Diccionariu del Nuevu Orde Mundial

Esti testu foi escritu por Eduardo Galeano nel añu 1992, nuna época clave pol desmantelamientu del socialismu na Unión Soviética y en práuticamente’l restu de países que calteníen esi sistema. Con dosis de crítica ya ironía, Galeano apurre unes cuantes definiciones alrodiu d’esi “Nuevo Orde”, qu’en realidá lleva sieglos esistiendo.

Diccionariu del Nuevu Orde Mundial

Apartheid. Sistema orixinal d'África del Sur, destináu a evitar que los prietos invadan el so propiu país. El Nuevu Orde aplícalu, democráticamente, contra tolos probes del mundu, sía cual fora'l so collor. 

Bandera. Contién tantes estrelles que yá nun queda llugar pa les barres. Xapón y Alemaña estudien diseños alternativos. 

comerciu, Llibertá de. Droga estupefaciente torgada nos países ricos, que los países ricos venden a los países probes. 

consumu, Sociedá de. Prodixosu envase enllenu de nada. Invención d'altu valor científicu, que dexa suprimir les necesidaes reales, per aciu la oportuna imposición de necesidaes artificiales. Sicasí, la Sociedá de Consumu xenera cierta resistencia nes rexones más atrasaes. (Declaración de don Pampero Conde, nativu de Cardona, Uruguai: «Pa qué quiero fríu, si nun tengo sobretou».) 

costos, Cálculu de. Envalorar en 40 millones de dólares el costu mínimo d'una campaña electoral pa presidente de los Estaos Xuníos. Nos países del Sur, el costu de fabricación d'un presidente resulta considerablemente menor, por cuenta de l’ausencia d'impuestos y el baxu preciu de la mano d'obra. 

Creación. Delitu cada vez menos avezáu. 

Cultura universal. Televisión. 

Desarrollu. Nes sierres de Guatemala: Nun se precisa matar a toos. Dende 1982, nós dimos desarrollu al 70% de la población, mientres matamos al 30% (Xeneral Héctor Alejandro Gramajo, ex ministru de Defensa de Guatemala, apocayá graduáu nel cursu de Rellaciones Internacionales de la Universidá de Harvard. Publicáu en Harvard International Review, edición de primavera de 1991). 

Delda esterna. Compromisu que cada llatinoamericanu contrái al ñacer, pola módica suma de 2 000 dólares, pa financiar el garrote col que va ser cutíu. 

dineru, Llibertá del. Dízse del Rei Herodes sueltu nuna fiesta infantil. 

Gobiernu. Nel Sur, institución especializada nel espardimientu de la probitú, que dacuando s'axunta colos sos pares pa festexar les resultancies de los sos actos. La última Conferencia Rexonal sobre la Probitú, qu’axuntó n'Ecuador a los gobiernos d'América Llatina, reveló que se llogró condergar a la probeza a un 62,3 per cientu de la población llatinoamericana.La Conferencia cellebró la eficacia del nuevu Métodu Integráu de Midida de la Probitú. (MIMP). 

Guerra. Castigu que s'aplica a los países del Sur cuando quieren xubir los precios de los sos productos d'esportación. El más recién escarmientu foi esitosamente prauticáu contra Iraq. Pa correxir la cotización del petróleu foi necesario producir 150 mil daños collaterales, vulgarmente llamaos víctimes humanes, a entamos de 1991. 

Guerra fría. Yá yera. Precísense nuevos enemigos. Interesaos dirixise al Pentágonu, Washington DC, o a la comisaría del so barriu. 

Hestoria. El 12 d'ochobre de 1992 el Nuevu Orde Mundial cumplió 500 años. 

ideoloxíes, Muerte de les. Espresión que comprueba la definitiva estinción de les idees cafiantes y de les idees polo xeneral. 

Impunidá. Pagu que s'otorga al terrorismu, cuando ye d'Estáu. 

