64%

Abrí una páxina d’información alternativa, y alcontreme con un titular que me llamó l’atención perriba’l restu: “Grecia: El desemplegu xuvenil algama un nuevu récord. Supera’l 64%”. Foi ver el datu “64%” y automáticamente pensar qu’esa ye esautamente la mesma cifra de paru que sufrimos la mocedá asturiana.

Como ye bien sabío, tanto l’estáu español como Grecia tán a la tiesta d’Europa en desemplegu a cualquier nivel, y especialmente nel tarrén xuvenil. Sicasí, la media d’España podemos atopala n’alredor del 52% o asemeyao, ensin llegar a esos ablucantes niveles griegos, pero eso ye trampa. Ye trampa porque, como en tantes otres coses, la visión centraliega d’España como conxuntu que mos quieren imponer tapez una realidá incómoda y murnia, pero que por ello nun dexa de ser realidá: n’Asturies el paru mozu ye del 64%, mui percima de la media estatal.

Ye perimportante cuntar con esi datu, porque en comparanza col paru asturianu, la media española paez hasta “bona”. Lo que pon de rellevancia esti datu, d’otru lláu, ye una particularidá de tantes coles que cuntamos n’Asturies a nivel de realidá económica y social respeuto al restu del estáu español, y que ta tapecida dafechu por tola estructura de poder.

La dinámica socioeconómica d’Asturies ye diferente de la de cualquier otru puntu del estáu español, non dende l’entamu de l’actual crisis, sinon dende va munchísimes décades, y con especial acentu dende la reconversión industrial, y l’aplicación de polítiques comunitaries nel seutor agrícola, marítimu, etc.  Entós, ¿ye posible analizar la situación d’Asturies, les sos causes, y posibles soluciones, por parte de los partíos y coleutivos españolistes/centralistes o sucursalistes, ensin cayer n’erros? Camiento que non, y ye esti ún de los principales problemes colos que mos atopamos n’Asturies a nivel políticu.

La falta d’una perspeutiva asturiana nes organizaciones parllamentaries tradicionales ye la que fae que la clase política asturiana tea tan alloñada de la realidá d’esti pueblu. Y cuando falo d’organizaciones asturianes, falo de dalgo más qu’un coleutivu d’ámbitu asturianu. Foro ye un partíu ensin cadarma estatal, pero, ¿en qué se diferencia de PP, PSOE, IU o UPyD? Toes elles firmaríen agora mesmo eso del “Más Asturias, mejor España”, qu’en realidá ye un “Más España, Mejor España”.

Ye imprescindible un analís asturianu, qu’atienda a la situación específica del pueblu asturianu, a les causes hestóriques y actuales d’esa situación, y que ponga enrriba la mesa soluciones concretes pa la so igua. Asturies ye un gran desconocíu incluso pa gran parte de la población asturiana, y polo tanto, ye bastante inxenuo pensar que mos van a traer una receta máxica dende Madrid.

Demientres, cuando abra una noticia sobre’l descomanáu paru mozu en Grecia, voi siguir alcordándome d’Asturies, y de que nenguna de les fuerces polítiques con representación –nin los sos apéndices sindicales- tien capacidá nin gana d’iguar la situación.