viernes, 29 de marzo de 2013

Jesús Gutiérrez (& Famiglia)





Esti xueves Cuideiru vivió un episodio bastante murniu, cola escoyeta como alcalde d’un miembru del PSOE que nin siquier diba nes llistes nes caberes eleiciones de conceyu. Pero eso nun foi too, y ye que según denunciaron dende la Plataforma pola Democracia en Cuideiru, a la salida del plenu, el Secretariu d’Organización de la FSA amenazó con “dar una ostia” a un miembru del coleutivu, que simplemente quixo dá-y una flor. 

Cuideiru, como tantos otros conceyos d’Asturies, vien sufriendo’l caciquismu desendolcáu principalmente pola FSA-PSOE, xunto con actores “sindicales” como’l SOMA-UGT o incluso CC.OO. Y falo d’organizaciones, non de persones. En Cuideiru había caciquismu con Kiko González, y habralu con Ignacio Fernández, igual qu’en Llangréu hebo caciquismu enantes y depués d’Esther, y tantos otros conceyos.

Non sólo ye custión del PSOE, por supuestu. Otros partíos cunten col so Gabino de turnu, por poner exemplos, pero dende lluéu, n’Asturies el partíu que prautica de mena más avezada aiciones caciquiles –clientelismu, amiguismu, marafundiu económicu, enchufismu, sucursalismu- ye’l PSOE. Si queremos dicilo asina, porque ye’l partíu que más poder tien n’Asturies, pero la realidá ye irrefutable, como incomparable ye la incidencia de l’aición chanchullera del PSOE frente a la del restu de fuercies.

Nes cuenques conocen bien lo que ye proyeutar equis aición de gobiernu, qu’enxamás sal alantre, pero cuyes perres nun apaecen. Tamién saben perbién lo que ye entrar a trabayar nuna empresa porque yes pariente/collaciu d’un cargu de SOMA/CC.OO o direutamente afiliáu. Eso sí, si t’enchufen y nun tas afiliáu, van a “recomendate” que lo faigas –pol vuesu bien, nun seyáis malpensaos ho-.

Como derivao d’esta problemática nel tarrén sindical, tenemos Comités d’Empresa ocupaos n’esclusiva por SOMA-UGT y CC.OO, frutu de les rellaciones clientelares y d’enchufismu. Cuando lleguen les dificultaes económiques na empresa, l’actuación d’estes organizaciones ye l’avezada nelles: complicidá pa cola parte empresarial, ensin plantar cara nin batalla verdaderamente escontra despidos o pieslles. Les consecuencies, como siempres, págales l’obreru, al que ponen tolos pilancos posibles si se-y ocurre plantegar una llucha frontal en defensa de los sos intereses frente a los patronales.

Pero toes estes custiones, que son bien interesantes ya importantes p’Asturies, nun son l’enfotu principal del que quería falar. Tornando al fechu de Cuideiru, ye conveniente falar de les formes. Los actos yá tan espuestos, son bien claros y negativos. Pero anguaño la política de grandes partíos ye más una custión de marketing que de fechos o principios., y nesi tarrén la FSA-PSOE siempres xugó bien les sos cartes.


Al cuntar con una estructura de poder bien afitada, que nel pior de los casos lléva-yos a ganar les eleiciones pela mínima, pueden permitise amosar una imaxe de serenidá, cohesión interno, y de tenelo too baxo control. Nesos finxos tuvo mui basada la etapa de gobiernu de Tini Areces, anque cuando se-yos ponía torgues, sacaben la so verdadera vena autoritaria y antidemocrática. Asina lo amosaron Ana Rosa Migoya cuando’l casu de TeleAsturias, o Fernando Lastra, en dellos encontronazos, por exemplu, col movimientu de reivindicación llingüístico.

Ya incluso’l propiu Tini Areces, nesos prestosos “alcuentros” cola Pita de la Xunta, amosó la so verdadera cara. Y más entá cuando’l Bloque por Asturies frayó’l pautu col PSOE-IU-LV, y Roberto Colunga pasó a ser diputáu del grupu mistu. Dicía munches verdaes, criticaba ensin rodeos al gobiernu Areces, dende una perspeutiva asturiana y d’izquierda tresformadora, y eso mancó muncho. Dende’l gobiernu trataben al Bloque como tránsfugues, nun contestando les sos entrugues, o retrucando faltosaes.

