jueves, 4 de julio de 2013

El collar maxenta




La selmana pasada la Xunta Xeneral aprobó una “Llei d’Autoridá del Profesor”, norma que, “por casualidaes de la vida”, tamién ta vixente n’otres comunidaes onde manden formaciones drechistes como’l PP o Coalición Canaria: Madrid, Valencia, La Rioxa, Castiella-La Mancha, Canaries y Galiza. Pero nesti casu l’aniciativa provién d’otra fuercia d’esa fastera ideolóxica, “los maxentes”, UPyD.

La propuesta d’UPyD salió alantre gracies al sofitu de PP y Foro –tanto monta, monta tanto-, polo que dende agora l’autoridá del profesoráu va a ser asemeyada a la que tien, por exemplu, un policía. Personalmente nun toi a favor d’esta midida, nun creo que tirar pel “autoritarismu” seya la forma d’atayar los problemes qu’hai nesti ámbitu, que precisamente son munchos y de muncha importancia, y pa los que dende UPyD nun tienen iniciativa dala.

A lo llargo d’esti cursu escolar vimos munches movilizaciones nel ámbitu educativu; fuelgues estudiantiles, del profesoráu, manifestaciones, concentraciones, clases na cai, etc. Neses protestes nun vimos nenguna pancarta que punxera “autoridá pal profesoráu”. Sí vimos munches diciendo “LOMCE non”, “Escuela pública, llaica y de calidá”, “non a los retayos de plantiya y salarios”, “condiciones dignes pa los interinos”… En definitiva, una serie de reclamos de fondu sobre’l sistema educativu en distintos ámbitos, que dende cada organización se podrá ver dende una perspeutiva, pero que dende lluéu son vindicaciones muncho más fonderes que la superficialidá de la normativa aprobada pola Xunta Xeneral.

Una vez más vemos cómo dende UPyD, como’l restu de fuercies sistémiques, namái se proponen cuestiones superficiales, ensin entrar nunca nel raigañu. Ye perfácil atacar a les autonomíes, los coches oficiales, dicir que’l problema del sistema educativu ye la falta d’autoridá, y demás discursos populistes que nel contestu actual son esitosos, pero dende lluéu nun suponen nenguna igua real, sinon más bien maquillaxe col que tapecer les vergoñes d’un capitalismu podre, traducíu nun estáu opresor a munchos niveles.

Lo pior de too ye que pesie a ser el mesmu perru capitalista uniformizador, pero con un collar maxenta,sigue convenciendo a un garrapiellu xente, nel casu asturianu la suficiente p’algamar un diputáu clave, la llave de gobiernu n’Asturies. Ye un partíu cola gobernabilidá d’Asturies nes sos manes, cola consiguiente influyencia qu’ello podría suponer a munchos niveles, pero na práutica namái vemos otra cara centraliega y superficial, una pata más cola que caltener en pie la cadarma del poder.

viernes, 28 de junio de 2013

Subcomandante Insurxente Marcos: Nun tarán los nuesos maestros

El testu que vien darréu ye'l caberu del Subcomandante Marcos, espublizáu nesti mesmu mes de Xunu. Qué dicir de la "cara tapada visible" más famosa del Exércitu Zapatista de Lliberación Nacional, ensin dubia un referente de llucha anticapitalista, antiglobalización, y de resistencia indíxena.





Xunu del 2013.

A los/es averaos a la Sesta –Sesta declaración de la Selva Lacandona- en México y el Mundu:

A los/es estudiantes de la Escuelita Zapatista:

Compañeros, compañeres:

Pos sí, en verdá creo que van tener como compañeros d'escuela a daqué de lo meyor d'esti mundu.

Pero de xuru usté, que ta nestes tierres en resistencia, va echar de menos la presencia de quienes fueron, y son, bien importantes pa nós los zapatistes, les zapatistes. Quienes nos acompañaron siempres y nos guiaron y enseñaron col so exemplu.  Quienes, como munches otres y otros en tolos rincones del mundu, nun son del EZLN.  Dalgunos son de la Sesta, otros del Congresu Nacional Indíxena, munchos más construyeron les sos propies cases y, sicasí, anden el mesmu camín que nós.  Toos ellos d'una o otra forma son copartícipes de los nuesos llogros, por grandes o modestos que sían.

