sábado, 12 de octubre de 2013

El votu o la bala



 Intervención de Malcolm X el 3 d’Abril de 1964, nun conceyu local del Congresu pola Igualdá Racial (“CORE” nes sigles orixinales) en Cleveland (Ohio).  
 
"El votu o la bala"

Señor moderador, hermanu Lomax, hermanos y hermanes, collacios y enemigos -porque cenciellamente nun puedo creer qu'equí toos sían amigos y nun quiero omitir a naide-. Esta nueche la tema ye, al mio entender, “La revuelta negra” y “¿ Qué posición tomamos d'equí  p'arriba?” o “¿ Qué faer?” A la mio humilde manera d'entendelo les alternatives son o'l votu o la bala. 

Enantes de tratar de desplicar lo que quier dicir eso del votu o la bala, quixera esclariar daqué alrodiu de mio mesmu. Inda soi musulmán, la mio relixón sigue siendo l'Islam. Esa ye la mio creencia personal. Igual qu’Adam Claytom Powell ye un pastor cristianu; y que'l doctor Martin Luther King ye un pastor cristianu n’Atlanta, Xeorxa; bonu, pos yo tamién soi pregueru, non pregueru cristianu, sinon pastor musulmán, y creo n’aición de tolos frentes y por tolos medios que seyan necesarios.

Pero anque sigo siendo musulmán nun vine equí esta nueche pa falar sobre la mio relixón. Nun vine p'aldericar nin apostar sobre nenguna de les coses sobre les que diferimos, porque yá ye hora de superar les nueses diferencies y danos cuenta de que ye meyor pa nós ver primero  que tenemos el mesmu problema, un problema común que te fai vivir nun infiernu lo mesmo si yes bautista, que si yes metodista, o musulmán, o nacionalista.

Agora bien, que falemos asina nun quier dicir que temos a la escontra del blancu, pero sí quier dicir que tamos a la escontra de la esplotación, que tamos a la escontra  de la degradación, que tamos a la escontra de la opresión. Y si’l blancu nun quier que seyamos antiblancos, que dexe d’opriminos y d'esplotanos y degradanos.

Nun soi políticu, nin siquier soi estudiosu de la política; en realidá nun soi estudiosu de nada. Nun soi demócrata, nun soi republicanu, y nin siquier me considero norteamericanu. Si tú y yo fuéramos norteamericanos nun habría problema.  Esos europeos qu'acaben de baxase del barcu yá son norteamericanos;  los polacos yá son norteamericanos;  los refuxaos italianos yá son norteamericanos. Tol que venga d'Europa, tol que tenga güeyos azules, yá ye norteamericanu. Y con tol tiempu que llevamos equí, tú y yo inda nun somos norteamericanos.

Non, yo nun soi norteamericanu, soi ún de los 22 millones de prietos víctimes del norteamericanismu. Ún de los 22 millones de negros que son víctimes de la democracia, que nun ye más qu'hipocresía amazcarada. Yo falo como víctima d'esti sistema norteamericanu, y güeyo a los Estaos Xuníos colos güeyos de la víctima. Nun veo nengún suañu norteamericanu; veo una velea norteamericana.

Foi'l votu del prietu'l qu'instaló a la nueva alministración en Washington. El to votu neciu, el to votu inorante, el to votu esbardiáu foi'l qu'instaló en Washington una alministración qu’emburrió toa clase de lleis inimaxinables, dexándote'l postreru, y qu’enrriba de too torga l'aprobación de la llei de derechos civiles. Y los tos líderes y los de mio tienen el valor d'andar aplaudiendo perhí y falando de cuánto tamos progresando, y falando de qué bon presidente tenemos.

De manera que yá ye hora d'esconsonar en 1964. Y cuando los veas salir con esa clase de conspiraciones, fai-yos saber que tienes los güeyos abiertos. Y fai-yos saber qu'hai otra cosa que tamién ta abierta... Y si non... tendríes de tornar al plantíu algodoneru, tendríes de volver a escondete nel caleyón. Ellos reciben tolos votos de los prietos y, depués de recibilos, el prietu nun recibe nada a cambiu. Lo único que fixeron al llegar a Washington foi da-yos bonos emplegos a unos cuantos prietos importantes. Esos prietos importantes nun precisen bonos emplegos, yá teníen trabayu. Eso ye un camuflaxe, ye un trucu, ye una traición, un teatru.