Otru recursu mui emplegáu pola FSA-PSOE cuando ta n’apuros, ye mirar pa cuántos sofitos cunta la organización “X” que los critica. Como seya un partíu extraparllamentariu, van a desprecialu por “minoritariu”. El respetu a les minoríes y la cultura democrática suéna-yos a xaponés. Como seya una vindicación d'oficialidá, dirán que “nun hai demanda” –anque seya mentira-.  De nueu, el respetu a les minoríes, pisotiáu dafechu.

Estes práutiques de matonismu de Jesús Gutiérrez y la Famiglia de la FSA-PSOE y collacios, nun son casos aisllaos. Ellí onde vimos movimientos contestatarios, vimos represión, nengunéu, manipulación, ya incluso, como nesti casu, amenaces d’agresión vinientes de, na más y na menos, que’l Secretariu d’Organización del partíu más votáu n’Asturies.

Nun mos dexemos engañar pola imaxe de “Javier l’Ausente”, que mos gobierna dende’l más absolutu de los silencios. La verdadera cara de la FSA-PSOE, cuando noten que puede abrise dalguna grieta nel so réxime al que niégome a llamar democracia, saquen a los sos perros de presa, verbal, alministrativa, o policialmente falando.

Y nesti casu, nun mos val sustituyir a los d’un partíu polos d’otru. Ta más que demostrao que nes condiciones actuales, el partíu tradicional que tome’l poder  va a desendolcar los mesmos vicios. Pa combatilo nun hai otra que construyir poder popular, y esti, nun tien cabida nin nel sistema políticu y eleutoral d’anguaño, nin nel sistema económicu, nin siquier nel modelu d’estáu o les rellaciones pa con esti. 

Camudar esti panorama dende la base ye la meyor melicina escontra padrinos, secretarios d’organización, y demás Famiglia qu’anguaño carecemos n’Asturies.

viernes, 22 de marzo de 2013

Consumíi, malditos, consumíi




Nun descubro la pólvora si digo qu’ún de los pegoyos básicos y fundamentales del capitalismu ye’l consumismu. Cuanto más se desarrolla esti sistema, la custión del consumismu algama mayor protagonismu ya importancia, hasta facer bono aquello de que “l’orde capitalista ye anguaño una inmensa fábrica, con un hipermercáu amestáu”.

Pa les élites económiques el negociu ye redondu: d’un lláu, col trabayu del obreru, algamen una plusvalía, o lo que ye lo mesmo, queden con gran parte del valor producíu por elli, y d’otru lláu, col salariu apurríu pol xefe, l’obreru destina lo ganao a comprar, tornando’l beneficiu al patrón. Por supuestu, a esto hai qu’amestar otru aspeutu: l’endeudamientu que deriva d’estes aiciones consumistes; dende’l pagu del coche a coses más básiques como puede ser la vivienda, mercantilizaes cuando deberíen de ser un derechu y, poro, tar llibres d’ello. Quieren facenos vivir al día, ensin camentar que vamos a tar empufaos hasta’l día de la nuesa muerte.

Poro, tenemos un círculu perfeutu, nel qu’en conclusión vemos cómo a la fin esi dineru que ganamos col nuesu trabayu, tanto’l que recibimos en forma de salariu como’l que se queda direutamente l’empresariu, va a tornar casi na totalidá al patrón. Too esto ye dalgo xeneral, inherente al sistema capitalista, que podrá presentar ciertes especifidaes según el contestu de cada llugar, pero no que poco más hai que rascar como conceutu.

Sicasí, el consumismu tien otru aspeutu, nel que ye interesante afondar daqué más:  ye una ferramienta del sistema pa desarmanos, pa despolitizanos, convertir la posesión nel centru de too, y en definitiva, caltener l’alienación, y convertinos en suxetos que viven pa trabayar, trabayen pa consumir, y consumen como forma de vida. N’Asturies conocemos bien esta custión, y ye que dientru de les numberoses estratexes de les élites p’achaplanos como pueblu combativu y concenciáu, empleguen l’arma consumista como puntu importante.