De los nuesos erros y fracasos, que nun son pocos nin pequeños, namái somos responsables nós.

Porque seique usté s’entrugue quién o cómo nos enseñó a aguantar, a lluchar, a perseverar.

Y, sobremanera, s’entruga por qué nun tán, sentaos al so lláu y como unos estudiantes más, los  pueblos orixinarios de México y del Mundu, particularmente de Llatinoamérica.

La respuesta ye cenciella: porque ellos fueron, y son, los nuesos maestros.

Asina que nun van tar los primeros, aquellos sobre los que la so sangre y dolor llevantó'l mundu modernu: los pueblos orixinarios.

Nun van ser los sos condiscípulos los pueblos indíxenes nin les sos organizaciones más representatives.

Nun los convidamos a la “escuelita”.

Quiciabes usté se tea entrugando si alloriemos, o si ye una maniobra gocha, tipu políticos de riba, pa suplantar a los pueblos indios y presentanos a nós mesmos como EL pueblu indíxena por escelencia.
Pero non, nun los convidamos simple y cenciellamente porque nun tenemos nada qu'enseña-yos.

¿Podríamos enseña-yos a los pueblos indios lo que significa ser tratáu como estrañu nes tierres que fueron de nueso, inda enantes que'l mundu entamara a cuntar la hestoria de los de riba, y nel nuesu cielu impunxérense banderes foriates?

¿Enseñaríamos-yos lo que se siente al ser oxetu de burlla pola indumentaria, pola llingua, pola cultura?

¿Enseñaríamos-yos lo que significa ser esplotaos, desposiaos, reprimíos, despreciaos mientres sieglos enteros?

¿Qué podríamos enseñá-yos nós a los hermanos de la Tribu Yaqui y al Mayu Yoreme sobre lo que representa'l robu de los recursos naturales y la necesaria resistencia frente a esa llaceria?

¿Qué al Kumiai, al Cucapá, al Kikapú, al Pame, sobre lo que ye vese escorríu casi hasta l'esterminiu y, como quiera, resistir?

¿Qué al Nahua, invadíes les sos tierres por mineres y funcionarios corruptos y, ensin importar la persecución y la muerte, siguir la llucha pa sacar a los invasores de la bandera del dineru?

¿Qué al Mazahua y al Ñahñu sobre lo que se siente al ser burlláu pola vestimienta, el color, la manera de falar, y, en llugar d'avergoñase, pintar el vientu de soníos y colores?

¿Qué-yos enseñaríamos a los Wixaritari sobre l’esfarrape  y el desaniciu de la cultura cola coartada del “progresu”, y, aguantar, cola guía de los mayores?

¿Enseñaríamos-yos al Coca, al Me´hpaa, al Teneke a nun rindise?

¿Al Amuzgo  a lluchar polos sos derechos?

¿A los Mayes enseñaríamos-yos sobre lo que ye la imposición, pola fuerza, el robu y la criminalización, d'una cultura estraña somorguiando a la orixinal?

¿Al Purépecha falaríamos-y sobre'l valor de vida de la cultura indíxena?

¿Al Popoluca, Zapoteco, Mixteco, Cuicateco, Chinanteco, Chatino sobre lo que representa siguir lluchando anque tou vaya a la escontra?

¿Al Rarámuri sobre la fame mal callada y la dignidá imbatible?

Y na doliosa Llatinoamérica:

¿Podríamos enseña-y daqué a ún de los nuesos hermanos mayores, el pueblu Mapuche, de lo que ye resistir a la continua guerra de persecución y esterminiu?  ¿A sobrevivir a una llarga llista de mentires, agravios y burlles, pintaes de tolos colores políticos de riba?

Y a cualesquier de los pueblos orixinarios de México, d'América, del Mundu, ¿qué podríamos enseña-yos nós les zapatistes, los zapatistas, los más pequenos?

¿Qué van deprender de nós?

¿A resistir?

