martes, 12 de febrero de 2013

Como si aconceyáis n’hostales




Esti llunes apaeció asina como que nun quier la cosa un nuevu “fenómenu mediáticu”, que ye esi videu nel que Beatriz Talegó, de les mocedaes “socialistes”, critica dellos aspeutos del facer de los partíos que componen lo que, pa vergoña de la clase obrera, se denoma “Internacional Socialista”.

Ún de los puntos más llamativos, o resaltaos polos medios –que ‘sospechosamente’ dieron cancha a esti asuntu- ye aquel nel que Talegón critica que cómo se va a trabayar polos problemes del pueblu cuando aconceyen n’hoteles de cinco estrelles. Tornamos a mirar pa la superficie, tornamos a mirar el déu en llugar d’a la lluna.

Lo mesmo me da que los “socialistes” del mundu aconceyen nun hotel de cinco estrelles, o nun hostal. Y lo mesmo me da, porque los partíos que componen esa asociación, -nel casu del estáu español el PSOE- güei en día nun son más qu’un fiel sirviente de los intereses de la burguesía, del gran capital.

Nun podemos pidí-y peres al olmu: el PSOE nun ye un proyeutu de clase obrera, ye un aparatu partidista al serviciu de les élites económiques d’España y del mundu y, poro, va a atender siempres a los dictaos d’estes. Güei, ensin una alternativa con sistema económicu socialista como enantes, nin un movimientu contestatariu de clase fuerte y capaz de plantar cara, la burguesía yá nun  necesita de danos educación nin sanidá pública, nin salarios dignos.

Nun podemos pidí-y a una formación política que yá nun ye nin socialdemócrata, que defienda lo público, cuando a día de güei, nos sos gobiernos –como l’asturianu- fae lo contrario. Nun podemos pidi-yos honradez nin bona xestión, cuando tolos díes vemos noticies de casos de corrupción qu’afeuten a dirixentes del PSOE.

Tampoco podemos pidi-yos renovación nin sensibilidá pa cola mocedá a quienes lleven décades colos mesmos dirixentes rotándose los cargos d’importancia, nin podemos pidí-y a la mocedá mesma que tresforme’l partíu dende dientru, cuando se demuestra qu’escaecen el so “ímpetu revolucionariu” namái qu’atropen el correspondiente puestín, o namái que’l Javier Fernández de turnu fae una llamada pa que les JSA nun faigan tal cosa.

Nun podemos creyenos que de verdá la mocedá del PSOE tea por esos principios que defiende Talegón na so intervención, igual que nun podemos creyenos qu’heba democracia interna nel partíu, cuando, por exemplu, se prohíbe que se presenten mociones pola oficialidá del asturianu. Eso sí, naide marcha, nadie pon oxeciones al respeutu; la custión ye medrar, xubir puestos, y en cuanto se fae, nun queda ren nin d’oficialidá, nin de xusticia social.

Por min, señores del PSOE y la so redolada, como si quieren aconceyar nun hostal, o debaxo d’una ponte. Nun tienen nenguna credibilidá, y si dalgo ta claro nel panorama actual, ye que’l futuru de la clase obrera nun son ustedes:  ye la emancipación social y nacional como un too alredor d’un proyeutu de clase construyíu dende la base.

sábado, 19 de enero de 2013

Comer pallabres





Tamos nuna época na que la nuesa llingua torna a tar en primer llinia d’actualidá, pola so esclusión de la nueva llei educativa LOMCE y posterior inclusión, según se diz, en piores condiciones de lo que taba, que nun yera precisamente pa tirar voladores. Evidentemente, l’únicu camín ye la oficialidá, pa que la nuesa llingua cunte col marcu xurídicu afayaízu pa entamar col desendolcu de polítiques de normalización y puxu del nuesu idioma na sociedá asturiana, con toles garantíes, y con escolarización n’asturianu. 
 
Pero con esto nun toi cuntando nada nuevo nin que nun coincidamos la inmensa mayoría de la xente que tamos esmolecía por esti tipu de custiones. Quiero afondar un poco, porque ye una custión que me paez interesante, nesa mancha prieta que siempres hai alredor de cualquier noticia rellacionada col asturianu: la xente qu’esbabaya escontra’l nuesu idioma bien seya nos comentarios del periódicu de turnu, nes redes sociales…el babayu típicu del llugar, cuyu repertoriu d’ “argumentos” va dende’l clásicu “el asturiano no existe, se lo inventaron para chupar del bote”, pasando pol “hablar bable es un atraso” y, cómo non, ensin escaecer el “no nos creemos complicaciones, que bastantes tenemos con Cataluña y País Vasco”. 

