies manes más de 3 500 forniellos perfeicionaos pa dá-y los a les sos más, y que s’amesten  a los 80 mil forniellos iguaos poles mesmes muyeres en dos años. Esa foi la so contribución al esfuerzu nacional p'amenorgar el consumu de lleña y caltener los árboles y la vida.

L'accesu a la propiedá o al simple arriendu de los cientos de viviendes sociales construyíes dende’l 4 d'agostu de 1983 ta puramente condicionáu a que'l beneficiariu se comprometa a semar una cantidá mínima d'árboles y a curialos como a les neñes de los sos güeyos. Yá s'espulsó a beneficiarios irrespetuosos del so compromisu, gracies a la vixilancia de los nuesos Comités de Defensa de la Revolución, esos mesmos CDR que les llingües malintencionaes avecen a bilordiar de forma sistemática y ensin matiz dengún.

En vacunando en tol territoriu nacional nunos 15 díes a 2 millones 500 mil neños ente les edaes de 9 meses y 14 años –de Burkina Faso y de países vecinos– contra'l sarampión, la meninxitis y la fiebre mariello, en realizando más de 150 perforaciones pa garantizar el suministru d'agua potable a la ventena de seutores de la nuesa capital qu'hasta entós tuvieron quitaos d'esa necesidá esencial, y n'irguiendo en dos años la tasa d'alfabetización del 12 per cientu al 22 per cientu, el pueblu burkinabe sigue victoriosamente la so llucha por una Burkina verde.

Semáronse 10 millones d'árboles en 15 meses dientro del marcu d'un Programa Popular de Desendolcu: el nuesu primer apueste como un anticipu al Plan Quinquenal. Nos pueblos, nos valles alministraos de los nuesos ríos, cada familia tien de semar 100 árboles per añu.

La tala y el comerciu de la lleña fueron dafechu reorganizaes y son puxantemente disciplinaes. Estes actividaes desixen tener un carné de comerciante de lleña, y respetar les zones afectaes na corte de lleña, según la obligación d'asegurar la reforestación de les zones valtaes. Anguaño, cada aldega y cada pueblu burkinabe tien una arboleda, remocicándose asina una tradición ancestral.

Gracies al esfuerzu por llograr que les mases populares reconozan les sos responsabilidaes, llibremos a los centros urbanos de la plaga de la deambulación d'animales. Nel campu, los nuesos esfuerzos concentráronse na sedentarización del ganáu con cuenta de privilexar la cría intensiva pa lluchar contra'l nomadismu selvaxe.

Tolos actos criminales de pirómanos qu'amburen montes, son xulgaos y sentenciaos nos Tribunales Populares de Conciliación de les aldegues, y ente les sanciones impuestes por dichos tribunales figura la llantadera obligatoria de ciertu númberu d'árboles.

Del 10 de febreru al 20 de marzu próximos, más de 35 mil llabradores –responsables de grupos y de cooperatives d'aldegues– van tomar cursos intensivos alfabetizadores en materia d'alministración económica, d'organización y de caltenimientu del mediu ambiente.

Dende'l 15 de xineru, en Burkina desenvolvióse una bayurosa operación denomada “Recueya popular de granes forestales”, con mires a suministrar a los 7 mil viveros nes aldegues. Nós resumimos toes estes actividaes so la conseña de “Les trés lluches”.

Señores, señorites y señores, nun intento emponderar decomanadamente la modesta esperiencia revolucionaria del mio pueblu en materia de la defensa del árbol y de los montes. Intento falá-yos de la forma más esplícita posible sobre los fondos cambeos que tán en cursu en Burkina Faso na rellación qu'esiste ente l'home y l'árbol. Intento dar testimoniu de la forma más fiel posible de la nacencia y desenvolvimientu d'un amor sinceru y fondu na mio patria ente l'home burkinabe y los árboles.