La so sola esistencia yá demuesa que pueden dar cátedres na gran escuela del Mundu, non recibiles.
Non, nun convidamos a los pueblos orixinarios a la “escuelita” pola cenciella razón de que, na nuesa hestoria, somos nós quienes fuimos alumnos d'esos xigantes.

Claro que-yos vamos a unviar los materiales.  Pero…

¿vamos enseña-yos cómo ye vivir nuna comunidá, sentir lo que ye tener otra cultura, otra llingua, otra manera?

¿A lluchar?

¿A imaxinar y crear resistencies?
 
Nin pensalo.

De los pueblos indios, sía que non, los zapatistes tenemos enforma que deprender entá.

Entós, ellos van venir depués y vamos dir nós, nós, a siguir deprendiendo.

Y, cuando vengan al alcuentru especial que vamos faer con ellos, van sonar les nueses meyores notes, los más diversos y vivos colores van afatar el so pasu, y el nuesu corazón tornará a abrise p'agospiar a quienes son los nuesos hermanos mayores, los más grandes, los meyores.

Porque honrar a quien enseña, ye tamién honrar a la tierra.

Van venir a les nueses cases, con ellos vamos compartir alimentos y memories.

Vamos irguilos sobre nós.

Y, argutos sobre los nuesos costazos, van a llevantase entá más.

Y entrugarémos-yos qué miren.

Pidirémos-yos que, colos sos güeyos, enséñennos a mirar más lloñe, más ancho, más fondo, más alto.
Que nos reciba la so palabra y nella bebamos.

Que mos ayuden a medrar y ameyorar.

Pa ellos foi, ye y va ser siempres el nuesu meyor abrazu.

Asina que nun van tar los nuesos maestros.

Pero nun tengáis pena.  Ye seguro qu'estos pueblos, que llograron aguantar hasta agora toa clase d'ataques, van saber ser arrogantes y, llegáu'l so momentu, abrirán-yos el coral, como agora facemos nós.

Porque ellos enseñáronnos a nun mirar a los ruíos qu'ensorden y cieguen.

Porque ellos enseñáronnos a nun escuchar los colores del engañu y el dineru.

Porque ellos enseñáronnos a miralos y miranos, a escuchalos y escuchanos.

Porque ellos enseñáronnos que ser indíxena ye tener la dignidá por casa y destín.

Porque ellos enseñáronnos non a cayenos, sinón a llevantanos.

Porque ellos enseñáronnos el valor que tien el ser el color que somos de la tierra.

Porque ellos enseñáronnos a nun tener mieu.

Porque ellos enseñáronnos que pa vivir, morremos.

Salú y silenciu pa escuchar el pasu que vien dende lo más fondo de los mundos, que nel mundu son y fueron.

Dende los montes del Sureste Mexicanu.
Subcomandante Marcos.

martes, 18 de junio de 2013

Nin de mines, nin de polígonos




Nun voi ser yo quien descubra cómo ta económicamente Asturies en xeneral, y especialmente les cuenques. Un paru mozu a la tiesta del estáu, un desempléu xeneral altu y n’espoxigue, actividá económico morriendo al mesmu ritmu que muerre la minería; despoblación, avieyamientu, caciquismu y clientelismu políticu-sindical de les fuercies dominantes, y un llargu etcétera.

Pero tamién hai daqué que llama muncho l’atención en tou esti ermu, y ye l’esbarrumbe dafechu del escasu texíu industrial que surdió de les aiciones gubernamentales tres la reconversión, sobre too con cargu a los fondos mineros. Nestos caberos años vimos zarrar a decenes d’empreses que nun va tanto’l gobiernu asturianu nos vendía como símbolu d’una supuesta modernización industrial qu’enxamás foi tal.

N’otros casos les empreses en cuestión nun zarraron, pero aplicaron numberosos EREs, despidos de trabayadores, o’l pieslle de dalgún de los sos centros de trabayu, conformando asina un panorama nel que, pesie a que falamos muncho –con razón- del mal facer del gobiernu asturianu, o del papel de responsabilidá direuta de CC.OO y SOMA-UGT na situación, nun podemos escaecer tampoco l’estrepitosu fracasu que supunxo poner nes manes de l’aniciativa privao la recuperación económica d’estes zones.