Cada vegada tenemos menos fábriques, pero de centros comerciales vamos sobraos. N’Uviéu el texíu industrial muerre ensin remediu, pero surden como setes los Calatrava, Centru Cívicu, Salesas o Los Prados de turnu. Lo mesmo en Xixón, na comarca  d’Avilés con espacios como ParqueAstur, Siero col Parque Principado, les cuenques con Caudalia y Valle’l Nalón, etc. Yo creo que toos nos entrugamos dalguna vez cómo se caltienen toos con vida nun sitiu pequeñu como Asturies…

La rempuesta ye nidia. Nun país como esti, onde pensionistes y prexubilaos conformen un seutor importante de la población como productu del avieyamientu demográficu y la política de sovenciones  pa callar la llucha social, una bona vía d’escape ye la de centrar el “qué facer” alredor del consumismu. Pero la mocedá tampoco queda al marxe de too esto, y ye que por supuestu, ye muncho meyor puxar porque los mozos y moces potencien el  verbu “tener” en llugar del “ser”.

A too esto contribuyen grandes cadenes multinacionales, qu’implanten n’Asturies los sos establecimientos al traviés d’estos espacios comerciales. Munchos d’estos Centros Comerciales siguen con vida gracies a qu’estes compañíes caltienen abiertes les sos tiendes, pesie a que nun son precisamente rentables. Ye evidente l’interés gubernamental por caltener a flote toos estos espacios, anque ye también más qu’evidente que sobren espacios d’esti calter.
 
Otru puntu a considerar dientru del desendolcu del consumismu n’Asturies al traviés de los Centros Comerciales, ye’l tarrén llaboral que se crea alredor d’estos. Puestos de trabayu temporales, precarios, con condiciones en regresión, y que pesie a too ye la única espeutativa llaboral esistente pa munchos asturianes y asturianes, cuya alternativa ye únicamente la emigración.

El neolliberalismu cinca la so llibertá al tarrén mercantil, comercial, y eso ye lo que mos quieren aplicar al traviés del consumismu, que mos sintamos llibres pol fechu de que podemos escoyer si mercar el pantalón nel Decathlon o nel InterSport, o si dir al Calatrava o a Caudalia. La llibertá ye un conceutu amplísimu, pero camiento que precisamente ún de los aspeutos de menor importancia ye precisamente esti, la llibertá a la hora de consumir. 

Demientres nun tengamos garantizada la cobertoria de les nueses necesidaes básiques, y nun tengamos un sistema nel que  la clase obrera seya l’únicu actor, que gobierna, xestiona y trabaya d’él  y pa él, la llibertá de mercar el pimientu  nel Alimerka o nel Eroski ye lo que menos debería d’importanos.  

Combatir la superficialidá que mos quieren llantar al traviés del consumismu como forma de vida ye una forma de defender Asturies, y de resistencia escontra’l capitalismu xabaz.

domingo, 10 de marzo de 2013

La llume siguirá prendiendo




Como toos y toes sabéis, va pocos díes el presidente de la República Bolivariana de Venezuela, Hugo Chávez, morrió, tres nun poder vencer a esa gran llaceria de la nuesa época, el cáncanu. Como nun podía ser d’otra manera nuna figura del so calter, foi un sucesu de sonadía, nel qu’una vez más, el comandante espierta munchu amor y tamién munchu odiu, según el bandu ideolóxicu que güeyemos.
Durante estos díes tan faciéndose milenta análisis alrodiu de los puntos positivos y los negativos de la so presidencia. Sicasí, yo digo daqué: Chávez yera’l cabezaleru, el rostru visible, de tou un movimientu popular encadarmáu dende abaxo, nel proyeutu políticu del PSUV. Como elli mesmo dixo, de mena acertada dafechu: “Chávez ye’l pueblu, y el pueblu ye Chávez”.