Pero sobre too, hai ún qu’a min faime alloriar un poco más, que ye’l siguiente: “saber asturiano no me sirve de nada en Alemania/ el bable no me da de comer”. Pa min nun ye un argumentu más, ye l’ARGUMENTU. ¿Por qué? Pues porque axunta tolos requisitos del “anti-llingua” estándar:  persona xeneralmente desconocedora de la realidá de la que fala, qu’amás ta alienada dafechu polos mass-media asturianos, estatales y del mundu, y polo tanto, pol so discursu tamién de desconocimientu y manipulación del panorama llingüísticu asturianu.

“El bable no me da de comer”. Sicasí, apuntes al to nenu a relixón  –una materia mui nutritiva-.

“Saber asturiano no me sirve de nada en Alemania”. Pero’l castellán tampoco, y amás, pa colmu, nun domines l’inglés nin muncho menos l’alemán. De lluxu.



Amás nesti argumentu vemos tamién de tresfondu un fuerte componente de clas, y ye que se ta aplicando una lóxica del capitalismu más puru/radical/mercantilista a les llingües. Y ye qu’esi camientu nun se caltién de nenguna manera, porque si agora vamos a clasificar les llingües según la rentabilidá económica, quedaríen nel mundu, siendo xenerosos, media docena. Y esi procesu de desaniciu de les llingües, ye xustamente lo que pasa cola dinámica de globalización capitalista.

Les llingües que tan morriendo nel mundu, güei en día, y dende siempres, son les de la xente más humilde, onde más probitú hai, del mundu, esa xente que, como dixo Galeano, “valen menos que la bala que los mata”. Les llingües que van a morrer nel mundu son les populares, nel sentíu de que son les que caltién el pueblu y nadie más. 

Les llingües tradicionalmente dominantes como l’inglés, el castellán, el francés, l’alemán… son les de la gran burguesía mundial, les llingües que s’espardieron y multiplicaron falantes al traviés de la colonización, del sangre y el fuéu, del xenocidiu y l’esterminiu, pa la implantación de los intereses económicos de la élite mediante la esplotación de la so xente y los sos recursos. Y güei la que medra ye’l chinu, y nun ye por otra cosa que pol espardimientu del poder comercial d’esti país. El chinu gana importancia porque China ye, cada día más, la mayor potencia capitalista.

Demientres, nos países pequenos, pa los güeyos de muncha xente –incluso del territoriu propiu- inesistentes, onde l’únicu bastión pa la supervivencia de la so/les sos llingües ye’l pueblu,  lluchamos por facer que prime’l valir cultural, la importancia de que siga alantre la fala del nuesu país dende va munchos siglos, la que da sentíu, identidá, y desplicación a la nación y les coses que nella pasen.

Sicasí, nesta llucha pol caltenimientu del idioma, tenemos un gran problema, que lu podemos identificar nel tarrén de la educación: el poder sabe perbién que la clave ta na enseñanza, y por ello desendolquen una doble vertiente: 

1)       Pónense tolos pilancos posibles pal enseñu del asturianu. Cuantos menos falantes, meyor. Al tiempu, nos llibros de castellán o d’otres asignatures, l’asturianu nin apaez ente les llingües del estáu, o figura como dialeutu. Sólo gracies al llabor de valientes profesores conscientes de la realidá llingüística asturiana hai estudiantes que, pesie a esta censura, saben que l’asturianu ye una llingua, anque nun la falen o nun la estudien.

2)      Implanten la mentalidá capitalista. La educancia siempres va tirar polos valores y les idegues de la ideoloxía dominante, nesti casu, el capitalismu, cola so llóxica y formes de pensar. D’ehí surde lo d’aplicar criterios de rentabilidá a les llingües. Ser anticapitalista, ser revolucionariu, ye pa min clave nesta batalla.

Nesi sentíu, creo que non sólo hai qu’insistir n’esparder la concencia de qu’hai que caltener la llingua pol fechu mesmu de ser tal, de ser un patrimoniu cultural únicu. Tamién hai qu’afondar en combatir esa mentalidá capitalista y los sos criterios de rentabilidá pa tolos ámbitos de la vida. Con ello, taremos suprimiendo prexuicios importantes alrodiu de la llingua asturiana.

Los términos Capitalismu y Cultura deberíen ser enemigos. La cultura nun tien que ser rentable económicamente, sinon arriquecedora pa la persona. La xente nun debería tener que deprender llingües p’atropar trabayu, sinon pa saber más, por curiosidá, por enfotu de dir a un sitiu onde se fale esi idioma, etc. 

