Asimetríes varies

Tamos acabantes de ver na prensa una noticia qu’igual nun tuvo la rellevancia que daveres merecía: L’alcalde de Gozón llegó a un alcuerdu col de Carreño pa que “cada conceyu asuma los servicios mancomunaos que realmente pueda o quiera costear” na Mancomunidá del Cabu Peñes, lo qu’ellos denomen como “mancomunidá asimétrica”.

N’Asturies esisten numberoses mancomunidaes. Unes formaes por munchos conceyos, otres –como esti casu- por dos. Tamién hai mancomunidaes ensin utilidá nin actividá práutica, y otres que de verdá apurren un serviciu pervaloratible. Con meyor o menor aciertu, la mancomunidá ye una ferramienta espardida n’Asturies dende va munchos años.

Sicasí, una mancomunidá ye una entidá supramunicipal, que debe tener como principal envís la collaboración de tolos conceyos implicaos, y creo que nesti conceutu tien una presencia perimportante la solidaridá. Eso de facer “mancomunidaes asimétriques” equival a dexar ensin utilidá práutica a estes estructures, y ye que si caún va a pagase lo suyo, estes entidaes pierden sentíu.

Esto de la “mancomunidá asimétrica” fízo que m’alcordara d’aquello del “federalismu asimétricu”. Esi conceutu tan asemeyáu púnxolu va non muncho en práutica’l PSOE nel so discursu, como fórmula d’estáu que calmara l’enfotu independentista de territorios como’l catalán. Nesti casu, esi federalismu tocaba a aquellos territorios onde pudiera esistir un problema nacional, básicamente Euskadi –entendío como la CAV- y Catalunya –entendío como’l territoriu del “Principat”-.

A la fin, los autores de dambes asimetríes vienen a ser los mesmos, pero nel casu de les mancomunidaes, el peligru de que s’esparda esi modelu ye real. Dende va tiempu hai distintes voces qu’apuesten pola fusión de conceyos n’Asturies, y una d’elles ye UPyD, de cuyu diputáu depende la mayoría parllamentaria del tridente PSOE-IU-UPyD. La presión de los maxentes pa con esti tema ye constante, pues cunten con munchu interés en desfacer la cadarma territorial asturiana.

Sicasí, pesie a que puedan cuntar cola collaboración de los medios de comunicación asturianos de mases, el pueblu asturianu nun cunta con esi puntu ente les sos vindicaciones principales. Los y les asturianes en xeneral nun creemos necesario tocar la cadarma conceyil asturiana, y en dalgunos casos oponémonos dafechu a ello. El camín pa los interesaos nes fusiones, polo tanto, ye facer efeutivu un ideariu de que “conceyos más grandes cuntarán con más recursos”, “darán meyores servicios”, “permitirán aforru económicu alministrativu”, etc.

Pero nesi argumentariu, cunten con una gran torga: too eso puede consiguise con una bona xestión de los Ayuntamientos, complementada con un mecanismu de collaboración y solidaridá de calter supramunicipal, como ye la mancomunidá, si ta bien xestionada tamién, y hai enfotu en dá-y una utilidá real. Poro, l’interés n’esfarrapar esta estructura, pa ganar tarrén nos sos argumentos, ye una custión nidia.

Nun hai que dexar que se salgan cola suya. Los conceyos asturianos, la cadarma territorial en definitiva, nun ye’l problema d’Asturies. Pol contrariu, si fusionamos conceyos, perderemos inda más calidá democrática, la posibilidá de llegar a exercer dalgún tipu de democracia direuta baxo esti sistema.

El caciquismu va a siguir esistiendo, y va a medrar. El supuestu aforru económicu sedrá mínimu, y va a traer despidos nes alministraciones públiques que fadrán notable’l coste social. Poro, ye primordial nun escaecer esta custión, y nun dexar a los UPyD, PSOE, CC.OO, Equo, etc. de turnu, que consigan crear una corriente d’opinión importante favoratible a la fusión de conceyos. 

Amás d’una custión argumentada dende un puntu materialistao incluso pragmáticu, el conceyu ye un componente perimportante de la identidá asturiana, igual que la parroquia y otres tantes cadarmes de les que surden conceutos como’l conceyu abiertu. Poro, ye la nuesa obligación plantá-yos cara ideolóxica nesta custión tan importante.

Mensaxe a la oligarquía

 Va poco publicábemos en Pallabres un testu de Camilo Torres entituláu Mensaxe a les muyeres . Güei apúrrovos equí la torna d'otru testu d'esti autor, "Mensaxe a la oligarquía", que paeciome prestosu pa dá-y versión na nuesa llingua.