El Tíu Sam tien les manes empapaes de sangre, empapaes nel sangre de los prietos d'esti país. Ye l'hipócrita númberu ún d'esti mundu.

Entós digo qu’al predicar el nacionalismu prietu nun proponemos faer que'l prietu revalorice al blancu, sinon que'l prietu se revalorice a sigo mesmu. Nun faigas camudar d'idegues al blancu; nun ye posible faer que camude d'idees, y tou esi asuntu d’acudir a la concencia moral d'Estaos Xuníos... La conciencia d'Estaos Xuníos ta en quiebra. Fai enforma, enforma tiempu que perdió toa concencia. El Tíu Sam nun tien concencia. Ellos nun saben lo que ye moral. Nun trataron d'esaniciar el mal porque seya un mal nin porque seya illegal nin tampoco porque seya inmoral; esaniciáronlo namái cuando amenazaba la so esistencia. De manera que tas perdiendo'l tiempu si acudes a la concencia d'un home que ta en bancarrota moral como'l Tíu Sam.

jueves, 26 de septiembre de 2013

A los patriotes



Apurro equí un pequeñu textu de Ricardo Flores Magón, un conocíu revolucionariu mexicanu ñacíu en 1873. L’articulín foi espublizáu en “Rexeneración”, una revista fundada xunto col so hermanu en 1900 col envís de denunciar les corrupteles del réxime imperante en México d’aquella. Amás foi tamién ún de los fundadores del Partíu Lliberal Mexicanu, con propuestes como la espropiación de llatifundios, la regulación y mengua de les xornaes llaborales, enseñanza obligatoria hasta los 14 años, o l’abolición de la pena de muerte.

Participó amás en varios procesos revolucionarios, siendo’l contextu d’esta torna la rebelión de la Baxa California. Foi un procesu revolucionariu con enfrentamientos de calter militar, puxada pol Partíu Lliberal escontra’l gobiernu de Porfirio Díaz y que tamién s’espardió a otros puntos del territoriu mexicanu. 

De la importancia de la so figura queda’l términu “Magonismu”, corriente de pensamientu y aición empobinada haza l’autoemancipación y l’autogobiernu, y ye que Magón cuntaba con una llinia de pensamientu averada a sensibilidaes llibertaries. En definitiva, vien a dicir nesti textu que, pa que tengamos una patria verdaderamente llibre, nun basta namái cola independencia formal, sinon qu’hai que dir más alló y tamién tresformar les bases propies, algamar el poder popular.


Notes d’entamu:
-De la Barra foi’l presidente interín de México, tres l’arrenuncia de Porfirio Díaz.
-"El Chato" yera un nomatu de Porfirio Díaz. 


 


A los patriotes

Los Ánxeles, Cal., xunu 16 de 1911

¿Pertenez a México la Baxa California? Sí, vais dicime.

Pos bien: la Baxa California nun pertenez a México, sinon a los Estaos Xuníos, a Inglaterra y a Francia.

El Norte de la Baxa California ta en poder de Cudahy, Otis y otros multimillonarios norteamericanos. Tola mariña occidental de la mesma pertenez a una poderosa compañía perlífera inglesa, y la rexón na que s’asitia Santa Rosalía pertenez a una rica compañía francesa.

¿Qué ye lo que tienen los mexicanos de la Baxa California? iNada!

¿Qué ye lo que-yos va dar a los mexicanos el Partíu Lliberal Mexicanu? ¡Too!

Entós, señores patriotes, ¿qué ye lo que faéis cuando glayáis que tamos vendiendo la patria a los Estaos Xuníos? Contestái.

Vós nun tenéis patria porque tolo qu'hai en México pertenez a los foriatos millonarios qu’ esclavicen a los nuesos hermanos. Nun tenéis patria, cenciellamente porque nun tenéis nin en qué cayer muertos.
Y cuando’l Partíu Lliberal Mexicanu quier conquistar pa vós una verdadera patria, ensin tiranos y ensin esplotadores, protestáis, dicíis fataes y faltáisnos.