Intercambiu. Mecanismu que dexa a los países probes pagar cuando merquen y cuando venden tamién. Una computadora cuesta, anguaño, trés veces más café y cuatro veces más cacáu que va cinco años (Bancu Mundial, cifres de 1991.) 

life, American way of. Manera de vida típico de los Estaos Xuníos, onde se prautica poco.

Mercáu. Llugar onde s'afita'l preciu de la xente y otres mercancíes. 

Mundu. Llugar peligrosu. «A pesar de la desapaición de l'amenaza soviética, el mundu continua siendo un llugar peligrosu.» (George Bush, mensaxe añal al Congresu, 1991.) 

mundu, Mapa del. Un mar de dos orielles. Al Norte, pocos con muncho. Al Sur, munchos con poco. L'Este que llogró dexar de ser Este, quier ser Norte, pero a la entrada del Paraísu un cartelu diz: Enlleno. 

Naturaleza. Los arqueólogos alcontraron ciertes muertes. 

Orde. El mundu gasta seis veces más fondos públicos n'investigación militar que n'investigación mélica. (Organización Mundial de la Salú, datos de 1991.) 

Poder. Rellación del Norte col Sur. Dízse tamién de l'actividá que nel Sur exerce la xente del Sur que vive y gasta y piensa como si fuera del Norte. 

Riqueza. Según los ricos, nun produz la felicidá. Según los probes, produz daqué bastante paecío. Pero los estadistes indiquen que los ricos son ricos porque son pocos, y les fuerces armaes y la policía ocúpense d'esclariar cualesquier posible tracamundiu al respective. 

Venenu. Sustancia qu'anguaño predomina nel aire, l'agua, la tierra y l'alma.

Los superrevolucionarios

Esti testu ye una torna a la llingua asturiana d’un artículu de Fidel Castro, con fecha 3-9-2007. Un llúcidu y breve analís interesante de lleer.

Los superrevolucionarios

Lleo con procuru tolos díes les opiniones sobre Cuba d'axencies tradicionales de prensa, incluyíes les de los pueblos que formaron parte de la URSS, les de la República Popular China y otres. Lléguenme noticies d'órganos de prensa escrito n'América Llatina, España y el restu d'Europa.

El cuadru ye cada vez más inciertu ante la medrana d'una recesión enllargada como la de los años que siguieron a 1930. El gobiernu d'Estaos Xuníos recibió'l 22 de xunetu de 1944 los privilexos otorgaos en Bretton Woods a la potencia militar más poderosa: emitir el dólar como moneda internacional de cambéu. La economía d'esi país taba intacta dempués de la guerra en 1945, y disponía de casi'l 70 por cientu de les reserves n'oru del mundu. Nixon decidió xunillateralmente, el 15 d'agostu de 1971, suspender la garantía n'oru por cada dólar emitíu. Con eso financió la matanza de Vietnam nuna guerra que costó más de 20 veces el valor real de les reserves n'oru que-y quedaben. Dende entós la economía d'Estaos Xuníos caltiénse a cuenta de los recursos naturales y los aforros del restu’l mundu.

La teoría de la medra continua de la inversión y el consumu, aplicada polos más desarrollaos a los países onde la inmensa mayoría ye probe, arrodiada pol luxu y los privilexos d'una minoría de ricos, non sólo ye humildante, sinon tamién destructiva. Esi saquéu y les sos desastroses consecuencies ye la causa de la rebeldía xorreciente de los pueblos, anque bien pocos conozan la hestoria de los fechos.

Les intelixencies más dotaes y cultivaes s’inclúin na llista de recursos naturales y tán tarifaes nel mercáu mundial de bienes y servicios.