     Mensaxe a la oligarquía

Dirixir un mensaxe a los que nun quieren nin pueden oyer ye un deber murniu. Sicasí, ye un deber, y un deber hestóricu, nel momentu que la oligarquía colombiano quier llegar a facer rematar la so inquinidá escontra la patria y escontra los colombianos.

Dende va más de 150 años la casta económica, les poques families que tienen casi tola riqueza colombiana, usurpó’l poder políticu nel so propiu provechu. Emplegó toles trampes pa caltener esi poder engañando al pueblu.

Inventaron la división pente “lliberales”* y “conservadores”. Esta división, que nun atalantaba’l pueblu, sirvió pa semar l’odiu pente  los mesmos elementos de la clase popular. Esos odios ancestrales tresmitíos de padres a fíos sirvieron únicamente a la oligarquía. Demientres los probes lluchen, los ricos gobiernen nel so propiu provechu. El pueblu nun atalantaba la política de los ricos, pero tola rabia que sentía por nun poder comer nin poder estudiar, por sentise enfermu, ensin casa, ensin tierra y ensin trabayu, tou esi rencor descargábenlu los lliberales probes contra los conservadores probes y los conservadores probes contra los lliberales probes. Los oligarques, los culpables de la mala situación de los probes, güeyaben gayoleros los toros dende la barrera, ganando dineru y dirixendo’l país. 

Lo único que dividía a los oligarques lliberales de los oligarques conservadores yera’l problema del espardimientu del presupuestu y de los puestos públicos. El presupuestu nacional, les rentes públiques, nun algamaben pa dexar satisfechos a los oligarques conservadores y lliberales axuntaos. Por eso s’engarraben pa llegar al poder; pa saldar les cuentes eleutorales dándo-yos puestos públicos a los gamonales adictos y repartise’l presupuestu escluyendo dafechu a los del otru bandu políticu.

Durante cuarenta años los lliberales nun tuvieron puestos, y depués asocedió-yos otro tanto a los conservadores durante 16 años. Les diferencies polítiques y relixosess ya apararen. Ya nun s’engarraben ente los oligarques sinon pol dineru del gobiernu y polos puestos públicos. Mientres tantu, el pueblu decatose de que la so llucha pol partíu lliberal o pol partiu conservador fundíalu cada vegada más na probitú. Los ricos nun se decataben de que’l pueblu taba fartu d’ellos. Cuando apaeció Jorge Eliécer Gaitán enarbolando la bandera de la restauración moral de la República, fízolo tanto a la escontra de la oligarquía lliberal como de la conservadora. Ye por ello que les dos oligarquíes foron antigaitanistes. La oligarquía lliberal tornose  gaitanista después que la oligarquía conservadora matara a Gaitán nes cais de Bogotá.

Yá entamada nel camín de la violencia pa caltener el poder, la oligarquía nun aparará nel emplegu d’esa violencia. Punxo a los campesinos lliberales a que se mataren colos conservadores. Cuando l’agresividá, l’odiu y la rensía de los probes derivaron nuna llucha ente los necesitaos de Colombia, la oligarquía apavorió, favoreciendo’l golpe militar. El gobiernu militar tampoco sirvió de mena eficaz dafechu  a los intereses de la oligarquía. 

Entós el xefe de la oligarquía lliberal, doctor Alberto Lleras Camargo, y el xefe de la oligarquía conservadora, doctor Laureano Gómez, aconceyaron pa facer un esame de concencia y se dixeron: "Por tar lluchando pol repartu del presupuestu y del botín burocráticu, casi perdemos el poder pa la oligarquía. Dexémosnos d’engarranos por eso faciendo un contratu, dividiéndonos el país como quien se divide una facienda, por metá, ente les dos oligarquíes. La paridá y l’alternancia mos permiten un repartu equitativu y asina podemos formar un partíu nuevu, el partíu de la oligarquía”. Asina ñació’l Frente Nacional como’l primer partíu de clase, como’l partíu de la oligarquía colombiano.

El pueblu torna a ser engañáu y concurre a les eleiciones a votar el plebiscitu, a votar por Alberto Lleras, pol Frenti Nacional. El resultáu, naturalmente, foi pior: agora yera la oligarquía xunida la que gobernaba en contra del pueblu. Por eso too lo qu’asperaben los colombianos salió al contrariu. El Frenti Nacional ufrió paz y los campesinos siguen siendo asesinaos;  hebo matances obreres de los azucareros y de Santa Bárbara, invadieron les universidaes y espoxigó’l presupuestu de guerra.