Pesie a que caún puede tener el so paecer sobre Chávez o’l proyeutu bolivarianu, ye importante afitar la diferencia ente opiniones y fechos. Hai coses que son opinables, pero hai otres que simplemente son fríos, neutrales, y nidios datos que falen por sí solos. Ye un fechu que dende la llegada al poder del PSUV, Venezuela amenorgó la probitú d’una manera espectacular;  ye un fechu que pasó de cuntar con desigualdaes pergrandes, a cuntar con ún de los coeficientes de desigualdá más baxos d’América –anque siga habiendo contrastes sociales visibles-  ; ye un fechu que dotó de cobertoria social al pueblu, gracies a cada vegada mayor accesu a vivienda, educación, sanidá, trabayu…

Tamién ye un fechu indiscutible que Chávez apurrió una voz escontra l’imperialismu norteamericanu, que dotó de dignidá y soberanía a la so nación, y que puxó pola unidá económica progresiva de llatinoamérica, amás de por una solidaridá inquebrantable pa coles capes desfavorecíes de los países vecinos. A too ello, hai qu’amestar la recuperación de la soberanía de recursos naturales como’l petróleu, de cuyos beneficios salieron les “misiones” que dieron vivienda digno a miles de persones, o que permitieron afitar varies redes de supermercaos –Abastos Bicentenario-, o d’otros métodos de distribución d’alimentos –Merval, PDVAL-, sovencionaos pol estáu pa que tol mundu tuviera accesu a los productos básicos.

D’otra manera, tamién s’entamó’l camín de dotar a los obreros de capacidá de decisión, cola apaición d’empreses de calter estatal onde esisten los denomaos “Conseyos Obreros”, y siempres cola másima llimpieza que permite un procesu eleutoral burgués: observadores internacionales, ya importantes personalidaes polítiques, certificaron en numberoses ocasiones que’l sistema eleutoral venezolanu yera de los más fiables del mundu. Con ello, nin voi entrar nos bilordios alrodiu de que “Chávez manipulaba eleiciones”.

Otru aspeutu a destacar, ye la llucha escontra los imperios mediáticos, propiedá de la oligarquía a la que la revolución bolivariana quita privilexos. Y se fizo apostando por medios públicos y, sobre too, pol puxu absolutamente envidiable de la prensa comunitario. Radios, periódicos, revistes, diarios dixitales… esporpollaron a decenes, fechos pol pueblu, pa informar al pueblu.

Ye nidiu l’avance social que supunxo la llegada al poder del proyeutu del PSUV. Evidentemente, non too ye de collor de rosa, tamién hebo y hai coses negatives, munches, como que quiciabes nun s’afondó lo suficiente durante los caberos años na socialización de la economía.

El facer de Chávez nun entra dientru de la ortodoxia teórica socialista, pero non menos evidente ye que’l procesu revolucionariu venezolanu nun dexó d’avanzar, finando en 14 años con toles inxusticies que se pudo, tres siglos d’atropellos. Agora ye cuando toca analizar cómo ameyorar lo fecho, dir iguando erros, y avanzar na fueya de ruta haza’l socialismu.

Aparte de toes estes custiones, pa min hai un fechu pol qu’Hugo Chávez siempres cuntará cola mio almiración: foi’l cabezaleru d’un movimientu popular que prendió la llume nun continente sumíu na escuridá de les recetes neolliberales –eses qu’agora tamos sufriendo n’Europa-, y les intervenciones imperialistes estaoxunidenses, cola imposición de sangrines dictadures militares –esceuto’l casu cubanu,  un oasis nun desiertu capitalista-.

La llume prendía pol pueblu venezolanu, con Chávez a la tiesta, foi espardiéndose per Bolivia, Ecuador, Nicaragua, Hondures –hasta’l golpe d’estáu-…, y afitó llazos cola pionera llume cubana. Asina hasta conformar un escenariu del que podemos dicir, ensin miéu a enquivocanos, que ye la gran esperanza d’emancipación obrera anguaño esistente. Si hai un enclave nel mundu nel que los obreros tamos ganando la batalla, o en perspeutiva d’ello, esi ye llatinoamérica.

Poro, el camín entamáu va unos 14 años ciarra una etapa cola muerte d’una figura tan importante, pero siguirá, porque’l pueblu ta enfotáu en siguir esfrutando de cada vez más lluz, de nun tornar a los tiempos escuros de probitú xeneralizao y privación de dignidá.