¿Qué asocede colos superrevolucionarios de la llamada estrema esquierda? Dalgunos son asina pola falta de realismu y el prestor de suañar coses dulces. Otros nun tienen nada de suañadores, son espertos na materia, saben lo que dicen y pa qué lo dicen. Ye una trampa bien armada na que nun hai que cayer. Reconocen les nueses meyores como quien da llimosnes. ¿Tienen realmente falta d'información? Nun ye asina. Puedo asegura-yos que tán absolutamente informaos. En determinaos casos, la supuesta amistá con Cuba déxa-yos tar presentes en numberoses xuntes internacionales y aldericar con cuantes persones del esterior o del país deseyen facelo, ensin torga dalguna del nuesu vecín imperial a namái 90 milles de les mariñes cubanes.

¿Qué aconseyen a la Revolución? Venenu puru. Les fórmules más típiques del neolliberalismu.

El bloquéu nun esiste, paeciera una invención cubana.

Subestimen la xera más importante de la Revolución: la so obra educacional, el cultivu masivu de les intelixencies. Caltienen la necesidá de persones capaces de vivir realizando trabayos simples y rudos. Subestimen los resultaos y desaxeren los gastos n'inversiones científiques. O daqué pior: ignórase'l valor de los servicios de salú que Cuba empresta al mundu, onde en realidá, con recursos modestos, la Revolución esnuda'l sistema impuestu pol imperialismu, qu'escarez de personal humano pa llevalo alantre. Aconséyense inversiones que son ruinoses, y los servicios qu'apurren, como l'arriendu, son práuticamente de baldre. De nun detenese a tiempu les inversiones foriates en viviendes, construyiríense decenes de miles ensin más recursos que la venta previa de les mesmes a foriatos residentes en Cuba o nel esterior. Sedríen amás empreses mistes dirixíes por otra llexislación creada pa empreses granibles. Nun habría llendes pa les facultaes de compradores como propietarios. El país suministraría los servicios a tales residentes o usuarios, pa lo cual nun se necesitaríen les conocencies d'un científicu o un especialista n'informática. Munchos de los agospiamientos podríen ser mercaos polos órganos d'intelixencia enemigos y los sos aliaos.

Nun puede prescindise de delles empreses mistes, porque controlen mercaos que son imprescindibles. Pero tampoco puede anubrise con dineru'l país ensin vender soberanía.

Los superrevolucionarios que receten tales melecines ignoren de forma deliberada otros recursos verdaderamente decisivos pa la economía, como ye la producción creciente de gas, que yá purificao puede convertise nuna fonte inestimable de lletricidá ensin afeutar el mediu ambiente y apurriendo cientos de millones de dólares cada añu. De la Revolución Enerxética promovida por Cuba, de vital y decisiva importancia pal mundu, nun se diz una pallabra. Lleguen inda más lloñe: ven na producción cañera, un cultivu que se caltuvo en Cuba con mano d'obra semiesclava, una ventaya enerxética pa la isla, capaz de compensar los elevaos precios del diésel qu'esbardien ensin frenu los automóviles d'Estaos Xuníos, Europa Occidental y otros países desenvueltos. Aguíyase l'instintu egoísta de los seres humanos, mientres los precios de los alimentos dóblense y tripliquen.

Naide foi más críticu que yo pa cola nuesa mesma obra revolucionaria, pero enxamás me verán asperar favores o perdones del pior de los imperios.

Asturies, país ensin llei (cuando convién)

Oyemos muncho nos medios too aquello de que “hai que respetar la llei”, “seguir los cauces democráticos”, y demás pallabrería que nun busca más que caltener los privilexos de la clase dominante. Tamién oyemos muncho al nuesu presidente, Don Javier Fernández, meter nos sos discursos elementos d’esi calter en temes como’l posible referéndum soberanista catalán, o “les virtudes de l’orde y la estabilidá” que nos proporciona’l toupoderosu PSOE cuando nos referimos al panorama políticu asturianu. Tamién hai que dicir qu’esi discursu encaxa dafechu en cualquier movimientu o corriente ideolóxica conservadora, y en definitiva, cualquiera que seya partidaria del orde burgués establecíu.