Les causes d’esti fracasu ye diversu, a veces provocáu simplemente porque yeren empreses non viables, n’otros por una mala xestión frutu de la priorización del enchufismu y les redes clientelares, y n’otros simplemente porque quixeron aprovechase d’una coxuntura na que recibir dineru público, pa posteriormente colar y deslocalizase. En cualquier casu, ye evidente que la recuperación industrial nun tien pinta nenguna de venir pel lláu de lo privao.

En tou esti asuntu, como dixi enantes, nun hai qu’escaecer el papel responsable del gobiernu asturianu y d’otres instituciones como los conceyos, que baxo’l dominiu de la FSA-PSOE marafundiaron fondos públicos en proyeutos inútiles, con sobrecostes, o que simplemente enxamás llegaron a executase (Eso sí, del dineru correspondiente a dichos proyeutos, nin rastru). 

Tamién ye importante señalar el papel protagonista de CC.OO y SOMA-UGT, como organizaciones encargaes d’executar na práutica tol entramáu de corrupción, clientelismu, enchufismu y demás estómagos agradecíos nes empreses. Tales responsables sindicales deciden quiénes sedrán los afortunaos qu’entren a trabayar nes nueves empreses, normalmente por un periodu curtiu de tiempu y “recomendándo-yos” afiliase al sindicatu de turnu pa ganar posibilidaes d’un contratu indefiníu. Asina furrularon y furrulen entá munches empreses, algamando estes organizaciones “sindicales” un poder perimportante a nivel xeneral n’Asturies.

Pero tou esti entramáu nun ye sólo PSOE, SOMA y CCOO, tamién entren n’escena numberoses empreses collacies d’estes organizaciones, y por supuestu la complicidá estatal. Consultoríes con cabezaleros de “duldosa fama”, beneficiaries de numberoses sovenciones gubernamentales pola so collaboración en toes estes cuestiones rellacionaes colo que diba a ser el “nuevu texíu industrial”, y que nun yera más que fumu, dan bona cuenta d’ello. Esta ye la realidá que vivimos n’Asturies toos estos años, al calor d’unos fondos mineros que, como se vio, namái sirvieron pa matar la llucha obrera, y convertir PSOE, SOMA y CCOO nes organizaciones incontestablemente dominantes nes cuenques y n’Asturies.

Sicasí, nun tenemos que ver too esto namái como un asuntu de mala xestión  o de corrupción ensin más de fuercies polítiques y sindicales, o de les instituciones. Tenemos que ver que’l problema real ye muncho más fonderu, y ye un problema doble en cierta manera insepartable: la dinámica capitalista, y la falta de soberanía d’Asturies.

D’un lláu, Asturies cumplió un papel na división territorial de l’actividá económica nel estáu español, planificada y a beneficiu de la burguesía estatal. Fuimos un territoriu afayaízu nel qu’aprovechar recursos naturales como’l carbón, pal desendolcu de variaes formes de producción enerxética rellacionada o non col carbón –térmiques, hidrolletricidá, etc- o pa llantar industries pesaes, combinao meyor o pior con actividaes tradicionales como l’agricultura o la pesca.

Depués llegó la entrada del estáu español n’instituciones del capitalismu supraestatal européu, el desendolcu de la reconversión industrial, y l’esfarrape de los principales seutores que-y dieron puxu a esti país. Simplemente, el capital européu nin necesita nin quier una España industrializada, o que dedique los sos enfotos a dalgo que nun seya’l turismu y el seutor servicios en xeneral.

Y nós, sufriendo’l ser parte del capitalismu, y la falta de soberanía correspondiente a ello y a tar somorguiaos al estáu español, vimos les consecuencies. Si Europa nun quería una España con puxu industrial, ye evidente’l destín d’ún de los territorios tradicionalmente más industrializaos del estáu como yera Asturies: el declive industrial primero y xeneral depués.

España, como instrumentu práuticu de la burguesía estatal y supraestatal, camudó la so orientación económica y dexó de necesitar qu’Asturies desempeñara esi papel de motor industrial. Desmantelóse la mayor parte del seutor industrial, y l’otro pasó a manes privaes. Con too esto, creo que la síntesis ye la mesma a la que podemos llegar en cualquier otru país capitalista: too se mueve pol interés de quien cunta colos medios de producción, col poder, y nun son otros que la burguesía.

