domingo, 10 de marzo de 2013

La llume siguirá prendiendo




Como toos y toes sabéis, va pocos díes el presidente de la República Bolivariana de Venezuela, Hugo Chávez, morrió, tres nun poder vencer a esa gran llaceria de la nuesa época, el cáncanu. Como nun podía ser d’otra manera nuna figura del so calter, foi un sucesu de sonadía, nel qu’una vez más, el comandante espierta munchu amor y tamién munchu odiu, según el bandu ideolóxicu que güeyemos.
Durante estos díes tan faciéndose milenta análisis alrodiu de los puntos positivos y los negativos de la so presidencia. Sicasí, yo digo daqué: Chávez yera’l cabezaleru, el rostru visible, de tou un movimientu popular encadarmáu dende abaxo, nel proyeutu políticu del PSUV. Como elli mesmo dixo, de mena acertada dafechu: “Chávez ye’l pueblu, y el pueblu ye Chávez”.

Pesie a que caún puede tener el so paecer sobre Chávez o’l proyeutu bolivarianu, ye importante afitar la diferencia ente opiniones y fechos. Hai coses que son opinables, pero hai otres que simplemente son fríos, neutrales, y nidios datos que falen por sí solos. Ye un fechu que dende la llegada al poder del PSUV, Venezuela amenorgó la probitú d’una manera espectacular;  ye un fechu que pasó de cuntar con desigualdaes pergrandes, a cuntar con ún de los coeficientes de desigualdá más baxos d’América –anque siga habiendo contrastes sociales visibles-  ; ye un fechu que dotó de cobertoria social al pueblu, gracies a cada vegada mayor accesu a vivienda, educación, sanidá, trabayu…

Tamién ye un fechu indiscutible que Chávez apurrió una voz escontra l’imperialismu norteamericanu, que dotó de dignidá y soberanía a la so nación, y que puxó pola unidá económica progresiva de llatinoamérica, amás de por una solidaridá inquebrantable pa coles capes desfavorecíes de los países vecinos. A too ello, hai qu’amestar la recuperación de la soberanía de recursos naturales como’l petróleu, de cuyos beneficios salieron les “misiones” que dieron vivienda digno a miles de persones, o que permitieron afitar varies redes de supermercaos –Abastos Bicentenario-, o d’otros métodos de distribución d’alimentos –Merval, PDVAL-, sovencionaos pol estáu pa que tol mundu tuviera accesu a los productos básicos.

D’otra manera, tamién s’entamó’l camín de dotar a los obreros de capacidá de decisión, cola apaición d’empreses de calter estatal onde esisten los denomaos “Conseyos Obreros”, y siempres cola másima llimpieza que permite un procesu eleutoral burgués: observadores internacionales, ya importantes personalidaes polítiques, certificaron en numberoses ocasiones que’l sistema eleutoral venezolanu yera de los más fiables del mundu. Con ello, nin voi entrar nos bilordios alrodiu de que “Chávez manipulaba eleiciones”.

Otru aspeutu a destacar, ye la llucha escontra los imperios mediáticos, propiedá de la oligarquía a la que la revolución bolivariana quita privilexos. Y se fizo apostando por medios públicos y, sobre too, pol puxu absolutamente envidiable de la prensa comunitario. Radios, periódicos, revistes, diarios dixitales… esporpollaron a decenes, fechos pol pueblu, pa informar al pueblu.

Ye nidiu l’avance social que supunxo la llegada al poder del proyeutu del PSUV. Evidentemente, non too ye de collor de rosa, tamién hebo y hai coses negatives, munches, como que quiciabes nun s’afondó lo suficiente durante los caberos años na socialización de la economía.

El facer de Chávez nun entra dientru de la ortodoxia teórica socialista, pero non menos evidente ye que’l procesu revolucionariu venezolanu nun dexó d’avanzar, finando en 14 años con toles inxusticies que se pudo, tres siglos d’atropellos. Agora ye cuando toca analizar cómo ameyorar lo fecho, dir iguando erros, y avanzar na fueya de ruta haza’l socialismu.

Aparte de toes estes custiones, pa min hai un fechu pol qu’Hugo Chávez siempres cuntará cola mio almiración: foi’l cabezaleru d’un movimientu popular que prendió la llume nun continente sumíu na escuridá de les recetes neolliberales –eses qu’agora tamos sufriendo n’Europa-, y les intervenciones imperialistes estaoxunidenses, cola imposición de sangrines dictadures militares –esceuto’l casu cubanu,  un oasis nun desiertu capitalista-.