Muncha xente quedó pel camín na llucha pola emancipación del pueblu llatinoamericanu. Unos anónimos, y otros iconos de la clase obrera del mundu, como Salvador Allende, Ernesto Guevara, Victor Jara, Camilo Torres, y tantos otros. Güei podemos dicir con total certeza, que’l Comandante Hugo Rafael Chávez Frías, améstase a esa llista de persones que marcaron el camín, que dimpusieron un enantes y un depués. Ye obligación de toos y toes siguir calteniendo la llume prendida, y espardela per tol mundu. La llucha sigue.


jueves, 7 de marzo de 2013

Nun val too



Va unos díes, dende Equo-Asturies afitaben nun comentariu que “non too val”, respeuto a la llucha de los trabayadores de la fábrica d’armes de Trubia. Según la posición de la organización verde, Equo ta a la escontra del caltenimientu de ciertes actividaes que diríen a la escontra del so ideariu, y una d’elles ye l’armamentística.  Nel so llugar, desplicaron que van a presentar un proyeutu d’ “emplegos verdes”, basaos n’actividaes caltenibles y que compensaríen la perda d’esos puestos de trabayu –supongo yo-.

Anque ye una postura qu’otra xente podrá ver respetable o incluso tar d’alcuerdu, na mio opinión ye una salida de tonu. Val, a min tampoco ye que m’entusiasme que se fabrique armamentu n’Asturies, que se va a emplegar pa los intereses de les oligarquíes en cualquier parte del mundu, pero, ¿de verdá se puede reprochar a los trabayadores que quieran caltener el so puestu de trabayu y, poro, l’actividá de la factoría? ¿De verdá se puede pensar que, con esti sistema –y más na coxuntura d’anguaño- se puede desendolcar de forma efeutiva eso de los “emplegos verdes”?

Amás, nesti casu, la posición d’Equo ye inda más sangrina si tenemos en cuenta que, por poner un exemplu, esta organización toleró la invasión de Libia por parte de la OTAN. Ye una actuación incoherente dafechu que veas mal caltener fábriques d’armamentu nel nuesu territoriu, y al mesmu tiempu nun t’opongas dende l’entamu a una intervención militar que, yá ensin siquier entrar nos sos motivos, debería ser dafechu refugable pa una organización que puxa pol pacifismu –o eso diz-. Poro, sedría recomendable un poco de coherencia nesi sentíu.

D’otru lláu, tamién s’espeya otra custión  nel paecer d’Equo: un analís de la realidá que nun se basa pa nada en posiciones de calter rupturista pa col capitalismu. D’otra manera, nun atalantaría’l sentíu de tar a favor de zarrar la fábrica d’armes. Sí, nun produz carambelos, sinon vehículos y armes que sirven pa matar, pero col pieslle de la fábrica de Trubia, simplemente vamos consiguir amestar cientos o incluso milenta persones más a les llistes de desemplegu, y facer polvu económicamente al territoriu averáu.

El problema que supón la militarización progresivo de los países, l’usu de la intervención bélica por parte de los estaos –o entidaes supraestatales como XE, OTAN, etc.-, o la creación de conflictos armaos por intereses económicos, sólo tien un orixe: capitalismu. Poro, nun tien sentíu esi bonrrollismu de camudar fábrica d’armes por supuestos emplegos alternativos, porque ta alloñao dafechu de la realidá. Si queremos finar col militarismu y demás custiones rellacionaes, lluchemos escontra’l tueru del problema, el capitalismu, y non escontra una fueya del árbol, que ye la fábrica de Trubia, con cuyu zarru sólo perderán los trabayadores.

D’otru lláu, y anque nun ta direutamente rellacionao con Equo, sí que pudimos ver a xente averao col espaciu ideolóxicu d’Equo allegrase pol pieslle adelantáu de la minería del carbón. El motivu, que ye contaminante. Nun importa que la minería seya industria base de bona parte d’Asturies, o la perda de miles de puestos de trabayu. Nun importa la muerte de comarques enteres, la emigración forciao, el declive demográficu, y demás llaceries; simplemente, ye bono que la minería zarre, pa que nun contamine. Eso ye una gran mexada fuera’l tiestu, qu’anque nun sedría xusto atribuyir a Equo como organización, sí que correspuende un tirón d’oreyes a seutores del so espaciu ideolóxicu.