Al faelo, creemos que tornamos sobre'l tarrén les nueses conceiciones teóriques alrodiu de les víes y los medios específicos de les nueses realidaes sahelianes, na gueta de soluciones énte los peligros presentes y futuros qu'alfrenten a los árboles a nivel mundial.

Los esfuerzos, tanto de tola comunidá equí axuntada como los nuesos, les esperiencies acumulaes por ustedes y por nós, de xuru van ser al empar la garantía de victories constantes y calteníes pa salvar l'árbol, el mediu ambiente y, cenciellamente, la vida.

Escelencies, dames y caballeros, nini ante ustedes porque asperamos qu’entamen un combate del que nós nun podemos tar ausentes, nós que somos afrellaos a diariu y qu'asperamos que'l milagru verdeciente surda del coraxe de dicir lo que se debe dicir. Vini a xunime a ustedes pa refugar los rigores de la naturaleza. Vini ante ustedes pa denunciar al home que'l so egoísmu ye causa de la desgracia del so hermanu. El pillaxe colonialista abrasó los nuesos montes ensin la menor idega de reemplazalos pal nuesu porvenir.

Sigue l’esfarrape impune de la biosfera al traviés d'incursiones selvaxes y asesines sobre la tierra y l’aire. Y enxamás podrá dicise cuánto arrobinen la matanza toes eses máquines qu'emiten gases. Quienes tienen los medios tecnolóxicos pa determinar culpabilidaes nun tán interesaos en facelo, y quienes tán interesaos nun tienen los medios tecnolóxicos. Nun tienen más que la so intuición y el so fondu convencimientu .

Nun tamos contra'l progresu, pero nun queremos que'l progresu sía anárquicu nin criminalmente desdexosu escontra los derechos de los demás. Queremos afitar, polo tanto,que la llucha contra la desertificación ye una llucha p’algamar un equilibriu pente l'home, la natura y la sociedá. Por esta razón ye, sobremanera, una llucha política y non una fatalidá.

La creación d'un Ministeriu de l'Agua, que vien a complementar el Ministeriu del Ambiente y Turismu nel mio país, sorraya'l nuesu deséu de plantegar claramente los problemes con cuenta de poder igualos. Tenemos que lluchar p'atopar los medios financieros con mires a esplotar los nuesos recursos hidráulicos esistentes –perforaciones, banzaos y diques–. 

Esti ye'l llugar pa denunciar los contratos lleoninos y les condiciones draconianes impuestes polos bancos y organismos financieros que conderguen los nuesos proyeutos nesta materia. Son eses les condiciones prohibitives que provoquen l'endeldamientu  descomanáu de los nuesos países, que torguen tou marxe d'aición real.

Nin los zorramplos argumentos malthusianos –y yo afirmo qu'África sigue siendo un continente subpobláu– nin eses colonies de vacaciones bautizaes pomposa y demagóxicamente “operaciones de reforestación” constitúin respuestes. A nós y a la nuesa miseria se mos refuga como a esos perros pelaos y sarnosos cuyes quexes y clamores alteren la callada tranquilidá de los fabricantes y mercaderes de miseria.

Por eso Burkina propunxo, y propón siempres, qu'a lo menos hai qu’emplegar  l’ún per cientu de les colosales sumes de dineru que se sacrifiquen na busca de la cohabitación con otros astros pa financiar de forma compensatoria proyeutos de llucha pa salvar los árboles y la vida. Nun perdemos la esperanza de qu'un diálogu colos marcianos pudiera resultar en reconquistar l’Edén, pero  mentanto,como  terrícoles que somos, tenemos tamién el derechu de refugar una opción que se llinde a la simple alternativa ente infiernu y purgatoriu.

Si se formula asina, la nuesa llucha en defensa de los montes y los árboles ye, primero de too, una llucha popular y democrático. ¡La conmoción estéril y costosa d'unos cuantos inxenieros y espertos en silvicultura enxamás va llograr nada! Como tampoco les conciencies trescalaes y sinceres de los múltiples foros ya instituciones van poder facer que’l Sahel torne a resurdir en tanto nun tengamos dineru pa furar pozos d'agua potable d'unos 100 metros, ¡demientres que sobra pa furar pozos petroleros de 3 mil metros!

