Otra ración de lo de siempres

Asturies ye la patria del “ye lo qu’hai”. Esa espresión que tanto nos presta usar nesti país paezme qu’espeya perbién un estáu d’ánimu xeneral, que nun ye otru que la resignación. Y la resignación llévanos al inmovilismu, provocando asina que nada camude nuna situación que necesita una tresformación a tolos niveles.

L’inmovilismu y que nada camude ye pergrave, básicamente porque implica que sigamos dirixíos por unos poderes económicos y los sos executores gubernamentales a nivel llocal, autonómicu y estatal, que nun cunten con proyeutu dalu p’Asturies más alló de garantizase la so cuota de poder, y que n’Asturies too siga somorguiao a intereses ayenos a nós.

Y ye que yá nun voi entrar siquier no inxusto y perxuicioso del orde actual de coses, y de la necesidá de valtialo; pa decatase d’estes coses simplemente fae falta fixase nel propiu día a día, y de lo poco, mal, o nada que s’aprovechen les potencialidaes innegables coles que cunta Asturies y nun se tán desendolcando.

“RTPA ta desaprovechada, pero ye lo qu’hai”

Tenemos bien reciente’l Descensu Internacional del Seya, y como bien sabréis, la televisión pública estatal RTVE decidió nun retresmitir en direutu una preba qu’avezaben a ello, dándo-y polo demás una cobertoria bien probetaya pa un eventu de calter internacional perimportante p’Asturies. Pel so lláu, TPA sí mos ufrió en direutu la preba deportiva, anque too hai que dicilo, con una realización bien precaria, que nin mos amosaba de forma afayaíza lo deportivo, nin tampoco atendía pa lo qu’hai alredor de l’eventu, y que supón gran parte del so atractivu. 

Ye de suponer qu’esti fechu desplícase pola falta de medios pa facer una retresmisión meyor, pero tamién dexa n’evidencia dalgo que llevamos viendo práuticamente dende la so creación: lo poco y mal aprovechada que ta la radiotelevisión pública asturiana. Nin sirve pa la promoción y normalización de la cultura y la llingua asturiana, nin pa dar una cobertoria afayaíza de los eventos o noticies de rellevancia pal pueblu asturianu, nin p’apurrir una fonte de trabayu estable y de calidá, nin pa dar un futuru al seutor audiovisual asturianu. Con estes credenciales, ye difícil que nun surdan voces pidiendo’l so pieslle, porque siendo realistes y sinceros, de poco nos sirve anguaño esi mediu a los asturianos.

Sicasí, les sos potencialidaes tán ehí, podríen dar un serviciu impagable al pueblu asturianu tanto a nivel de TV como de radio, pero llamentablemente hai lo qu’hai, y en cuantes la televisión estatal decidió que pagaba más la pena aforrar les perres de la retresmisión que dá-y promoción a una preba de tal importancia, Asturies quedó en calzones mediáticamente. Si queremos promocionanos y visibilizanos bien, hai que tener claro que tenemos que guisánoslo nós, y pa eso, faen falta los medios y el proyeutu adecuáu.

“El gobiernu central torna a perxudicanos, pero ye lo qu’hai”

Camudando de tema d’actualidá, tamién conocimos va poco’l repartu del techu de déficit nes Comunidaes Autónomes  fechu pol gobiernu central pa esti añu, y pa nun variar muncho nin dar surprieses innecesaries, Asturies tornó a salir perxudicada. Pesie a tar muncho menos endeudaos qu’otros territorios, o suponer dalgo insignificante nel conxuntu de la deuda pública, el gobiernu español impúnxonos un techu del 1,06%, frente al 1,3% que dende l’executivu asturianu consideraben necesariu pa poder facer inversiones públiques. Como siempres, Asturies apartada y perxudicada.

Pesie a ello, nun valen victimismos dende les instituciones y fuercies polítiques parllamentaries d’Asturies. Sí, salimos perxudicaos. Sí, pásanos davezu. Pero nun val dicir que’l malu de la película ye namái’l gobiernu central, porque al mio paecer tienen tanta o mayor culpa los representantes políticos asturianos.

El perxuiciu sufríu nel techu’l déficit ye ún más de tantos, y tien el so orixe na falta dafechu de pesu políticu d’Asturies. Esto ye consecuencia d’unos gobernantes siempres con vocación centralista y sucursalista, que toleren un estatutu bien probetayu pa un país con suficiente bagaxe como pa ser una “nacionalidá hestórica” más y poder avanzar haza un techu competencial. Si eso nun pasa, ye responsabilidá principal de los que nun faen nada p’algamalo: los representantes políticos asturianos. Más de lo mesmo con otra noticia d’actualidá: el gobiernu español debe al asturianu 112 millones d’euros de fondos mineros pa obres d’infraestructures. 

Otra vez más tamos no mesmo: ¿Cómo van a facer una reforma l’estatutu alcordies a les necesidaes d’Asturies quienes nun son más que títeres de les sos formaciones polítiques en Madrid? ¿Va a facela Foro, los del “Gibraltar español”? Hai una falta nidia d’actores políticos con un proyeutu de país, que faiga frente y alternativa a los que namái se llimiten a alministranos baxo intereses ayenos a nós como nación y como clase.

Simplemente con analizar dos o trés fechos que güeyamos n’actualidá asturiana, vemos perclaro una vez más que cada día fae más falta esa alternativa con proyeutu p’Asturies, fuxendo del oportunismu, y que consiga treslladar a la sociedá’l mensaxe de que too aquello que nun conquistemos nós, como pueblu asturianu, nun mos lo va a regalar naide.

Sí, yá sé que nun descubrí América. Esto ye otra ración más de lo de siempres nesti país de nueso.