Al entorpecer coles vueses protestes los trabayos del Partíu Lliberal Mexicanu, nun faéis otra cosa que torgar que los nuesos echen del país a tolos burgueses y vós garréis posesión de too cuanto esista.

Amás, yá que sois tan patriotes, ¿por qué nun baxáis a pataes a De la Barra de la siella presidencial? De la Barra ye chilenu, nun ye mexicanu, y la Constitución que tanto adoráis diz que namái los mexicanos pueden llegar a verdugos del pueblu. De la Barra ye fíu del que foi cónsul de Chile en México; nació pos, sobre la bandera Chilena. Yá que sois tan patriotes, díi a México, garrái pel pescuezu a De la Barra y echáilu al diañu, xunto con El Chato por supuestu, yá qu’ ésti diz que los capitales foriatos van recibir meyores beneficios col so gobiernu, lo que quier dicir que va favorecer más la esplotación que sufre la clase trabayadora, y depués echái al diañu, tamién, a los ricos, tomando tolo que tienen. Entós vais tener patria.

Rexeneración, 16 de xunu de 1911.

lunes, 23 de septiembre de 2013

Carnés de nación



“Hai que conxugar nese escenario un proceso aberto para as catro nacións (Galiza, Euskal Herria, os Paisos Cataláns e España en sentido estricto)”.

Esa cita ye d’un reciente comunicáu de la formación política gallega Anova, el partíu encabezáu por Beiras. Nun ye la primer vegada que sentimos esi discursu na boca del políticu gallegu, y ye que nun va muncho insistía nunes declaraciones nesta mesma llinia, d’afirmar que l’estáu español taba compuestu por cuatro naciones. En definitiva, ye un vieyu discursu de delles formaciones nacionalistes del estáu español –y tamién de seutores de la izquierda española-, qu’articulen parte del so exe discursivu na negación d’otros pueblos.

Como digo nun ye un discursu novedosu, porque ye emplegáu dende va munches décades, pero realmente nun veo qué utilidá puede tener pa formaciones como Anova, de cara a un procesu de converxencia pa les eleiciones europées, que ye l’enfotu del discursu nel que s’enmarca la frase del entamu.

¿Qué fuercia andaluza, asturiana, castellana, aragonesa, canaria, etc, que tenga como marcu nacional tales territorios, va a querer axuntase a un proyeutu nel que la correllación de fuercies fuera favoratible a organizaciones con plantegamientos como’ l d’Anova? ¿Tien realmente dalguna ventaxa esi discursu de negación?

En cuantes al conteníu de la fras, ¿qué ye eso d’ “España en sentido estricto”? Taría bien que dende Anova se desarrollare tal conceutu, porque ta claro que si analizamos aspeutos como’l cultural, l’hestóricu, l’económicu, o les carauterístiques y situación social, nun tien sentíu dalu tal simplificación de que lo que nun ye “GalEusCa”, ye España. 

Quédanos, en tal casu, el nivel de desarrollu de la conciencia nacional, pero volvemos a lo mesmo: ¿cómo la medimos? ¿Ye nación namái aquella na qu’heba una mayoría nacionalista? Porque entós Galiza nun s’axustaría a tal criteriu. ¿Ye l’eleutoralismu otru criteriu emplegáu? Porque ta claro qu’Andalucía, por exemplu, nun tien una fuercia visible del nacionalismu andaluz na Junta –Gordillo de la CUT, anque dientro d’IU- , pero ye innegable la importancia social que tien el SAT, sindicatu que reconoz a Andalucía como nación, y que reivindica’l drechu d’autodetermín.

Nun últimu casu, ¿el fechu de que territorios cuyu estatutu reconoz la nacionalidá hestórica, como Andalucía, tampoco sirve p'Anova? ¿O'l fechu de que territorios como Asturies nun tengan tal estatus, por criterios puramente políticos, non por cuestiones oxetives?

