domingo, 5 de mayo de 2013

La llucha polos derechos políticos



El testu que vien darréu ye una torna a la llingua asturiana d’un estractu sacáu del llibru “Los fundamentos sociales de la cuestión femenina y otros escritos”, obra na que se recueyen trabayos teóricos d’Alexandra Kollontai alrodiu del feminismu y la cuestión de la muyer dende una perspeutiva marxista.

Kollontai foi bolchevique, y participante na revolución qu’afitó la construcción de la URSS. Como Comisaria del Pueblu pa l’Asistencia Pública puxó pol ampliu desendolcu de los drechos de les muyeres, -práuticamente inesistente na etapa de la Rusia Zarista-. La so posterior participación na Oposición Obrera fizo que perdiera influyencia, hasta qu’en 1923 pasó al tarrén diplomáticu, siendo la primer muyer embaxadora de la hestoria.

Nota d’entamu: Cuando Kollontai fala de “les feministes”, ta refiriéndose a les conceiciones reformistes d’esi movimientu, les que nun consideren el capitalismu como’l raigañu de la opresión de xéneru.



La llucha polos derechos políticos 

Les feministes respuenden a les nueses crítiques diciendo: inclusive si-vos paecen enquivocaos los argumentos que tán detrás de la nuesa defensa de los derechos políticos de les muyeres, ¿puede amenorgase la importancia de la demanda en sí, que ye igual d'urxente pa les feministes y pa les representantes de la clase trabayadora? ¿Nun pueden les muyeres de dambos bandos sociales, pol bien de les sos aspiraciones polítiques comunes, superar les barreres del antagonismu de clase que les dixebren? ¿Nun van ser capaces de xuru de llibrar una llucha común contra les fuerces contraries que les arrodien? La división ente la burguesía y el proletariáu ye tan inevitable como otres cuestiones que mos afeuten, pero nel casu d'esti asuntu particular les feministes creyen que les muyeres de les distintes clases sociales nun tienen diferencies. 

Les feministes siguen tornando a estos argumentos con tristura y desconciertu, viendo nociones preconcebíes de llealtá partidista na negativa de les representantes de la clase trabayadora a xunir les sos fuerces con elles na llucha polos derechos políticos de les muyeres. ¿Ye realmente ésti'l casu? ¿Esiste una identificación total de les aspiraciones polítiques o, nesti casu, al igual qu'en tolos demás, l'antagonismu la creación d'un exércitu de muyeres indivisible, perriba de les clases? Tenemos que responder a esta cuestión primero que podamos definir les táutiques que les muyeres proletaries van a emplegar p’algamar drechos políticos pal so sexu. 

Les feministes declaren tar del lláu de la reforma social, y dalgunes d'elles inclusive dicen tar a favor del socialismu —nun futuru alloñáu, de xacíu— pero nun tienen la intención de lluchar ente les files de la clase obrera pa consiguir estos oxetivos. Les meyores d'elles creyen, con inocente sinceridá, qu'una vegada que los asientos de los diputaos tean al so algame van ser capaces de curar les llagues sociales que se formaron, na so opinión, por cuenta de que los homes, col so egoísmu inherente, fueron los dueños de la situación. A pesar de les bones intenciones de grupos individuales de feministes escontra'l proletariáu, siempres que se plantegó la cuestión de la llucha de clases dexaron el campu de batalla con medrana. Reconocen que nun quieren interferir en causes ayenes, y prefieren retirase al so lliberalismu burgués que-yos ye tan cómodamente familiar. 

Por muncho que les feministes burgueses traten de reprimir el verdaderu oxetivu de los sos deseos políticos, por muncho qu'aseguren a les sos hermanes menores que la participación na vida política promete beneficios inconmensurables pa les muyeres de clase trabayadora, l'espíritu burgués que trescala tol movimientu feminista da un coloríu de clase inclusive a la demanda d'igualdá de derechos políticos colos homes, que podría paecer una demanda xeneral de les muyeres. Distintos oxetivos ya interpretaciones de cómo tienen d'usase los derechos políticos crea una muria insalvable ente les muyeres burgueses y les proletaries. Esto nun contradiz el fechu de que les xeres inmediates de los dos grupos de muyeres coincidan en cierta midida, persabiendo que los representantes de toles clases qu'aportaron al poder políticu esfórciense sobremanera en llograr una revisión del Códigu Civil, qu'en cada país, en mayor o menor midida, discrimina a les muyeres. Les muyeres puxen por consiguir cambeos llegales que permitan condiciones llaborales más favorables pa elles, caltiénense xuníes contra les regulaciones que llegalicen la prostitución, etc. Sicasí, la coincidencia d'estes xeres inmediates ye de calter puramente formal. Asina, l'interés de clase determina que l'actitú de los dos grupos escontra estes reformes sía fondamente contradictoria.

L'instintu de clase —digan lo que digan les feministes— siempres demuestra ser más poderosu que'l noble entusiasmu de les polítiques “percima de les clases”. En cuantes que les muyeres burgueses y les sos “hermanes menores” son iguales na so desigualdá, les primeres pueden, con total sinceridá, faer grandes esfuerzos en defender los intereses xenerales de les muyeres. Pero, una vegada que se superaren estes barreres y les muyeres burgueses aportaren a l'actividá política, les actuales defensores de los derechos de toles muyeres” van a convertise en defensores entusiastes de los privilexos de la so clase, van a quedar contentes con dexar a les hermanes menores ensin nengún drechu. Asina, cuando les feministes falen coles muyeres trabayadores alrodiu de la necesidá d'una llucha común pa consiguir dalgún principiu xeneral de les muyeres”, les muyeres de la clase trabayadora tán naturalmente roceanes.

No hay comentarios:

Publicar un comentario