Nesti episodiu de la minería tamos no mesmo: dexen como positivo lo qu’en realidá ye superficial dafechu, porque les esplotaciones carboníferes siguirán siendo les mesmes o incluso más anque piesllen les asturianes. La diferencia: que’l carbón vendrá de fuera, sacao por obreros en condiciones de semi-esclavitú, con un coste mínimu, pa que los Goldman Sachs o Xstrata –dueños d’AZSA- de turnu sigan faciéndose d’oru.

Tamién ye bien remarcable la posición d’Equo-Asturies, favoratible a la fusión de conceyos –por exemplu, na Comarca’l Nalón-. Creo que ye enquivocao dafechu, porque esta postura nun favorez al ciudadanu. Hai que potenciar mecanismos de cooperación pente conceyos, al traviés de ferramientes como les mancomunidaes, pero ye imprescindible caltener o incluso ampliar la cadarma conceyil dende’l puntu de vista de la participación democrática.
 
A mayor centralización, el poder popular perderá puxu, siempres cuntando con que tampoco vamos a consiguir la meta de la participación popular na toma de decisiones col actual sistema, nin con un estáu español que siempres tiende haza la centralización. Poro, falar de “reiniciar la democracia”, y defender al tiempu la fusión de conceyos, ye contradictorio, al menos visto dende una perspeutiva soberanista y anticapitalista.

Pa finar, prestaríame facer una reflexón alrodiu del ecoloxismu como ideoloxía. Considero que’l verdaderu sentíu y utilidá del ecoloxismu –falo a nivel de movimientu sociopolíticu, o de partíu, ensin entrar nel facer bien valiosu del asociacionismu ecoloxista-  podemos atopalu cuando s’enmarca dientru d’un proyeutu ideolóxicu más ampliu. De nueu, hai que señalar al capitalismu como la causa de los males mediuambientales d’esti planeta, polo que nun me paez afayaízo lluchar pol ecoloxismu dende posiciones reformistes.

Les dinámiques de sobreproducción capitalista, la tolerancia de los gobiernos pa colos esfarrapes mediuambientales producíos pola industria, la violación sistemática de la probetaya regulación mediuambiental esistente, son dalgunos de los problemes a los que sólo mos podremos alfrentar de manera verdaderamente efeutiva dende posiciones revolucionaries.

Dicir, como se diz dende’l Partíu Verde Européu, que lo de salir del euru ye un alderique estéril, porque lo prioritario ye remocicar el sistema finacieru, bancariu, etc., ye amosar que dende esi espaciu políticu nun s’apuesta por un proyeutu de clase obrera, nin por tesis que verdaderamente amosen un camín de cambiu.

Na mio  opinión, considero que’l movimientu ecoloxista debe dir lo más averao posible a los movimientos de llucha revolucionario, anticapitalista, ente ellos el marxista. Y siguiendo cola rellación, camiento tamién que’l meyor espaciu onde se puede desendolcar esi movimientu nel marcu específicu asturianu ye dientru d’un proyeutu qu’apueste pola emancipación social y nacional del pueblu asturianu, esto ye, el soberanismu. 

Poro, considero qu’Equo toma un camín enquivocáu dafechu nestes custiones, que tienen un orixe nidiu na falta de crítica real de la organización pa col verdaderu enemigu del ecoloxismu y demás finxos ideolóxicos, esto ye, el capitalismu y les sos dinámiques.

Sicasí, y como non too va a ser criticar –anque la intención sea constructiva-, vamos dicir qu’al césar lo que ye del césar: faen trabayu interesante n’asuntos como puede ser la custión del llobu n’Asturies, y tamién amosen una postura mui positiva en cuantes a la defensa del derechu a la oficialidá del asturianu, y a la escolarización na nuesa llingua. Pero hai puntos que, simplemente, chirríen, porque nun van na llinia de defensa real d’un ecoloxismu efeutivu, nin de defensa de la clase obrera como beneficiariu d’esa llinia ecoloxista.