Poro, camiento que tal discursu negacionista, o simplificador de la realidá del estáu español, nun-y sirve a Anova más que pa zarrase puertes, que seguramente a nivel eleutoral –que ye lo que realmente-yos importa- nun seyan significatives, pero dexen una visión clara de la falta d’internacionalismu y solidaridá d’esti tipu de formaciones pa colos movimientos de lliberación d’otros países del estáu, independientemente del so tamañu. Nun ye lóxico nin afayaízo dar o non dende Galiza’l carné de nación a otros territorios, y menos entá ensin argumentar el porqué.

martes, 3 de septiembre de 2013

8-S: #AsturiesDecide





Ta averándose l’ocho setiembre, y como bien sabréis esti añu torna a haber movilizaciones alternatives a los actos institucionales. Sicasí, esta vegada hai una gran diferencia, y ye que cuntamos con una movilización xunitaria, entamada por Conceyu Abiertu, Andecha, Compromisu ya IZAN, col sofitu de CSI, Xunta Estudiantil, Darréu, y La Semiente (nel cartelu ta tola información).

Ye una gran noticia que siga p’alantre -y afondando- la dinámica de xunir fuercies ente les organizaciones asturianes pertenecientes al ámbitu soberanista, o que defienden unos finxos tresformadores dende un ámbitu d’actuación y un puntu de vista asturianu, polo que ye imprescindible pa toa persona con conciencia nacional asturiana, o simplemente con ganes de defender Asturies como marcu específicu, sofitar la convocatoria.

Como cada 8 setiembre, siempres aveza a surdir l’alderique alredor de qué fecha ye meyor o más afayaíza pa desendolcar como “Día nacional”, y voi dar una pincelada xeneral de la mio visión, na qu’afondaré n’otra ocasión.

Yo soi de los que piensa que la ocasión más afayaíza ye’l 25 de Mayu, poles connotaciones tan poderoses que tien. Sicasí, tamién considero conveniente llevar alantre actos y convocatories alternatives los 8 de setiembre, apurriendo asina’l contrapuntu al provincianismu y cuadonguismu que mos esparden dende les instituciones.

Nesi sen, ye innegable que l’ocho setiembre cunta con un conteníu identitariu, qu’en parte puede llegar a ser válidu y en parte non. En cualquier casu, queda nidio que too ello queda remamao y terxiversao pol españolismu y los sos seutores más reaccionarios, mui venceyaos al cuadonguismu a la hora d’encadarmar el so discursu.

Sicasí, plantegar l’ocho setiembre como “Día de la Nación Asturiana”, valiendo esto dalgo asina como de llema o “marca”, paezme que ye bien interesante, dende la perspeutiva de qu’apurre esi puntu de confrontación pa colos mensaxes españolistes. ¿Quier esto dicir que se tome l’ocho setiembre como día nacional? Non necesariamente.

Cuando fale de lo que voi facer esti domingu, voi dicir que voi “a la manifestación del Día de la Nación Asturiana”. Esti fechu tan simple yá supón frayar los esquemes de quien reciba’l mensaxe. ¿Pero esto nun yera’l día la santina? ¿Qué ye eso de qu’Asturies ye una nación? Ye un fechu que nun hai que subestimar.

A fin de cuentes, vamos reivindicar lo mesmo que’l 25 mayu, o que’l 24 d’agostu, o que’l 5 d’ochobre: la necesidá de soberanía p’Asturies, d’algamar la emancipación social, nacional, de xéneru… etc. La única diferencia ye que nesta fecha nun se pondrá un enfotu especial nos argumentos hestóricos concretos de la fecha.

Personalmente veo muncho más criticable la poca rellevancia qu’en xeneral se-y da a facer alcordanza del Conseyu Soberanu, que salir l’ocho setiembre a reivindicar qu’Asturies nun ye lo que mos cunten dende los medios y les instituciones. Asturies ye una nación, y nós somos clase obrera. Y aspiramos a ser dueños del nuesu destín como asturianos y como obreros.

Poro, reivindiquemos los fechos hestóricos tan rellevantes que representen el 25 mayu, el 24 d’agostu, o’l 5 d’ochobre –por poner exemplos de feches importantes-, pero nun dexemos que’l poder monopolice col so discursu l’ocho setiembre, una fecha na que saca a la lluz el so cuadonguismu más ranciu, la base del discursu col qu’aliena al pueblu asturianu y remana cualquier sentimientu nacional.


Esti 8 setiembre toos y toes a Xixón.