Sicasí, tamién vemos cómo lo de cumplir la llei solamente s’aplica n’aquellos casos nos qu’interesa al poder. Dizse que “quien fizo la llei, fizo la trampa”, y ye una gran verdá, dao que sólo se cumplen aquelles qu’interesa y cuando interesa al poder. Qué vamos dicir d’esos drechos a la vivienda o al trabayu que supuestamente mos garantiza la constitución, pero nun son los únicos.

Nel casu asturianu vémoslo bien claro, y amás d’una forma desvergoñada, en munchos temes. Un casu bien curiosu ye’l de la descripción d’Asturies nel estatutu como “Comunidá hestórica”, cuando na constitución namái se fala de rexones y nacionalidaes. Guapa manera de poner dalgo ensin conteníu, de llavase les manes, y de ñegar la realidá hestórica y actual d’esti pueblu. 

Pero nun ye l’únicu casu, y ye que quiciabes na cuestión llingüística tean los episodios más claros y desvergoñaos d’escaecer la llei cuando convién. Tenemos una Llei d’Usu y Promoción, bien enllena d’ambigüedaes d’un lláu, y d’otru lláu incumplida repetidamente en práuticamente toles estayes. Un bon exemplu ye’l de la toponimia, entá en procesu de recuperación, pero qu’en munchos conceyos yá algamó la so denomación popular en detrimentu de la castellanizada impuesta. 

Estos díes ta d’actualidá’l Parador de Courias pola so inauguración. L’únicu topónimu oficial, l’únicu llegal, ye “Courias”, pero Paradores decidió emplegar “Corias”. Na mesma llinia, los medios de comunicación de mases empleguen práuticamente de forma xeneralizada esi topónimu castellanizáu, inorando la llei y faltando al respetu al pueblu asturianu con ello. Sicasí, nun pasa nada, la impunidá ye total, cuestión que ye más grave entá cuando falamos de que l’incumplimientu vien de parte d’instituciones o empreses públiques.

El casu contrariu ta cuando Bimenes o Nava declaren l’asturianu llingua oficial nel so territoriu, o cuando se quier algamar dalgún tipu d’avance pa la nuesa llingua nel tarrén educativu/universitariu. Entós ye cuando’l poder se pon seriu y rigurosu, y aplica cualquier furacu llegal que pueda torgar estos avances. Tal ye la contradicción ya hipocresía d’esti sistema.

Al final lo que podemos deprender de too esto, ye que les lleis nesti sistema tán feches non sólo al serviciu del poder, sinon que tamién tán a la so dimposición pa ser incumplíes cuando-yos pete. La única manera d’evitar esto ye qu’haya un poder alloñáu d’esos intereses, qu’execute un verdaderu procesu de recuperación llingüística y cultural, pero que tamién faiga efeutives tol restu de drechos que nos deberíen corresponder.

Construyir el poder popular que faiga les lleis pal interés común y que faiga posible la xusticia social y la dignidá nacional, esto ye, qu’execute esa llegalidá. Esi ye’l camín pa qu’Asturies dexe de ser un país ensin llei (cuando convién).

Patriotismu y llucha obrera

Darréu apurro la torna a la nuesa llingua del testu "Patriotismu y llucha obrera". El so autor ye James Connolly, una de les figures más importantes na hestoria del movimientu emancipatoriu irlandés. Amás ye ún de los precursores dientro d'esi movimientu de la tesis de que p'algamar una verdadera independencia, hai que llibrase del capitalismu y aquellos axentes que lu faen posible. Nun-y faltaba razón, si güeyamos el panorama d'esa islla anguaño: desigualdaes sociales, opresión cultural vixente pola influyencia imperialista del Reinu Xuníu, "rescates" económicos por parte d'instituciones supranacionales, etc. Irlanda sigue necesitando executar la esencia del pensamientu de Connolly, lo mesmo que'l restu de pueblos en llucha pola llibertá.

