Revillismu y otros males

Tamos en plena crisis del sistema capitalista, y polo tanto ye tiempu de replantegase munches coses, d’implicase más na militancia política por parte de xente qu’enantes nun lo facía, y por supuestu, de buscar el por qué de la situación na que tamos. Dientro de los “por qué”, hai desplicaciones de toa triba, y pa tolos gustos. Hai desplicaciones que nun presten nada al poder, como les vinientes d’ideoloxíes revolucionaries y/o separatistes, y a les que nun dan voz nos medios; pero tamién hai otres desplicaciones más inofensives, que se promocionen y potencien debío a qu’interesa que guañen.

Nos dos grupos atopamos munchos tipos, pero nesti casu vamos centranos nel segundu, el qu’interesa al sistema. Ye ehí onde a diariu lleemos, vemos y escuchamos una bayura d’argumentos y reflexones, más o menos bizarros. Dende que la culpa de la crisis ye de les autonomíes, los coches oficiales y les sovenciones a los sindicatos, que los políticos roben o cobren muncho, que tolos políticos son iguales, y asina, dende les más simplayes, hasta otres con más carga ideolóxica, como les socialdemócrates –del tipu que’l problema ta na falta de regulación de los mercaos- o incluso les del ramu escuela austríaca/anarcocapitalista –que’l problema ta nuna “escesiva regulación de los mercaos”-.

Últimamente podemos ver cómo se ta puxando muncho dende los medios de comunicación por aquello de que “tamos gobernaos por Merkel”, y esti posicionamientu ye unánime, güeyemos Intereconomía o La Sexta –mesmu amu, distintu maquillaxe-, o lleamos La Razón o El País –ídem-. Paralelamente al espoxigue d’esi “argumentu” vemos medrar esponencialmente la presencia nos medios de Miguel Ángel Revilla, l’expresidente de Cantabria y cabezaleru del PRC, que según se ve, tornose nun bon reclamu, un bon ganchu a la hora de fabricar desplicaciones non amenazantes pal sistema capitalista, y qu’al tiempu contenten a la población.

Si analizamos superficialmente esi discursu “revillista”, quiciabes nos puede paecer en cierta forma simpáticu o razonable, pero escuende unes dosis pergrandes de populismu, y d’esi mal qu’anque durante un tiempu paeciera que morriera, sigue ehí, asperando a que la burguesía necesite recurrir a elli: el facismu. Quiciabes Revilla actúe cola meyor intención, creyendo de verdá que nes sos posiciones ta la igua, pero lo que seguro ye que’l poder ta utilizándolu.

Coses como l’enemigu ye Merkel, que “nos gobierna Alemaña”, qu’hai que tornar a la moneda propia y/o a la soberanía monetaria, proclames como que “los españoles somos xente mui trabayadora, que sacó’l país alantre nos piores momentos” –refiriéndose al franquismu nel qu’elli participó como dirixente mozu, anque nun nome al réxime de Pachu-, conformen un discursu que, anque mazcaritáu baxo un paisanu campechanu, ye perfeutamente firmable por Democracia Nacional o cualquier otra organización d’estrema derecha; ye una base perfeuta pa propiciar, xunto col discursu de que “tolos políticos son iguales”, l’espoxigue de la estrema drecha y l’ultranacionalismu español. 

Organizaciones como UPyD, Ciutadans, o PxC medren, y anque nel estáu español entá nun hai una fuercia populista neofacista col puxu de partíos tipu’l Frente Nacional en Francia, nun hai que descuidase, y hai que combatir estos discursos que con muncha gayola mos esparden al traviés de los medios de comunicación de mases.

El problema nun ye que nos gobierne Merkel. El problema ye que Merkel, al igual que Rajoy y cualquier otru presidente de cualquier país capitalista, nun ye más qu’un títere de la so burguesía. Nun mos gobierna Merkel, nos gobiernen unes élites burgueses que son les que de verdá tienen el poder, les que tienen daqué que perder si too esto se-yos escapa de les manes. Ye clave tener claro esto, y que l’enemigu nun ye “Alemaña” como un conceutu cuasi divinu, sinon los sos poderes económicos, como los de los demás países.

Que la banca y otros seutores económicos alemanes beneficiáronse muncho de la crisis y de la so previa ye evidente, pero nun lo ye menos que les élites españoles tamién ganaron dineru a manos enllenes. Poro, nun busquemos la solución fácil de dicir qué malu ye l’alemán, o qué malu ye l’inmigrante llatinoamericanu o d’europa del este, que vien equí a la gueta d’un futuru dignu. Vayamos a la gueta de los verdaderos culpables, les verdaderes causes de por qué la clase trabayadora pierde cada día más drechos, demientres la burguesía sigue arriqueciéndose igual o más qu’enantes.

Nel casu concretu asturianu, más de lo mesmo: el mal nun ye “España” ensin más, sinon los poderes que propicien esti estáu, y lo faen baxo unos parámetros d’opresión cultural y llingüística haza les naciones que la conformen, y social haza la población que viven n’elles y que faen diches naciones. Poro, falar de neutralidá o de conceutos interclasistes dende un proyeutu partidista que dea una visión global d’Asturies dende una perspeutiva nacionaliega nun tien sentíu, ye mester contraargumentar tamién escontra “micropopulismos” que mos acechen a nivel asturianu. 

Si mos promocionen el “revillismu” como solución, o’l “nin d’izquierdes nin de dereches” qu'exercita l'españolismu centraliegu d’UPyD y cía como alternativa al bipartidismu, o si nun se pon nengún tipu de torga a los actos d’organizaciones como “Asturies Non Conforme” demientres se persigue y reprime la llucha de les organizaciones revolucionaries, ye porque too ello nun amenaza los intereses del verdaderu poder. 

Combatir el populismu, y tolos argumentos que lu acompañen, ye tarea imprescindible, puesto que les condiciones de la nuesa sociedá son propicies pal so guañu, y ye lo cabero que mos faltaba nesta Asturies na que necesitamos como’l comer una tresformación en toles estayes como aición de simple supervivencia.