Como dixo Karl Marx, los que viven nun palaciu nun piensen nes mesmes coses, nin de la mesma forma, que los que viven nun cabanu. Esta llucha pa defender los árboles y los montes ye, primero de too, una llucha antiimperialista. L'imperialismu ye'l pirómanu de los nuesos montes y de les nueses sabanes.

Señores presidentes, señores primeros ministros, dames y caballeros, Sofitémonos nestos principios de llucha revolucionario, pa que'l verde de la bayura, de l'allegría y de la felicidá conquiste los sos derechos. Creemos na virtú de la revolución pa detener la muerte del nuesu Faso y p’abrir un futuru gayoleru.

Sí, la problemática alredor de los árboles y los montes ye puramente la de l'armonía ente l'individuu, la sociedá y la naturaleza. Esti combate ye posible. Nós nun reculamos ante la inmensidá de la xera nin-y damos al llombu al sufrimientu de los demás, pues la desertificación nun tien fronteres.

Esti combate puede ganase si escoyemos ser arquitectos y non a cencielles abeyes. Va a ser la victoria de la conciencia sobre l'instintu. L'abeya y l'arquiteutu, ¡sí! Y si l'autor me dexa, voi esparder esta analoxía dualista y a facela un trípticu, esto ye: l'abeya, l'arquiteutu y l'arquiteutu revolucionariu.

¡Patria o muerte, vamos vencer!

Gracies.

Les idees nun se maten

Thomas Sankara ye una de les figures revolucionaries más importantes del continente africanu. En 1983 tomó'l poder col sofitu popular n'Alto Volta, rebautizao como Burkina Faso -"la patria de los homes íntegros", y entamó un importante programa de tresformación social, cola socialización de tierres, y ambiciosos programes escontra la fame, l'analfabetismu, o les enfermedaes. Amás, dotó al pueblu de derechos qu'enxamás suañaren, y adoptó una política antiimperialista y averada a los países socialistes, que-y costó l'antagonismu de les clases privilexaes de Burkina Faso, y de Francia como opresor colonial, qu'organizaron un golpe d'estáu nel que Sankara foi asesináu, y finó'l procesu de progresu popular nel país.

Darréu apurro n'asturianu'l discursu "Les idees nun se maten", pronunciáu l’8 d’Ochobre de 1987 n’ Ouagadougou, na ceremonia d’alcordanza’l 20 cabudañu de la muerte del Che.  L’ eventu cuntó cola presencia de Camilo Guevara March, fiu del Che.  El propiu Sankara sedría asesináu una semana depués, polo que siempres se dixo aquello de que "Sankara yera'l Che africanu", dao qu'inda güei ye una figura almirada y remembrada en toa África.

 

"Les idees nun se maten"

Esta mañana, modestamente, vinimos a inaugurar esta amuesa qu'intenta delliniar la vida y obra de Che. Coles mesmes queremos dicir güei al mundu enteru que pa nós Che Guevara nun ta muertu, pues per tol mundu esisten centros onde hai homes que lluchen por más llibertá, más dignidá, más xusticia, más felicidá. Per tol mundu, los homes lluchen contra la opresión, la dominación, contra'l colonialismu, contra'l neocolonialismu y l'imperialismu, contra la esplotación de clase.

Estimaos collacios, xunimos les nueses voces a les de tolos que nel mundu recuerden qu'un día un home llamáu Che Guevara, con tola fe nel so coral, apuntose a la llucha al pie d’ otros homes y llogró asina crear esa chispa que tanto esmoleció a les fuerces d'ocupación nel mundu. Cenciellamente queremos dicir qu'una dómina nueva sonó en Burkina Faso, qu'una realidá nueva ta en marcha nel nuesu país. Unu puede ver asina'l llamáu de Che Guevara, el mesmu que quería prender fueos de llucha perdayures del mundu.