El Frente Nacional dixo qu’iguaría la situación financiera, y duplicó la deuda esterna produciendo tres devaluaciones (hasta agora) y con elles la miseria del pueblu colombianu por varies xeneraciones. El Frenti Nacional dixo que fadría la reforma agraria, nun fizo sinon dictar una llei que garantiza los intereses de los ricos a la escontra de los derechos de los probes.

Impúnxo-y al país un candidatu ineptu pa la presidencia de la República. El Frenti Nacional llogró la mayor abstención eleutoral de nuesa hestoria y agora, énte’l so fracasu total, ¿qué ta faciendo la oligarquía?

Torna a recurrir a la violencia. Declara l’estáu de sitiu. Llexisla por decretu. Vende’l país a los Estaos Xuníos. Aconceya nun lluxosu hotel  y decide sobre’l prósimu presidente. Dende los salones deciden sobre tol país. Tan ciegos dafechu.

Como caberu glayíu d’alerta, quiero dicivos:

Señores oligarques, el Pueblu ya nun-yos creye un res de lo que dicen. El Pueblu nun quier votar por ustedes. El Pueblu ta fartu y desesperáu. El Pueblo nun quier dir a les eleiciones qu’ustedes organicen. El Pueblo nun quier a Carlos ni Alberto Lleras nin a dengún d’ ustedes. El Pueblu ta sufriendo y resueltu a too. El Pueblu sabe qu’ustedes tamién tan resueltos a too. Poro, pído-yos que seyan realistes, y que si quieren enguedeyar  al Pueblu con nueves estratexes polítiques, nun vayan a creyer que’l Pueblu va a tene-yos fe. Ustedes saben que la llucha dirá hasta les consecuencies caberes. La esperiencia fora tan amarga que’l Pueblu ya ta decidíu a echar el too pol too. 

Murniamente los oligarques aisllaos, ciegos y arguyosos paecen nun querer decatase de que la revolución de les mases populares colombianes nun aparará agora sinon hasta algamar la conquista del poder pal Pueblu.

Jesús Gutiérrez (& Famiglia)

Esti xueves Cuideiru vivió un episodio bastante murniu, cola escoyeta como alcalde d’un miembru del PSOE que nin siquier diba nes llistes nes caberes eleiciones de conceyu. Pero eso nun foi too, y ye que según denunciaron dende la Plataforma pola Democracia en Cuideiru, a la salida del plenu, el Secretariu d’Organización de la FSA amenazó con “dar una ostia” a un miembru del coleutivu, que simplemente quixo dá-y una flor. 

Cuideiru, como tantos otros conceyos d’Asturies, vien sufriendo’l caciquismu desendolcáu principalmente pola FSA-PSOE, xunto con actores “sindicales” como’l SOMA-UGT o incluso CC.OO. Y falo d’organizaciones, non de persones. En Cuideiru había caciquismu con Kiko González, y habralu con Ignacio Fernández, igual qu’en Llangréu hebo caciquismu enantes y depués d’Esther, y tantos otros conceyos.

Non sólo ye custión del PSOE, por supuestu. Otros partíos cunten col so Gabino de turnu, por poner exemplos, pero dende lluéu, n’Asturies el partíu que prautica de mena más avezada aiciones caciquiles –clientelismu, amiguismu, marafundiu económicu, enchufismu, sucursalismu- ye’l PSOE. Si queremos dicilo asina, porque ye’l partíu que más poder tien n’Asturies, pero la realidá ye irrefutable, como incomparable ye la incidencia de l’aición chanchullera del PSOE frente a la del restu de fuercies.

Nes cuenques conocen bien lo que ye proyeutar equis aición de gobiernu, qu’enxamás sal alantre, pero cuyes perres nun apaecen. Tamién saben perbién lo que ye entrar a trabayar nuna empresa porque yes pariente/collaciu d’un cargu de SOMA/CC.OO o direutamente afiliáu. Eso sí, si t’enchufen y nun tas afiliáu, van a “recomendate” que lo faigas –pol vuesu bien, nun seyáis malpensaos ho-.

