Javier l’Ausente

Los caberos quince meses foron “movíos” nel panorama políticu asturianu. Y pongo movíos ente comines porque, realmente, tuvimos inestabilidá, l’ascensu de FAC al poder del gobiernu asturianu, menos d’un añu de gobiernu inoperativu pol bloquéu parllamentariu del restu de fuercies, elleiciones el 25 de Marzu, cayida de los casquistes, entrada na Xunta del secretariu de Rosa Díez n’Asturies, y gobiernu de nueu pa la FSA cola inestimable collaboración d’Izquierda Xunida, qu’a la postre camudaría’l so Coordinador depués de garantizar un retiru doráu nel senáu pa Chusín Iglesias, y d’UPyD, esos centralistes neofalanxistes que se presenten a les autonómiques pa dinamitanos dende dientru.

Asina, too condensao a grandes rasgos nun párrafu, ye lo que tuvimos nel caberu añu. Avezaos como tábemos al “birreinatu” –con b de babayos- FSA-IU, foi muncho, pero nel tarrén estrictamente gubernamental, poca cosa tuvimos de provechu, poca cosa de la que los asturianos y asturianes podamos beneficianos. Más bien al contrariu.

Durante la breve presidencia de Cascos, dende la oposición criticábase qu’Asturies nun tenía gobiernu. Y en parte, yera asina, había un gobiernu inoperante nes grandes custiones, porque elles necesitaben del sofitu d’otres fuercies parllamentaries, fechu que nun ocurrió pola pinza PSOE-PP-IU qu’echó abaxo un gobiernu que, d’otru lláu, fizo lo reglamentario cuando camuda la fuerza dominante nel réxime: sustitución de cargos nos puestinos, nueva distribución de les perres, y sí, eliminación de dalgún comederu “socialista”, de la mesma manera que se quixo tomar rumbos indeseaos dexando ensin aliendu económicu la RTPA, siguiendo les táutiques etnocides de la FSA no llingüístico/cultural o intentando dá-y emburrión a la educación concertada.

Sicasí, llegó’l 25-M, los nacionalistes pegámonos la enésima ostia, los neofalanxistes entraron na Xunta, IU medró, FAC retrocedió, el PP dio por bono quedar per detrás de Cascos satisfechos porque perdería’l gobiernu, y el PSOE, que cola so rede clientelar texía durante años y años, más la tradición de votantes inamovibles cola que cunten, caltuvo bastante bien el tipu, asegurándose posteriormente’l gobiernu d’Asturies, col qu’eufemísticamente denomaben “presidente tranquilu”, Javier Fernández, al que realmente hai qu’apodar “el presidente ausente”.

Dende entós, poca cosa vimos, un suspiru perequí, unes imaxes nes que sal per detrás de Rubalcaba demientres esti falaba a los medios nes sos vacancies en Llanes, una reprimenda digna de parbulariu al gobiernu central pol recorte de fondos mineros, y otru suspiru pa dicir qu’ellos cumpliríen la llei y que los recortes yeren un mandatu del gobiernu, qu’elli poco podía facer y qu’a grandes rasgos acataríalos.

Pa eso, valíanos más suprimir la presidencia, y dexar d’amu a Gabino, que diba pintar igual de poco, pero al menos daría más xuegu, y estimularía’l consumu de bebides espirituoses a lo llargo y ancho de la nuesa gloriosa nación. Tenemos una especie d’alministrador territorial que, simplemente, s’encarga de caltener unos mínimos de furrulamientu n’alministración pública, de dir recuperando los comederos perdíos, y d’executar lo que-y manden dende’l gobiernu estatal.

Como nun podía ser menos na FSA, tenemos un gobiernu más papista que’l papa, y que como denuncien sindicatos de, por exemplu, el seutor sanitariu, ta faciendo recortes penrriba de lo dictao pol PP. Nin una protesta contundente, nin un ánimu de realizar dalguna aición d’insumisión anque seya simbólica al estilu del so colega Patxi López, que nun son gran cosa, pero polo menos amosar un poco de personalidá, de que tenemos un presidente. Tamién ye verdá, d’otru lláu, que pa qué finxir lo que nin en sueños sedría realidá… 

Poro, demientres les grandes industries del país amenacen con colar si nun se revisa la tarifa llétrica, demientres el seutor mineru agoniza ante los retayos nes ayudes, demientres esfarrapen FEVE y el serviciu públicu qu’otorga, demientres ALSA se columpia y chantaxea col pieslle de llinies d’autobús, demientres una curripa de “ganaderos” se dedica a predicar l’esterminiu del llobu n’Asturies, demientres se despiden miles d’interinos n’alministración pública, demientres siguen atacando la poca democracia qu’hai col recorte de conceyales, cola supresión de mancomunidaes, la posible fusión de conceyos o’l pasu de la so tutela al “Principáu”, demientres tenemos decenes de conflictos llaborales en Thyssen, Starglass, Duro Felguera, Uminsa, Coto Cantábricu, Ipezsa, etc… Javierín sigue suspirando, sigue siendo’l “presidente tranquilu” que nun trae más qu’inoperancia ya inutilidá al pueblu asturianu.

Y la cosa, murniamente pa los y les asturianes, va pa llargo, quédanos muncho qu’aguantar, y non precisamente bono. Si queremos intentar defendenos, aparar la ofensiva, facer dalguna conquista, nun asperemos cuntar nin siquier cola más mínima intención del “gobiernu” d’Asturies.

Sólo mos queda’l camín de la organización, d’afondar na llucha obrera, de sofitanos en conceptos como la solidaridá, l’autoorganización, l’asociacionismu, el cooperativismu, etc., porque poco podemos asperar d’una cadarma gubernamental somorguiada a otra superior, qu’al mesmu tiempu ye una construcción de la burguesía pa la defensa y puxu de los sos intereses y privilexos.

En fin, como diría’l gran Xulio Vixil en Radio Sele, “menos mal que mos queda Portugal, allá pa la zona de Miranda…”. Porque si de Javier l’Ausente depende, vamos arreglaos…