Poro, nun podemos asperar nengún plan de reactivación económica o de reindustrialización enfocáu a iguar la problemática llaboral y social del pueblu asturianu baxo l’actual réxime. Simplemente, toa aición va a dir enfotada nel beneficiu de seutores privaos concretos, seyan políticos, pseudosindicales, o económicos, formantes a la fin d’una mesma cosa. Y si nengún d’esos intereses privaos puede beneficiase, nun habrá alternativa. L’alternativa ye la nada, y ehí lo vemos coles mines privaes de Victorino Alonso: que naide aspere la so nacionalización, porque cuando dexen d’interesá-y zarrarán, y puntu.

Como dixi ye importante tamién afondar nel tema de la soberanía, qu’insisto: va venceyáu a la problemática de tar somorguiaos al capitalismu. El pueblu asturianu –entendiendo por pueblu la clase obrera, los Cosmen y cía nun entren na mio definición de “pueblu asturianu”- nun cunta col poder, y polo tanto toles aiciones, tresformaciones, y en definitiva toles polítiques económiques que mos apliquen nun correspuenden a los sos intereses. Van primero los intereses de los poderes capitalistes, y tamién podemos dicir que van primero los intereses del estáu español que los d’Asturies.

Unes instituciones sucursalistes pa col gobiernu español, y pa col capitalismu, enxamás van a dar soluciones a los problemes que mos afeuten como pueblu. Amás, demientres teamos ataos poles cadenes de la Xunión Europea y la so moneda, a los nuesos seutores económicos principales nun-yos queda otra que morrer, y ye que si agonicen nun ye por falta de “competitividá” o dalgo asemeyao, ye simplemente polos intereses de la burguesía d’otros países.

El procesu de reconversión industrial nes cuenques y n’Asturies en xeneral foi un completu fracasu. Foi un fracasu absolutu d’un seutor priváu enfotáu nos sos intereses particulares, non nel interés del pueblu. Foi’l fracasu d’unes instituciones y unos sindicatos concretos qu’atendieron pa los sos intereses de poder. Foi’l fracasu d’un sistema inxustu y nel que nun tenemos futuru como pueblu. Foi’l fracasu d’un modelu territorial centralista y lliquidador p’Asturies.

Con toes estes cuestiones, anguaño tenemos una Asturies “nin de mines, nin de polígonos”. O sedría meyor precisar que “nin de mines abiertes, nin de polígonos con actividá”. Garrar les riendes del nuesu destín como país y como pueblu ye la única salida que mos queda.

lunes, 27 de mayo de 2013

¿Opresivu y gris?



“Non, medrar nel comunismu foi la época más feliz de la mio vida”. Ye la rempuesta que da  al Daily Mail Zsuzsanna Clark, húngara anguaño viviendo en Reinu Xuníu y qu’esperimentó’l sistema socialista na Hungría de los 70 y los 80. Apurre una visión alrodiu de la vida nesi país bien distinta de la que mos intenten cuntar dende los “mass-media”, y ye que los datos nun mienten: pesie a toles imperfeiciones  que-y podamos reprochar al socialismu aplicáu nesos países, n’Europa l’Este la torna al capitalismu foi una auténtica traxedia pa la clase obrera en términos demográficos, condiciones sociales, llaborales, etc. 

Alta inflación y desemplegu, una de les tases de suicidios más alta d’europa –recordemos que la más alta ye d’otru país exsocialista, Lituania- , una mengua demográfica tornada en mediu millón menos d’habitantes,tases de natalidá y fecundidá menguando, o l’ascensu d’opciones polítiques “poco deseables”, como ye’l casu de Jobbik, un partíu filofacista, racista, xenófobu… qu’algama acoyida pol descontentu de les clases populares pa cola situación del país, son dalgunes de les realidaes que nun mos cunten, pero que tán ehí.



¿Opresivu y gris?

Cuando la xente m’entruga cómo yera medrar detrás del telón d'aceru n’Hungría nos años setenta y ochenta, la mayoría espera escuchar cuentos de policía secreta, les coles de pan y otres declaraciones desagradables sobre la vida nun estáu de partíu únicu.