Como derivao d’esta problemática nel tarrén sindical, tenemos Comités d’Empresa ocupaos n’esclusiva por SOMA-UGT y CC.OO, frutu de les rellaciones clientelares y d’enchufismu. Cuando lleguen les dificultaes económiques na empresa, l’actuación d’estes organizaciones ye l’avezada nelles: complicidá pa cola parte empresarial, ensin plantar cara nin batalla verdaderamente escontra despidos o pieslles. Les consecuencies, como siempres, págales l’obreru, al que ponen tolos pilancos posibles si se-y ocurre plantegar una llucha frontal en defensa de los sos intereses frente a los patronales.

Pero toes estes custiones, que son bien interesantes ya importantes p’Asturies, nun son l’enfotu principal del que quería falar. Tornando al fechu de Cuideiru, ye conveniente falar de les formes. Los actos yá tan espuestos, son bien claros y negativos. Pero anguaño la política de grandes partíos ye más una custión de marketing que de fechos o principios., y nesi tarrén la FSA-PSOE siempres xugó bien les sos cartes.

Al cuntar con una estructura de poder bien afitada, que nel pior de los casos lléva-yos a ganar les eleiciones pela mínima, pueden permitise amosar una imaxe de serenidá, cohesión interno, y de tenelo too baxo control. Nesos finxos tuvo mui basada la etapa de gobiernu de Tini Areces, anque cuando se-yos ponía torgues, sacaben la so verdadera vena autoritaria y antidemocrática. Asina lo amosaron Ana Rosa Migoya cuando’l casu de TeleAsturias, o Fernando Lastra, en dellos encontronazos, por exemplu, col movimientu de reivindicación llingüístico.

Ya incluso’l propiu Tini Areces, nesos prestosos “alcuentros” cola Pita de la Xunta, amosó la so verdadera cara. Y más entá cuando’l Bloque por Asturies frayó’l pautu col PSOE-IU-LV, y Roberto Colunga pasó a ser diputáu del grupu mistu. Dicía munches verdaes, criticaba ensin rodeos al gobiernu Areces, dende una perspeutiva asturiana y d’izquierda tresformadora, y eso mancó muncho. Dende’l gobiernu trataben al Bloque como tránsfugues, nun contestando les sos entrugues, o retrucando faltosaes.

Otru recursu mui emplegáu pola FSA-PSOE cuando ta n’apuros, ye mirar pa cuántos sofitos cunta la organización “X” que los critica. Como seya un partíu extraparllamentariu, van a desprecialu por “minoritariu”. El respetu a les minoríes y la cultura democrática suéna-yos a xaponés. Como seya una vindicación d'oficialidá, dirán que “nun hai demanda” –anque seya mentira-.  De nueu, el respetu a les minoríes, pisotiáu dafechu.

Estes práutiques de matonismu de Jesús Gutiérrez y la Famiglia de la FSA-PSOE y collacios, nun son casos aisllaos. Ellí onde vimos movimientos contestatarios, vimos represión, nengunéu, manipulación, ya incluso, como nesti casu, amenaces d’agresión vinientes de, na más y na menos, que’l Secretariu d’Organización del partíu más votáu n’Asturies.

Nun mos dexemos engañar pola imaxe de “Javier l’Ausente”, que mos gobierna dende’l más absolutu de los silencios. La verdadera cara de la FSA-PSOE, cuando noten que puede abrise dalguna grieta nel so réxime al que niégome a llamar democracia, saquen a los sos perros de presa, verbal, alministrativa, o policialmente falando.

Y nesti casu, nun mos val sustituyir a los d’un partíu polos d’otru. Ta más que demostrao que nes condiciones actuales, el partíu tradicional que tome’l poder  va a desendolcar los mesmos vicios. Pa combatilo nun hai otra que construyir poder popular, y esti, nun tien cabida nin nel sistema políticu y eleutoral d’anguaño, nin nel sistema económicu, nin siquier nel modelu d’estáu o les rellaciones pa con esti. 

Camudar esti panorama dende la base ye la meyor melicina escontra padrinos, secretarios d’organización, y demás Famiglia qu’anguaño carecemos n’Asturies.

Consumíi, malditos, consumíi

Nun descubro la pólvora si digo qu’ún de los pegoyos básicos y fundamentales del capitalismu ye’l consumismu. Cuanto más se desarrolla esti sistema, la custión del consumismu algama mayor protagonismu ya importancia, hasta facer bono aquello de que “l’orde capitalista ye anguaño una inmensa fábrica, con un hipermercáu amestáu”.