Che foi asesináu con bales, bales imperialistes, sobre’l cielu de Bolivia. Y nós dicimos que pa nós Che Guevara nun morrió.

Una de les guapes frases que remembren los revolucionarios, los grandes revolucionarios cubanos, ye la qu'el so collaciu, el so compañeru de llucha, el so hermanu, el mesmu Fidel Castro repitiera. Una frase qu'él garró un día de llucha de boca d'un home de pueblu, un oficial de Batista, quien, a pesar de pertenecer a esi exércitu reaccionariu y represivu, supo faer una xuntanza coles fuerces que lluchaben pola felicidá del pueblu cubanu. Cuando los qu'intentaren l'asaltu contra'l cuartel Moncada acababen de fracasar, y teníen que carecer el supliciu poles armes del exércitu de Batista –teníen de ser fusilaos–, l'oficial a cencielles dixo: “Nun disparen, les idees nun se maten”.

Ye verdá, les idees nun se maten. Les idees nun muerren. Por eso Che Guevara –quien yera una esencia d'idees revolucionaries y d'entrega personal– nun morrió porque güei vinieron ustedes equí [de Cuba] y porque nós inspirámonos n'ustedes.

Che Guevara, arxentín según el so pasaporte, aportó cubanu por adopción, pol sangre y el sudu qu'arramó pol pueblu cubanu. Y, sobremanera, aportó ciudadanu del mundu llibre: el mundu llibre que xuntos tamos en víes de construyir. Por eso dicimos que Che Guevara ye tamién africanu y burkinabe.

Che Guevara llamaba a la so gorra “la boina”. Per casi toa África fixo que se conocieren esa boina y esa estrella. De norte a sur, África recuerda a Che Guevara.

Una mocedá desacobardada –una mocedá sedienta de dignidá, sedienta de valor, sedienta tamién d'idees y d’esa vitalidá que Che simbolizaba n'África– buscó al Che pa beber d'esi manantial, el manantial vivificante que representaba nel mundu esi capitán revolucionariu. Y ente los pocos que tuvieron la oportunidá, que tuvieron l'honor de tar cerca de Che, y que tán inda en vida, dalgunos tán güei equí ente nós.

Che ye burkinabe. Ye burkinabe porque participa na nuesa llucha. Ye burkinabe porque les sos idees inspírennos y tán inscrites nel nuesu Discursu d'Orientación Político. Ye burkinabe porque la so estrella ta fixa nel nuesu emblema. Ye burkinabe porque una parte de les sos idees vive en caún de nós na llucha diaria que llibramos.

Che ye un home, pero un home que supo amosanos y educanos na idea de que podíamos atrevenos a tener enfotu en nós mesmos, enfotu nes nueses capacidaes. Che ta ente nós.

Asina que quixera dicir: ¿qué ye'l Che? Pa nós Che ye sobremanera convencimientu, convencimientu revolucionariu, la fe revolucionaria no qu'ún fai, el convencimientu de que la victoria ye nuesa, de que la llucha ye'l nuesu recursu.

Che ye tamién humanismu. L'humanismu: esa arrogancia que s'espresa, esa entrega que fixo de Che non solo un combatiente arxentín, cubanu, internacionalista, sinón tamién un home, con tol calor humano.

Che ye tamién, y sobremanera, la esixencia. La esixencia de daquién que tuvo la suerte de nacer nuna familia acomodada pero que supo dicir non a eses tentaciones, que supo dá-y el llombu a lo fácil y que, otra manera, amosó ser un home que facía causa común col pueblu, un home que facía causa común cola miseria de los demás. La esixencia de Che: ye daqué que tien d'inspiranos más que nada.

Porque son el convencimientu, l'humanismu y la esixencia lo que faen que sey Che. Y quienes saben xuntar nellos eses virtúes, quien saben xuntar nellos eses cualidaes, esi convencimientu, esi humanismu y esa esixencia, pueden dicir que son como Che: homes ente los homes, pero sobremanera revolucionarios ente los revolucionarios.