La xente siempres queda deceicionada cuando-yos desplico que la realidá yera bien distinta, y la Hungría comunista, lloñe de ser l'infiernu na tierra, yera en realidá, más bien un llugar risonderu pa vivir. Los comunistes apurríen a toos trabayu garantizáu, bona educación y atención mélica de baldre.

Pero quiciabes lo meyor de too foi la sensación primordial de la camaradería, l'espíritu que falta na mio adoptada Gran Bretaña y, otra miente, cada vez que voi de regresu a la Hungría d’anguaño-.

Yo ñací nuna familia de clase trabayadora en Esztergom, una ciudá nel norte d'Hungría, en 1968. La mio má, Xuliana, vieno del este del país, la parte más probe. Ñacida en 1939, tuvo una infancia dura. Dexó la escuela a los 11 años y foi direutamente a trabayar nos campos. Ella remembra tener que llevantase a les 4 am pa caminar cinco kilómetros pa mercar una fogaza de pan. De neña, ella tenía tanta fame qu’asperaba al pie de la pita hasta que punxera un güevu. Entós abríalu y tragábase cruda la yema y la clara. 

[…] Una de les meyores coses foi la manera en que les oportunidaes d'ociu y vacancies s’abrieron toos. Enantes de la Segunda Guerra Mundial, les vacancies taben acutaes pa les clases altes y medies. Nos años más averaos a la posguerra tamién, la mayoría de los húngaros taben trabayando bien duro pa reconstruyir el país, les vacancies taben fuera de cuestión.

Nos años sesenta, como en munchos otros aspeutos de la vida, les coses camudaron pa meyor. A finales de la década, casi tol mundu podía dase’l lluxu de colar, gracies a la rede de subsidios a sindicatos, empreses y cooperatives de centros vacacionales. 

Los mios pás trabayaben en Dorog, un pueblu cercanu, por Hungaroton, una compañía discográfica de propiedá estatal, asina que quedamos nel campamentu de vacaciones de la fábrica nel llagu Balaton, 'El mar húngaru'. El campamentu yera asemeyáu a la especie de colonies de vacaciones de moda en Gran Bretaña de la dómina, la única diferencia ye que los güéspedes tuvieron que faer el so propiu entretenimientu peles nueches. 

Dalgunes de les mios primeres alcordances de la vida nel llar son los animales que los mios pás calteníen na parcela. La cría d'animales yera daqué que la mayoría de la xente fixo, según el cultivu d'hortalices. Fora de Budapest y les grandes ciudaes, nós yéramos una nación de “Tom y Barbara Goods”. 

Los mios pás teníen alredor de 50 pollos, gochos, coneyos, coríos, palombos y gansos. Caltuvimos los animales non yá p'alimentar a la nuesa familia, sinón tamién pa vender la carne a los nuesos collacios. Les plumes de gansu ultilizábense p'almuaes y edredones. 

El gobiernu entendió'l valor de la educación y la cultura. Enantes de la llegada del comunismu, les oportunidaes pa los fíos de llabradores y la clase obrera urbana, como yo, pa xubir na escala educativa yeren llindaes. Tou eso camudó dempués de la guerra. […] Prestábenme asgaya los mios díes escolares, y en particular la mio prticipación nos Pioneros - un movimientu común pa tolos países comunistes-. 

Munchos n'Occidente creyeron que yera un  intentu d'adoctrinar a los mozos cola ideoloxía comunista, pero siendo pioneros enseñáronnos habilidaes pervaloratibles pa la vida tales como la creación d'amistaes y la importancia de trabayar pal beneficiu de la comunidá. “Xuntos unu pal otru” yera'l nuesu lema, y asina foi como se nos animaba a pensar. 

Como pioneru, si llograbes bonos resultaos nos tos estudios, nel trabayu comunal o en competiciones escolares, podíes ser premiáu con un viaxe a un campamentu de branu. Yo diba tolos años porque participaba en casi toles actividaes de la escuela: competiciones, ximnasia, atletismu, coru, fotografía, lliteratura y biblioteca. 