Patriotismu y llucha obrera

¿Qué ye'l patriotismu? Querer a la patria, responderíen dalgunos. Pero, ¿qué significa eso de 'querer a la patria'? “El ricu”, diz un escritor francés, “quier al so país porque entiende que-y debe daqué a él,  ente que'l probe quier al so país porque cree que ye él quien-y debe daqué”. La reconocencia de la xera que-y debemos a la nuesa patria ye, al mio entender, l'auténtica fonte de toa aición patriótica; y la nuesa 'patria', bien entendida, nun significa a cencielles el llugar sobre la tierra d'onde provién el nuesu parentescu, sinon que tamién entiende a tou home, muyer y neñu que la so vida colectiva constitúi la esistencia política de la nuesa patria. L'auténticu patriotismu busca'l bien de cada persona na felicidá de toos, y va a la escontra del deséu egoísta de los bienes materiales que namái se pueden llograr al traviés de la esplotación de los mortales menos favorecíos.

So la lluz d'esta definición, ¿cuáles son les reivindicaciones del patriotismu de la clase acomodao n'Irlanda? El porcentaxe de los salarios selmanales de £1 selmanal o menos, polos trabayadores de los trés reinos ye: Inglaterra, 40%; Escocia, 50%; ya Irlanda, 78%. N'otres palabres, trés de cada cuatro asalariaos n'Irlanda recibe menos de £1 a la selmana. ¿De quién ye la culpa?

¿Quién determina la proporción de los salarios? La rellación ente trabayadores y empléu. Siempres hai un gran escesu de mano d'obra desemplegao n'Irlanda, y por cuenta d’esti fechu'l patrón irlandés ye capaz d'aprovechase de la impotencia de los sos probes compatriotes y obligalos a trabayar por menos de lo que reciben los sos compañeros n'Inglaterra pol mesmu trabayu. 

Los emplegaos poles nueses empreses municipales y otros organismos públicos n'Irlanda vense obligaos polos nuesos conseyeros municipales de clase media –los sos compatriotes– a aceptar salarios d'ente 4 y 8 peniques selmanales menos de los que paguen n'Inglaterra por xeres asemeyaes. Los funcionarios ferroviarios irlandeses reciben ente 5 y 10 peniques menos que los sos compañeros ingleses, a pesar de que los aicionistes de los ferrocarriles irlandeses llogren mayores dividendos que los del inglés más prósperu. En tol trabayu priváu dase la mesma circunstancia. Seyamos claros a esti respeutu. Nun esiste nenguna llei en nengún códigu llegal, nengún poder por nengún tipu de conseyu secretu, nenguna función civil o militar sobre'l control del Primer Ministru, Llugarteniente o Secretariu en Xefe que pueda, busque o barrunte obligar al patrón n'Irlanda a aprovechase de la situación del mercáu llaboral y usalo pa baxar los salarios a los sos trabayadores hasta l'actual nivel d’inanición.

Esta situación ye atribuyible n'esclusiva a l'avaricia de la clase adinerada, que funciona sobre les condiciones creaes pol latifundismu y el capitalismu y caltenida a base de bayonetes foriates, y nin toles desplicaciones posibles xuntes van poder convencer al trabayador intelixente de que la clase que la oprime y conduz a la esclavitú industrial puede, coles mesmes, llevalos haza la llibertá nacional. 

L'auténticu patriotismu busca'l bien de cada persona na felicidá de toos, y va contra'l deséu egoísta de los bienes materiales que namái se pueden llograr al traviés de la esplotación de los mortales menos favorecíos. Ye la misión de la clase obrera'l da-y al patriotismu esti altu y noble significáu. Esto namái puede facelo nuesa clase obrera, al ser la única clase universal que toma a toles persones, entamándose como un partíu políticu propiu, reconociendo la llucha obrera como la piedra angular del nuesu edificiu económicu y el principiu vital de la nuesa aición política.