Acabamos de ver eses semeyes que rellaten lo meyor que pueden una parte de la vida de Che. A pesar de la fuerza de la so espresión, eses imaxes queden mudes ante la parte más determinante del home, la mesma contra la que l'imperialismu apuntaba. Les bales apuntaben muncho más escontra l'espíritu de Che qu'escontra la so imaxe. La so semeya ta por tol mundu. La so semeya ta na mente de toos y la so figura ye una de les más familiares. Entós tenemos de procurar conocer meyor a Che.

Averémonos pos a Che. Averémonos a él non como lo fadríamos con un dios, nin como lo fadríamos con esta idea, esta imaxe que ta penrriba de los homes, sinón faigámoslo con un sentimientu de que tamos ante un hermanu que nos fala y con quien podemos falar. Procuremos qu'a los revolucionarios mos inspire l'espíritu de Che, por que ellos sían tamién internacionalistes, por que sepan tamién cómo construyir al pie d’otros homes la fe: fe na llucha pola tresformación, contra l'imperialismu, contra'l capitalismu.

Tocantes a ti, compañeru Camilo Guevara, verdaderamente nun podemos dexanos dicir que yes un fíu güérfanu. Che perteneznos a toos. Perteneznos como patrimoniu de tolos revolucionarios. Asina que nun te puedes sentir solu y abandonáu,col curiáu col que vas atopar en caún de nós –esperamos– a los hermanos, les hermanes, los collacios y collacies. Al pie de nós yes ciudadanu de Burkina, porque siguisti de forma resuelta les buelgues de Che, el Che de toos nós, el padre de toos nós.

A lo último, recordemos a Che a cencielles como esi romanticismu eternu, esa mocedá tan fresca y tan vivificante, y coles mesmes esa lluz, esa sabiduría, esa devoción que sólo los homes fondos, homes de coral, pueden tener. Che yera la mocedá de 17 años. Pero Che yera igualmente la sabiduría de 77 años. Esta alianza xuiciosa ye la que tenemos de tener permanentemente. Che yera'l corazón que falaba y yera tamién el brazu brengosu y desacobardáu qu'actuaba.

Collacios, quixera estimar a los nuesos amigos, a los compañeros cubanos, l'esfuerzu que fixeron pa venir a axuntase con nós. Quiero estimar a toos aquellos que percorrieron miles de kilómetros, que cruciaron los mares p'atopase equí en Burkina Faso pa recordar a Che.

Igualmente quiero estimar a toos aquellos que, poles sos contribuciones personales, van procurar qu'esti día nun sía a cencielles una fecha nel calendariu, sinón sobremanera que sían díes, munchos díes del añu, munchos díes al traviés de los años y los sieglos, por que viva eternamente l'espíritu de Che.

Compañeros, d'últimes quixera espresar la mio gayola porque inmortalizamos les idees de Che equí n’ Ouagadugu con esta cai que bauticemos Che Guevara.

Pero cada vez que pensemos en Che, tratemos de ser como él y de faer qu'alique l'home, el combatiente. Y, sobremanera, cada vez que tengamos la idea d'actuar como él al refugar los bienes burgueses que pretenden remananos, pero tamién na educación y la disciplina rigurosa de la ética revolucionaria: cada vez que tratemos d'actuar asina, vamos sirvir meyor les idees de Che, vamos espardeles meyor.

¡Patria o muerte, vamos vencer!

Escontra’l tercerposicionismu (o por qué nun val el “nin d’izquierdes nin de dereches”)

Últimamente venimos güeyando un ciertu resurdimientu d’aquello del “nin d’izquierdes nin de dereches” y otros llemes bien conocíos a lo llargo de la hestoria. Esti tipu de discursos topen un nome común nel “tercerposicionismu” o “tercer vía”, movimientos que s’autodenomen “nin d’izquierda nin de derecha”, y que teóricamente refuguen tanto espresiones capitalistes como comunistes o anarquistes.