Pa les élites económiques el negociu ye redondu: d’un lláu, col trabayu del obreru, algamen una plusvalía, o lo que ye lo mesmo, queden con gran parte del valor producíu por elli, y d’otru lláu, col salariu apurríu pol xefe, l’obreru destina lo ganao a comprar, tornando’l beneficiu al patrón. Por supuestu, a esto hai qu’amestar otru aspeutu: l’endeudamientu que deriva d’estes aiciones consumistes; dende’l pagu del coche a coses más básiques como puede ser la vivienda, mercantilizaes cuando deberíen de ser un derechu y, poro, tar llibres d’ello. Quieren facenos vivir al día, ensin camentar que vamos a tar empufaos hasta’l día de la nuesa muerte.

Poro, tenemos un círculu perfeutu, nel qu’en conclusión vemos cómo a la fin esi dineru que ganamos col nuesu trabayu, tanto’l que recibimos en forma de salariu como’l que se queda direutamente l’empresariu, va a tornar casi na totalidá al patrón. Too esto ye dalgo xeneral, inherente al sistema capitalista, que podrá presentar ciertes especifidaes según el contestu de cada llugar, pero no que poco más hai que rascar como conceutu.

Sicasí, el consumismu tien otru aspeutu, nel que ye interesante afondar daqué más:  ye una ferramienta del sistema pa desarmanos, pa despolitizanos, convertir la posesión nel centru de too, y en definitiva, caltener l’alienación, y convertinos en suxetos que viven pa trabayar, trabayen pa consumir, y consumen como forma de vida. N’Asturies conocemos bien esta custión, y ye que dientru de les numberoses estratexes de les élites p’achaplanos como pueblu combativu y concenciáu, empleguen l’arma consumista como puntu importante.

Cada vegada tenemos menos fábriques, pero de centros comerciales vamos sobraos. N’Uviéu el texíu industrial muerre ensin remediu, pero surden como setes los Calatrava, Centru Cívicu, Salesas o Los Prados de turnu. Lo mesmo en Xixón, na comarca  d’Avilés con espacios como ParqueAstur, Siero col Parque Principado, les cuenques con Caudalia y Valle’l Nalón, etc. Yo creo que toos nos entrugamos dalguna vez cómo se caltienen toos con vida nun sitiu pequeñu como Asturies…

La rempuesta ye nidia. Nun país como esti, onde pensionistes y prexubilaos conformen un seutor importante de la población como productu del avieyamientu demográficu y la política de sovenciones  pa callar la llucha social, una bona vía d’escape ye la de centrar el “qué facer” alredor del consumismu. Pero la mocedá tampoco queda al marxe de too esto, y ye que por supuestu, ye muncho meyor puxar porque los mozos y moces potencien el  verbu “tener” en llugar del “ser”.

A too esto contribuyen grandes cadenes multinacionales, qu’implanten n’Asturies los sos establecimientos al traviés d’estos espacios comerciales. Munchos d’estos Centros Comerciales siguen con vida gracies a qu’estes compañíes caltienen abiertes les sos tiendes, pesie a que nun son precisamente rentables. Ye evidente l’interés gubernamental por caltener a flote toos estos espacios, anque ye también más qu’evidente que sobren espacios d’esti calter.

 

Otru puntu a considerar dientru del desendolcu del consumismu n’Asturies al traviés de los Centros Comerciales, ye’l tarrén llaboral que se crea alredor d’estos. Puestos de trabayu temporales, precarios, con condiciones en regresión, y que pesie a too ye la única espeutativa llaboral esistente pa munchos asturianes y asturianes, cuya alternativa ye únicamente la emigración.

El neolliberalismu cinca la so llibertá al tarrén mercantil, comercial, y eso ye lo que mos quieren aplicar al traviés del consumismu, que mos sintamos llibres pol fechu de que podemos escoyer si mercar el pantalón nel Decathlon o nel InterSport, o si dir al Calatrava o a Caudalia. La llibertá ye un conceutu amplísimu, pero camiento que precisamente ún de los aspeutos de menor importancia ye precisamente esti, la llibertá a la hora de consumir. 

Demientres nun tengamos garantizada la cobertoria de les nueses necesidaes básiques, y nun tengamos un sistema nel que  la clase obrera seya l’únicu actor, que gobierna, xestiona y trabaya d’él  y pa él, la llibertá de mercar el pimientu  nel Alimerka o nel Eroski ye lo que menos debería d’importanos.  

Combatir la superficialidá que mos quieren llantar al traviés del consumismu como forma de vida ye una forma de defender Asturies, y de resistencia escontra’l capitalismu xabaz.