Na nuesa última nueche nel campamentu de Pioneros cantábamos cantares alredor de la foguera, como l'himnu Pioneru: 'Mint a mokus fenn a fan, az uttoro oly vidam' (“Somos tan felices como un esguil nun árbol”), y otros cantares tradicionales. Los nuesos sentimientos siempres fueron entemecíos: tristeza ante la perspectiva de marchar, pero contentos ante la idea de ver a les nueses families. 

Anguaño, inclusive los que nun se consideren comunistes miren pa los sos díes de pioneros con muncho ciñu. 

[…] La Cultura consideróse como enforma importante pol gobiernu. Los comunistes nun quieren acutar les coses bones de la vida pa les clases alta y media, y lo meyor de la música, la lliteratura y la danza yeren pal esfrute de toos. Esto tornóse en sovenciones importantes pa les instituciones, incluyendo orquestes, óperes, teatros y cines. Los precios de les entraes taben sovencionaos pol Estáu, polo que les visites a la ópera y el teatru yeren cencielles. 

Abriéronse ‘Cases de la Cultura’ en cada pueblu y ciudá, tamién provinciales, pa que la clase trabayadora, como los mios pás, pudieren tener bon accesu a les artes escéniques, según a los meyores intérpretes. 

La programación na televisión húngara reflexaba la prioridá del réxime pa llevar la cultura a les mases, ensin atochamientu. Cuando yo yera adolescente, la nueche del sábadu en “prime time” polo xeneral tocaba ver una aventura de Xulio Verne, un recital de poesía, un espectáculu de variedaes, una obra de teatru en vivu, o una cenciella película de Bud Spencer. 

[…] Como la mayoría de la xente na etapa comunista, el mio pá nun taba allumáu col dineru. Como mecánicu, él encargóse de cobrar a la xente con xusticia. Una vegada vi un coche averiáu col capó abiertu - un espectáculu que siempres llevantó'l so coral-. Pertenecía a un turista d'Alemaña Occidental. El mio padre iguó'l coche pero negose a cobrá-y, inclusive con una botella de cerveza. Pa él yera natural qu'a naide se -y pasara pela tiesta aceptar dineru por ayudar a daquién n'apuros. 

Cuando'l comunismu n'Hungría terminó en 1989, non yá fui sosprendida, tamién taba atristayada, al igual que munchos otros. Sí, había xente protestando a la escontra del gobiernu, pero la mayoría de la xente común -la mio familia y yo incluyida - nun participó nes protestes. 

La nuesa voz - la voz d'aquellos que les sos vides fueron ameyoraes pol comunismu- malapenes s’escucha  cuando se trata de discutinios sobre cómo yera la vida detrás del Telón d'Aceru. Sicasí, los rellatos que s'escuchen nel Occidente son casi siempres dende la perspectiva d'emigrantes ricos o los disidentes anti-comunistes con un interés personal. 

El comunismu n'Hungría tuvo'l so lláu negativu. Magar los viaxes a otros países socialistes nun teníen nenguna restricción, viaxar escontra l'oeste yera problemático y namái taba permitío cada dos años. Pocos húngaros esfrutaron de les clases de rusu obligatories. Había torgues menores y capes innecesaries de burocracia, y la llibertá pa criticar al gobiernu taba restrinxida. Sicasí, pesie a esto, creo que, nel so conxuntu, los aspeutos positivos superen a los negativos. 

Vente años dempués, la mayor parte d'estos llogros fueron destruyíos. Les persones yá nun tienen estabilidá nel empléu. La probitú y la delincuencia medren. Les persones de clase trabayadora yá nun pueden dexase'l luxu de dir a la ópera o'l teatru. Igual qu'en Gran Bretaña, la televisión atocheció nun gráu esmolecedor -irónicamente, nunca nun tuvimos Gran Hermanu nel comunismu, pero teníemoslu güei-. Y lo más murnio de too, l'espíritu de camaradería qu'una vegada s'esfrutó, casi sumió. 

Nes dos décades caberes ye posible que ganáramos los centros comerciales, la democracia multipartidista, los teléfonos móviles ya Internet. Pero perdimos muncho más.