Dende'l surdimientu del Partíu Socialista Republicanu Irlandés, tamos comprometíos cola independencia nacional como base indispensable de la nuesa emancipación industrial, pero tamos igualmente comprometíos a terminar cola hexemonía d'una clase social que’l so contratu social produz opresión. La nuesa política ye frutu d'una llarga reflexón sobre la hestoria y peculiaridaes del nuesu país. Nun país independiente, la eleición d'una mayoría de representantes socialistes pa l'asamblea llexislativa va significar la conquista del poder políticu pol partíu revolucionariu y, arriendes d'ello, el dominiu de les fuerces militar y policial del Estáu, volviéndose éstes aliaes de la revolución en llugar d'enemigues.

Na obra de reconstrucción social qu'entós se produciría, el poder del Estáu -creáu poles clases privilexaes pa los sos propios intereses de clase– va sirvir al nuevu orde social como arma na so llucha contra los venceyaos a eses clases privilexaes qu'intenten resistise a la estinción gradual del so dominiu.

Ensin ser Irlanda un país independiente, la eleición d'una mayoría de republicanos socialistes nun dexaría, desafortunadamente, los frutos del nuesu trabayu tan fácilmente al nuesu algame. Pero tendría otru efectu, anque puede que non tan importante. Significaría que, por primer vez na hestoria d'Irlanda, una clara mayoría del electoráu responsable de la nación irlandesa –homes capaces d'empuñar armes– espresaríen nes urnes el so deséu de dixebrase del Imperiu británicu. Tal veredictu, nacíu nun tumultuosu y, dacuando, cambiadizu entusiasmu de los grandes mítines  nel ambiente sobriu y xuiciosu de la tranquilidá de les urnes, sonaría por igual nos oyíos de los nuesos gobernantes y de los enemigos del modelu imperial británicu, que nun sobreviviría enforma tiempu dempués de tal llogru. Los sos enemigos interpretaríen el veredictu emitíu nes urnes como un apasionáu llamamientu d'ayuda contra'l opresor, como la insurrección moral del pueblu irlandés, a manera qu'una pequena fuerza espedicionaria y material de guerra pudieren convertise nuna insurrección militar qu'escosaría'l poder del imperiu en casa y fadría que les sos posesiones nel estranxeru siguieren esi exemplu. ¿Cuánto debería tal llamamientu nun tenese en cuenta?

Mentanto, nun hai soluciones temporales pa la nuesa miseria, nengún beneficiu que'l Parllamentu pueda otorgar que nun fuera arrincáu pol mieu a un partíu revolucionariu que busque crear la situación qu'acabo de describir, primero que por cualesquier aición inclusive del más decidíu Partíu pola Autonomía u otru partíu constitucional. Ye por esto que tanto por beneficios actuales y pola llibertá nel futuru, la política revolucionaria ye la meyor. Un partíu que reclame namái una república y actúe según eses intenciones siempres va tar amenaciáu pol peligru de que dalgún astutu estadista inglés pueda, por aciu la proclamación d'una falsa autonomía, desorganizar les fuerces republicanes so unes aparentes concesiones hasta que'l momentu críticu pasara. Pero'l Partíu Socialista Republicanu Irlandés, llamando l'atención sobre los malos inherentes nel modelu social del cual l'Imperiu británicu ye la mayor espresión política, va basar la so propaganda nel descontentu coles capes sociales que namái van terminar cuando l'Imperiu dexe d'esistir y, poro, va enllantar nos sos siguidores un eternu ya indestruyible odiu escontra l'enemigu que se va caltener inalteráu ya indestruyible ante cualquier modelu imaxinable de charranería política.

Una República Socialista Irlandesa debería, poro, ser el glayíu de guerra de tolos nuesos compatriotes que nagüen pola unión y el triunfu del patriotismu y la llucha obrera.