La llume prendía pol pueblu venezolanu, con Chávez a la tiesta, foi espardiéndose per Bolivia, Ecuador, Nicaragua, Hondures –hasta’l golpe d’estáu-…, y afitó llazos cola pionera llume cubana. Asina hasta conformar un escenariu del que podemos dicir, ensin miéu a enquivocanos, que ye la gran esperanza d’emancipación obrera anguaño esistente. Si hai un enclave nel mundu nel que los obreros tamos ganando la batalla, o en perspeutiva d’ello, esi ye llatinoamérica.

Poro, el camín entamáu va unos 14 años ciarra una etapa cola muerte d’una figura tan importante, pero siguirá, porque’l pueblu ta enfotáu en siguir esfrutando de cada vez más lluz, de nun tornar a los tiempos escuros de probitú xeneralizao y privación de dignidá.

Muncha xente quedó pel camín na llucha pola emancipación del pueblu llatinoamericanu. Unos anónimos, y otros iconos de la clase obrera del mundu, como Salvador Allende, Ernesto Guevara, Victor Jara, Camilo Torres, y tantos otros. Güei podemos dicir con total certeza, que’l Comandante Hugo Rafael Chávez Frías, améstase a esa llista de persones que marcaron el camín, que dimpusieron un enantes y un depués. Ye obligación de toos y toes siguir calteniendo la llume prendida, y espardela per tol mundu. La llucha sigue.


jueves, 7 de marzo de 2013

Nun val too



Va unos díes, dende Equo-Asturies afitaben nun comentariu que “non too val”, respeuto a la llucha de los trabayadores de la fábrica d’armes de Trubia. Según la posición de la organización verde, Equo ta a la escontra del caltenimientu de ciertes actividaes que diríen a la escontra del so ideariu, y una d’elles ye l’armamentística.  Nel so llugar, desplicaron que van a presentar un proyeutu d’ “emplegos verdes”, basaos n’actividaes caltenibles y que compensaríen la perda d’esos puestos de trabayu –supongo yo-.

Anque ye una postura qu’otra xente podrá ver respetable o incluso tar d’alcuerdu, na mio opinión ye una salida de tonu. Val, a min tampoco ye que m’entusiasme que se fabrique armamentu n’Asturies, que se va a emplegar pa los intereses de les oligarquíes en cualquier parte del mundu, pero, ¿de verdá se puede reprochar a los trabayadores que quieran caltener el so puestu de trabayu y, poro, l’actividá de la factoría? ¿De verdá se puede pensar que, con esti sistema –y más na coxuntura d’anguaño- se puede desendolcar de forma efeutiva eso de los “emplegos verdes”?

Amás, nesti casu, la posición d’Equo ye inda más sangrina si tenemos en cuenta que, por poner un exemplu, esta organización toleró la invasión de Libia por parte de la OTAN. Ye una actuación incoherente dafechu que veas mal caltener fábriques d’armamentu nel nuesu territoriu, y al mesmu tiempu nun t’opongas dende l’entamu a una intervención militar que, yá ensin siquier entrar nos sos motivos, debería ser dafechu refugable pa una organización que puxa pol pacifismu –o eso diz-. Poro, sedría recomendable un poco de coherencia nesi sentíu.

D’otru lláu, tamién s’espeya otra custión  nel paecer d’Equo: un analís de la realidá que nun se basa pa nada en posiciones de calter rupturista pa col capitalismu. D’otra manera, nun atalantaría’l sentíu de tar a favor de zarrar la fábrica d’armes. Sí, nun produz carambelos, sinon vehículos y armes que sirven pa matar, pero col pieslle de la fábrica de Trubia, simplemente vamos consiguir amestar cientos o incluso milenta persones más a les llistes de desemplegu, y facer polvu económicamente al territoriu averáu.

El problema que supón la militarización progresivo de los países, l’usu de la intervención bélica por parte de los estaos –o entidaes supraestatales como XE, OTAN, etc.-, o la creación de conflictos armaos por intereses económicos, sólo tien un orixe: capitalismu. Poro, nun tien sentíu esi bonrrollismu de camudar fábrica d’armes por supuestos emplegos alternativos, porque ta alloñao dafechu de la realidá. Si queremos finar col militarismu y demás custiones rellacionaes, lluchemos escontra’l tueru del problema, el capitalismu, y non escontra una fueya del árbol, que ye la fábrica de Trubia, con cuyu zarru sólo perderán los trabayadores.

D’otru lláu, y anque nun ta direutamente rellacionao con Equo, sí que pudimos ver a xente averao col espaciu ideolóxicu d’Equo allegrase pol pieslle adelantáu de la minería del carbón. El motivu, que ye contaminante. Nun importa que la minería seya industria base de bona parte d’Asturies, o la perda de miles de puestos de trabayu. Nun importa la muerte de comarques enteres, la emigración forciao, el declive demográficu, y demás llaceries; simplemente, ye bono que la minería zarre, pa que nun contamine. Eso ye una gran mexada fuera’l tiestu, qu’anque nun sedría xusto atribuyir a Equo como organización, sí que correspuende un tirón d’oreyes a seutores del so espaciu ideolóxicu.