Too eso nun ye posible nesti sistema d’anguaño, onde sólo val lo rentable. Por muncho que quieran, les pallabres son pa falales y escribiles. Niégome a comer pallabres. Niégome a que cada día muerra un cachu de cultura irremplazable nesti planeta por culpa d’un sistema inxustu y asesín.

“Na mesma midida en que seya abolida la esplotación d’un individuu por otru, sedrá abolida la esplotación d’una nación por otra” Karl Marx.

Oficialidá, Dixebra y Socialismu.

 

miércoles, 26 de diciembre de 2012

Dicir / Facer




Ye un fechu dignu de reconocese nun aconceyamientu al estilu d’alcohólicos anónimos, pero confiésolo: Dacuando, dame por ver una tertulia d’eses faches qu’echen n’Intereconomía, 13TV, y compañía. Y la verdá ye que da una mestura de risa y ganes de matar, pero tamién sirve pa deprender bien l’argumentariu base del entramáu drechista españolista.

Ún d’esos argumentos surde cuando se fala del tema catalán, del fechu de que’l nuevu alcuerdu de gobiernu ente CiU y ERC disponga de que va a cellebrase un referéndum d’autodetermín, con o ensin el consentimientu del estáu. Equí entama a falar el Hermann Terstch de turnu, a glayar y denunciar que “nun se puede permitir que s’incumpla la llei”, que s’ultraxe la sacrosanta y divina constitución de 1978.

Sicasí, como en too, hai un doble raseru: acabamos de conocer que’l Ministeriu de Fomentu niégase a cumplir cola toponimia llegal asturiana, porque la llingua asturiana nun ye oficial y, n’aquellos territorios onde nun hai otra llingua oficial aparte del castellán, la señalización va escrita nel idioma del imperiu.

Esto, fuera de les tertulies intereconómiques, llámase de tola vida incumplir la llei; pasase pel forru el nome oficial de los llugares, que’l gobiernu asturianu foi aprobando nestos caberos años, con más o menos rapidez, más o menos enfotu, pero ye un realidá que munchos conceyos yá cunten coles sos denomaciones oficiales en versión castellán/asturianu, o simplemente col nome popular, y esa debería ser la forma correuta de referise a esos territorios, tanto equí como na china popular.

Pero esto incomoda al gobiernu central, que como ye vezu, busca abellugu nel argumentu de que “la llingua asturiana nun ye oficial”. Y asina ye, nun ye oficial, precisamente violando l’artículu 3.2 de la santa constitución, que diz: “Las demás lenguas españolas serán también oficiales en las respectivas Comunidades Autónomas de acuerdo con sus Estatutos”.

Pero como nun podía ser d’otra forma, faen xusto lo que critiquen, tan pasándose pel forru les lleis qu’ellos mesmos crearon, pa puxar y caltener polos privilexos de les élites económiques, polítiques y sociales d’un estáu que ye una construcción d’orixe burgués, entamada dende arriba y encadarmada al traviés d’ellementos robaos a les distintes cultures que constituyen el so territoriu, pa la so posterior aculturización.

Nengún ta llibre de les contradicciones ente lo que se diz y lo que se fae, pero nesti casu l’asuntu ye sangrín dafechu: Nun respeten la toponimia llegal, nun cumplen la Llei d’Usu y Promoción de la Llingua Asturiana, incumplen drechos constitucionales como la vivienda, el trabayu, la oficialidá de toles llingües del estáu, y tantos otros aspeutos que, si mos fixamos bien, afeuten negativamente sólo a les clases populares.

Enxamás veremos que violen la constitución en perxuiciu de les élites, en nengún ámbitu, y ello ye simplemente porque tanto la constitución como la propia naturaleza d’España ye’l beneficiu del burgués, y si pa ello hai qu’incumplir lleis, s’incumplen.

Esti nuevu –que non caberu- ataque a la llingua asturiana, o a los nomes populares de les nueses parroquies, villes, ciudaes, conceyos… ye un ataque al propiu pueblu trabayador asturianu, y a les sos instituciones más cercanes. ¿Qué más da qu’escoyamos nes urnes en 2014, o cuando toque, a un gobiernu qu’apueste por oficializar dafechu tolos nomes populares, si va a llegar el gobiernu central a incumplilo?