Y digo teóricamente, porque la hestoria diz lo contrario: al final esti tipu de movimientos “nin d’izquierdes nin de dreches”  acaba siendo’l perru presa del capital, y asitiándose nel tarrén de la ultradrecha. Como exemplu, dicir que baxo esta vía atopamos hestóricamente movimientos tan nefastos como’l facismu, el nacional-socialismu, el falanxismu, el sinarquismu mexicanu, la Guardia de Fierro rumana y tantos otros en numberosos países, con un discursu calcáu y basáu nel ultranacionalismu del estáu correspondiente, el racismu, machismu,etc,  y posiciones pseudoanticapitalistes que, cuando lleguen el poder, amosen ser tolo contrario: el salvavides de la burguesía.

El “nin d’izquierdes nin de dreches” ye una forma d’interclasismu, o lo que ye lo mesmo, amestar organizaciones y razonamientos de calter “conciliador”, qu’apelen al bien común del país. Sicasí, yo entrúgome: ¿cómo ye posible consiguir el bien común d’Asturies baxo un sistema clasista favoratible a la burguesía? ¿De verdá tenemos que buscar “confluyir” coles mesmes élites que lleven munches décades reprimiéndonos tanto como asturianos, como clase obrera?

Les élites económiques y la so representación política enxamás miraron p’Asturies como dalgo más qu’un cachu tierra del que sacar beneficiu cuando ye posible. Enxamás ficieron otra cosa que sofitar tou tipu de rexímenes y gobiernos claramente perxudiciales p’Asturies a tolos niveles, como per otru lláu correspuende a esta clase dominante. El mal nun ye “España” como ente abstractu. El mal ye la so representación d’una élite espeyu del sistema capitalista, que puxa por España como’l proyeutu político-económicu que caltenga los sos intereses de clase.

El mal, poro, ye un sistema capitalista que mos oprime social y culturalmente al traviés de les sos distintes ferramientes, y entós yo entrugo: ¿cómo se puede plantegar l’interclasismu como igua a una situación que precisamente requier de soluciones de clase que pongan igua a la opresión nacional y de clase?

Que nós, clase obrera, vayamos xuntos de la manina colos Cosmen y compañía, sólo significa daqué: firmar la sentencia de muerte d’esti país. ¿Pensamos que nun van a fagocitanos, que va a apaecése-yos l’espíritu santu y de sópitu tornase esmolecíos polos sos “siervos” y por Asturies como dalgo más qu’un territoriu con intereses económicos a aprovechar?

Si n’Asturies el movimientu nacionaliegu modernu tuvo un orixe claramente obreru, y entá lu caltién, ye precisamente porque sólo la clase obrera lluchó pol presente y pol futuru d’esti país nes sos distintes estayes. Enxamás vamos ver un movimientu de lliberación que tamién ameste a la burguesía, porque nin esta ta interesada na llibertá del pueblu asturianu, nin dichu movimientu sedría más qu’una patraña, una gran mentira dirixida al caltener los privilexos de los mesmos que mos afueguen.

En definitiva, ye imprescindible que como asturianos y como clase obrera sepamos combatir cualquier tipu d’espresión “conciliadora” pa coles élites, porque’l “nin d’izquierdes nin de dreches” tien un usu y unos fechos hestóricos venceyaos a movimientos nefastos pa la clase obrera. Y n’Asturies, col populismu centraliegu y nacionalista español  d’UPyD yá metíos nel parllamentu, espresiones populistes como FAC, y la "izquierda" de PSOE ya IU –que nel casu’l PSOE prautica un nacionalismu español radical-, tenemos un bon caldu de cultivu pa esti tipu de discursos supuestamente patrióticos qu’al final acaben nuna suerte de “neocovadonguismu” ranciu, y na complicidá pa cola élite que mos mata como pueblu y como clase social.