Nesti episodiu de la minería tamos no mesmo: dexen como positivo lo qu’en realidá ye superficial dafechu, porque les esplotaciones carboníferes siguirán siendo les mesmes o incluso más anque piesllen les asturianes. La diferencia: que’l carbón vendrá de fuera, sacao por obreros en condiciones de semi-esclavitú, con un coste mínimu, pa que los Goldman Sachs o Xstrata –dueños d’AZSA- de turnu sigan faciéndose d’oru.

Tamién ye bien remarcable la posición d’Equo-Asturies, favoratible a la fusión de conceyos –por exemplu, na Comarca’l Nalón-. Creo que ye enquivocao dafechu, porque esta postura nun favorez al ciudadanu. Hai que potenciar mecanismos de cooperación pente conceyos, al traviés de ferramientes como les mancomunidaes, pero ye imprescindible caltener o incluso ampliar la cadarma conceyil dende’l puntu de vista de la participación democrática.
 
A mayor centralización, el poder popular perderá puxu, siempres cuntando con que tampoco vamos a consiguir la meta de la participación popular na toma de decisiones col actual sistema, nin con un estáu español que siempres tiende haza la centralización. Poro, falar de “reiniciar la democracia”, y defender al tiempu la fusión de conceyos, ye contradictorio, al menos visto dende una perspeutiva soberanista y anticapitalista.

Pa finar, prestaríame facer una reflexón alrodiu del ecoloxismu como ideoloxía. Considero que’l verdaderu sentíu y utilidá del ecoloxismu –falo a nivel de movimientu sociopolíticu, o de partíu, ensin entrar nel facer bien valiosu del asociacionismu ecoloxista-  podemos atopalu cuando s’enmarca dientru d’un proyeutu ideolóxicu más ampliu. De nueu, hai que señalar al capitalismu como la causa de los males mediuambientales d’esti planeta, polo que nun me paez afayaízo lluchar pol ecoloxismu dende posiciones reformistes.

Les dinámiques de sobreproducción capitalista, la tolerancia de los gobiernos pa colos esfarrapes mediuambientales producíos pola industria, la violación sistemática de la probetaya regulación mediuambiental esistente, son dalgunos de los problemes a los que sólo mos podremos alfrentar de manera verdaderamente efeutiva dende posiciones revolucionaries.

Dicir, como se diz dende’l Partíu Verde Européu, que lo de salir del euru ye un alderique estéril, porque lo prioritario ye remocicar el sistema finacieru, bancariu, etc., ye amosar que dende esi espaciu políticu nun s’apuesta por un proyeutu de clase obrera, nin por tesis que verdaderamente amosen un camín de cambiu.

Na mio  opinión, considero que’l movimientu ecoloxista debe dir lo más averao posible a los movimientos de llucha revolucionario, anticapitalista, ente ellos el marxista. Y siguiendo cola rellación, camiento tamién que’l meyor espaciu onde se puede desendolcar esi movimientu nel marcu específicu asturianu ye dientru d’un proyeutu qu’apueste pola emancipación social y nacional del pueblu asturianu, esto ye, el soberanismu. 

Poro, considero qu’Equo toma un camín enquivocáu dafechu nestes custiones, que tienen un orixe nidiu na falta de crítica real de la organización pa col verdaderu enemigu del ecoloxismu y demás finxos ideolóxicos, esto ye, el capitalismu y les sos dinámiques.

Sicasí, y como non too va a ser criticar –anque la intención sea constructiva-, vamos dicir qu’al césar lo que ye del césar: faen trabayu interesante n’asuntos como puede ser la custión del llobu n’Asturies, y tamién amosen una postura mui positiva en cuantes a la defensa del derechu a la oficialidá del asturianu, y a la escolarización na nuesa llingua. Pero hai puntos que, simplemente, chirríen, porque nun van na llinia de defensa real d’un ecoloxismu efeutivu, nin de defensa de la clase obrera como beneficiariu d’esa llinia ecoloxista.

miércoles, 27 de febrero de 2013

Graciano, el nadapoderosu





N’Asturies, per desgracia, carecemos dende va munchos años los gobiernos de la FSA-PSOE, a vegaes en solitariu, y otres sofitaos polos IU o UPyD de turnu, y por supuestu, siempres cola inestimable collaboración de CC.OO y SOMA-UGT. Durante bona parte d’eses numberoses llexislatures de gobiernu, tuviemos a Graciano Torre como una figura importante, encargáu siempres d’estayes clave como Industria o Economía.