L’autonomía asturiana ye una farsa, ye inútil, ye insuficiente, pero’l camín ye precisamente la descentralización, la soberanía, porque merecemos respetu, caltenimientu y promoción de la nuesa identidá, cultura, llingua, etc, y porque queremos cuntar con un estáu que de verdá cumpla les lleis, que garantice xusticia social, y dignidá , y ta comprobao col pasu lo siglos, que dientru d’España eso ye misión imposible.

Simplemente, porque siguirán diciendo una cosa y faciendo otra (o viceversa), según convenga o non a los verdaderos gobernantes d’esta construcción que llamamos España: la élite, y los sos esbirros nes instituciones autonómiques y llocales.


viernes, 7 de diciembre de 2012

Disculpes por lluchar




Dende va unes cuantes selmanes sabemos que la multinacional d’orixe xaponés Suzuki tien pensao zarrar la so fábrica xixonesa haza’l mes de Marzu. Una vegada sabío que, per desgracia, los y les trabayadores-unes 200-  van quedar ensin emplegu, la llucha ta centrándose en sacar les meyores condiciones posibles de despidu, con una indemnización lo más alta posible, debío a qu’hai munchos trabayadores qu’a consecuencia de los distintos ERE desendolcaos agotaron la prestación por desemplegu.

Pa llevar a bon puertu estes aspiraciones, tan movilizándose al traviés de xornaes de fuelga, concentraciones, cortes de carretera, etc. Pues resulta que, tres una manifestación que finó frente a la casa del direutor de la planta xixonesa, la multinacional desixó a los y les trabayadores que pidieran disculpes, y apararan dafechu ya indefinidamente les protestes, como condición pa siguir aldericando y ufiertar propuestes nueves. Non, nun ye chancia, ye la cruda y prepotente realidá.

En resume: Déxente ensin trabayu, depués de tar años aguantando Espedientes de Regulación d’Empléu, gastando meses de la to prestación por desemplegu, pa qu’a la fin la empresa te diga qu’ehí te quedes, que piesllen. ¿Qué mos queda nun casu asina? Protestar, y lluchar hasta’l final polos oxetivos que se consideren afayaízos, básicamente porque poco hai que perder. Pero entós llega la empresa y te diz que, o apares de lluchar polo tuyo, y pides perdón por facelo, o nun habrá más alderique…

Esti comportamientu prepotente y “perdonavides” de Suzuki atopa desplicación principalmente na impunidá cola que cunten les empreses, y que conocen perbién. A lo llargo d’estos años vimos llegar a Asturies munches empreses, al calor de les sovenciones derivaes de los fondos mineros, p’acabar zarrando y colando a los pocos años.

Nesos casos, l’aición del gobiernu asturianu, foi de complicidá dafechu cola parte empresarial, atayando y reprimiendo les protestes de los trabayadores, abellugando a la empresa demientres llevaba la maquinaria de les naves, y dexando ensin futuru a cientos o miles d’obreros y obreres.

Y falo d’Asturies porque ye l’ámbitu que mos ocupa, pero nun ye un problema esclusivu del pueblu asturianu, ye un problema del sistema capitalista nel qu’anguaño vivimos. Va a danos igual que gobierne’l PSOE, que FAC, qu’IU, que’l PP, o qu’UPyD, porque toos van a actuar nesa mesma llinia.

Sólo podemos camudar esa situación avanzando en dos direiciones que, amás, acaben siendo una sola: soberanía y socialismu. Baxo eses dos premises, en llugar de ver cómo la Guardia Civil desencadena a trabayadores pa que la empresa puea llevase la maquinaria, veremos que les instalaciones son del pueblu asturianu. Ya incluso nun puntu intermediu de transición, si consiguimos construyir un proyeutu que, baxo l’actual marcu sistémicu, seya al mesmu tiempu rupturista y revolucionariu, esti dirá a les empreses privaes: Bien, colái, pero d’equí nun-vos lleváis nin un llápiz.

Camiento que toos y toes los que pertenecemos y somos conscientes de pertenecer a la clas obrera naguamos por esi puntu de dignidá nel que’l to estáu, o les tos instituciones,nun  permitan qu’un grupu empresarial priváu quiera humildar a tou un coleutivu de trabayadores, que lluchen llexítimamente polo que ye d’ellos.

Pero repito: pa llegar a esi puntu de dignidá, a esi momentu nel que les coses camuden, hai que garrar dos puntos básicos de referencia, imprescindibles l’ún pa col otru: soberanía, y socialismu. Demientres, siguirá la burlla empresarial haza la clas obrera, cola complicidá del estáu, y pretenderán que pidamos perdón por lluchar.