Nesti tiempu, tamién per desgracia, vivimos abondos conflictos llaborales n’Asturies, en munchos casos rellacionaos col pieslle d’empreses o instalaciones de determinaes compañíes. En práuticamente tolos casos, ún de los exes d’actuación de los representantes sindicales foi acudir al, en teoría, toopoderosu Graciano Torre, el superconseyeru que too lo puede iguar cola so mediación.

Sicasí, col pasu los años, vemos cómo esi apueste de CC.OO y UGT por consiguir aparar los despidos, o les regresiones nes condiciones llaborales, por mediu de la mediación institucional, ye inútil dafechu. Chupa Chups, Alas Aluminium, Venturo XXI, Rioglass, Juliana, Crady, Suzuki, y tantes otres decenes d’empreses son bonos testigos de que, en realidá, Graciano Torre, como’l restu del gobiernu asturianu, son “nadapoderosos”.

El gobiernu asturianu vien amosando que siempres sirve a los intereses del capital, en nengún casu a los trabayadores. Cuando los obreros d’Autotex s’encadenaron a les máquines pa que nun les llevaran, les fuerces de seguridá del estáu, manexaes por delegación de gobiernu, y cola complicidá del gobiernu asturianu, acudieron al rescate de la empresa, pa qu’enrriba de que dexaba na cai a más de 200 trabayadores, pudiera treslladar o vender la maquinaria. 

Esta incapacidá, nunos casos voluntaria y n’otros non, del gobiernu asturianu pa defender a los trabayadores, vien por tres víes: 

1)Ye cierto que pa determinaes actuaciones, la capacidá de maniobra del gobiernu asturianu ye mui llimitada, pola absoluta falta de soberanía cola que cunta n’estayes clave.
 2)Tamos nun sistema capitalista y, poro, ye natural que les instituciones de gobiernu defiendan más los intereses de la clase dominante, que los de la clase obrera.
 3)La escoyeta de cualquiera de los partíos tradicionales y los sos derivaos, siempres va a traer una tendencia haza caltener los sos ñeros d’enchufismu y cuotes de poder, ensin un interés real por camudar el panorama socioeconómicu y demográficu d’Asturies 

Estes dos víes caberes, incluso podríen amestase nuna sola, y ye que demientres temos baxo esti sistema, anque la mona se vista de seda, mona se queda. Con otres opciones polítiques rupturistes podríen ameyorar les coses, dende lluéu, pero seguiríen delles contradicciones de clase inevitables.

D’otru lláu, ye destacable’l papel de CC.OO, UGT ya incluso USO en munchos casos, como los sindicatos institucionales protagonistes d’esta estratexa dende va munchos años. Los sindicatos mayoritarios apuesten siempres pola “paz social”, por contener la llucha de la clase obrera con toles sos armes en defensa del puestu de trabayu o d’unes condiciones dignes. 

Amás, son innegables los finxos de xunión, por exemplu, de SOMA-UGT pa cola FSA, na xestión de fondos mineros, nos cargos executivos del partíu, incluso en cargos de gobiernu.  Nun ye nada nuevo’l poder fácticu que supón Fernández-Villa y el SOMA dientru de la FSA, y polo tanto, esiste una complicidá ente estructures de gobiernu y axentes sindicales mayoritarios pal caltenimientu d’unos intereses de poder determinaos, que nun atienden a los intereses de los y les trabayadores.

Poro, la conclusión que sacamos, ye que la estratexa d’acudir a “Graciano toopoderosu” ye un engañabobos pa calmar a los y les obreres, y aparar la so llucha. Lo que nun consiga por sí mesma la clase obrera organizada, nun mos lo va a dar nin el gobiernu asturianu, nin los sindicatos institucionales y, poro, ye imprescindible tomar concencia de que CCOO y UGT nun son ferramientes válides pa la defensa de los nuesos intereses.

Pesie a too, ye evidente, como dicía Lenin, de que ye necesario desendolcar la llucha “al traviés d’instituciones polítiques concretes”, y eses, d’un lláu, pueden ser l’apueste pol sindicalismu de clase, encarnáu en CSI, CNT, CGT, etc, -según preste más pola opción ideolóxica-  y d’otru, la construcción d’un frente políticu de calter asturianu, de clase, qu’apueste pol algame progresivu de mayor soberanía p’Asturies en tolos ámbitos, y por supuestu con un calter tresformador a nivel xeneral, tanto nel sistema económicu, como n’otros tarrenes como’l social, cultural, etc.

Graciano siempres foi, y sedrá, “nadapoderosu”, polo qu’entamar a autoorganizanos baxo estructures d’obediencia asturiana y de clase ye primordial p’aparar la llaceria que ye Asturies anguaño. La teoría vese nidia, pero la práutica, ye complicada. Hai qu’intentalo.